ଭୁବନେଶ୍ୱର, : ରୋଗୀ ମାନଙ୍କ କ୍ଷେତ୍ରରେ ଚିକିତ୍ସା ସମୟରେ ପୋଷଣ ଯୁକ୍ତ ଖାଦ୍ୟର ଭୂମିକା ଅନେକ ଗୁରୁତ୍ୱପୂର୍ଣ୍ଣ । ଏହି ପ୍ରସଙ୍ଗକୁ ଭିତି କରି ରାଷ୍ଟ୍ରୀୟ ପୋଷଣ ମାହ ପରିପ୍ରେକ୍ଷୀରେ ଶନିବାର ସମ୍ ଅଲ୍ଟିମେଟ ମେଡିକେୟାରରେ “ପ୍ରଥମ ସୁନୋ-ସମ୍ ଅଲ୍ଟିମେଟ ନ୍ୟାସ୍ନାଲ ନ୍ୟୁଟ୍ରିସନ୍ ଓରିଏଂଟେସନ୍” କାର୍ଯ୍ୟକ୍ରମ ଆୟୋଜିତ ହୋଇଯାଇଛି ।
“କ୍ଲିନିକାଲ ନ୍ୟୁଟ୍ରିସନ୍ ଇନ୍ ଆକ୍ସନ୍: ଆପ୍ଲାଇଙ୍ଗ ଏଭିଡେନ୍ସ ବେସ୍ଡ ଇନ୍ସାଇଟ୍” ଶୀର୍ଷକ ଏହି ଏକ ଦିବସୀୟ ଓରିଏଂଟେସନ୍ କାର୍ଯ୍ୟକ୍ରମର ଉଦ୍ଘାଟନୀ ଅବସରରେ ସମ୍ମମ୍ର ସିଇଓ ଡକ୍ଟର ଶ୍ୱେତପଦ୍ମା ଦାଶ, କ୍ରିଟିକାଲ୍ କେୟାର ମେଡିସିନ୍ ବିଭାଗର ମୁଖ୍ୟ ଡାକ୍ତର ବାନାମ୍ବର ରାୟ ଓ ମେଡିକାଲ୍ ସୁପରିଟେଣ୍ଡେଂଟ୍ ଡାକ୍ତର ପି.କେ. ପଣ୍ଡା ଉପସ୍ଥିତ ଥିଲେ ।
ଏହି ଅବସରରେ ସିଇଓ ଡକ୍ଟର ଦାଶ ଅତିଥିମାନଙ୍କୁ ସ୍ୱାଗତ କରିବା ସହ ଓରିଏଂଟେସନ୍ କାର୍ଯ୍ୟକ୍ରମର ପ୍ରସଙ୍ଗ ସମ୍ପର୍କରେ ଆଲୋକପାତ କରିଥିଲେ । ସମସ୍ତଙ୍କ ଜୀବନରେ ଔଷଧ ସହ ପୋଷଣ ଯୁକ୍ତ ଖାଦ୍ୟର ମଧ୍ୟ ଅନେକ ଗୁରୁତ୍ୱ ରହିଥିବା ସେ କହିଥିଲେ ।
ଏହି କାର୍ଯ୍ୟକ୍ରମ ନିମନ୍ତେ ଡକ୍ଟର ଦାଶ ସମ୍ମମ୍ର ସାଢ଼େ ୩ ବର୍ଷର ଯାତ୍ରାକୁ ବେଶ ଅର୍ଥପୂର୍ଣ୍ଣ ବୋଲି କହିବା ସହ ଅତ୍ୟାଧୁନିକ ସ୍ୱାସ୍ଥ୍ୟସେବା କ୍ଷେତ୍ରରେ ଏହା ନିଜର ସ୍ଥିତିକୁ ସୁଦୃଢ଼ କରିବାରେ ଲାଗିଛି ବୋଲି କହିଥିଲେ । ସମ୍ମମ୍ର ନ୍ୟୁଟ୍ରିସନ୍ ଏକ୍ସପର୍ଟ ଟିମ୍ଙ୍କୁ ମଧ୍ୟ ସେ ଶୁଭେଚ୍ଛା ଜଣାଇଥିଲେ ।
ଏହି ଅବସରରେ ଡାକ୍ତର ରାୟ ଗୁରୁତର ରୋଗୀଙ୍କ କ୍ଷେତ୍ରରେ ପୋଷଣର ଗୁରୁତ୍ୱ ସମ୍ପର୍କରେ ଆଲୋକପାତ କରିଥିଲେ । ସଠିକ ପୋଷଣ ବିନା ରୋଗୀ ସୁସ୍ଥ ହୋଇପାରିବ ନାହିଁ ତେଣୁ ଏହା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ । ଗୁରୁତର ରୋଗୀଙ୍କ କ୍ଷେତ୍ରରେ ପୋଷଣ ଯୁକ୍ତ ଖାଦ୍ୟ ଓ ସେମାନଙ୍କ ପରିବାର ବର୍ଗଙ୍କ ସହିତ ଡାକ୍ତରଙ୍କର ଉପଯୁକ୍ତ ଯୋଗାଯୋଗ ହିଁ ରୋଗୀକୁ ସୁସ୍ଥ କରିପାରିବ ବୋଲି ଡାକ୍ତର ରାୟ କହିଥିଲେ ।
ମେଡିକାଲ୍ ସୁପରିଟେଣ୍ଡେଂଟ ଡାକ୍ତର ପଣ୍ଡା କହିଥିଲେ ଯେ କେବଳ ରୋଗୀ ନୁହେଁ ସାଧାରଣ ଜୀବନରେ ମଧ୍ୟ ପୋଷଣର ଅନେକ ଗୁରୁତ୍ୱ ରହିଛି ।
ସମ୍ମମ୍ର ଡାଏଟିକ୍ସ ବିଭାଗ ପକ୍ଷରୁ ଆୟୋଜିତ ଜାତୀୟ ପୋଷଣ ମାସ ଅବସରରେ ଅନୁଷ୍ଠିତ ହୋଇଥିବା ବିଭିନ୍ନ ପ୍ରତିଯୋଗିତାରେ କୃତି ପ୍ରତିଯୋଗୀମାନଙ୍କୁ ଏହି କାର୍ଯ୍ୟକ୍ରମରେ ପୁରସ୍କୃତ କରାଯାଇଥିଲା ।
ସମ୍ମମ୍ର ଡାଏଟିକ୍ସ ବିଭାଗର ସିନିୟର କ୍ଲିନିକାଲ୍ ନ୍ୟୁଟ୍ରିସନିଷ୍ଟ ଶ୍ରୀମତି ସୁଶ୍ରୀ ସଂଗୀତା ଜେନା ଏହି କାର୍ଯ୍ୟକ୍ରମ ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରିବା ସହ ଗର୍ଭାବସ୍ଥାରୁ ବୃଦ୍ଧାବସ୍ଥା ପର୍ଯ୍ୟନ୍ତ ସମସ୍ତଙ୍କ କ୍ଷେତ୍ରରେ ପୋଷଣ ଗୁରୁତ୍ୱପୂର୍ଣ୍ଣ ବୋଲି କହିଥିଲେ । ଶ୍ରୀମତି ଜେନା ଉଦ୍ଘାଟନୀ କାର୍ଯ୍ୟକ୍ରମ ଶେଷରେ ଧନ୍ୟବାଦ ଅର୍ପଣ କରିଥିଲେ ।
ଏହି ଏକ ଦିବସୀୟ ଓରିଏଂଟେସନ୍ କାର୍ଯ୍ୟକ୍ରମରେ ବିଶେଷଜ୍ଞ ଭାବେ ଯୋଗ ଦେଇଥିବା ବେଙ୍ଗାଲୁରୁ ସ୍ଥିତ ନସିମା ଇନ୍ଷ୍ଟିଚ୍ୟୁଟ୍ ଅଫ୍ ସ୍ପିଚ୍ ଆଣ୍ଡ ହିୟରିଂର ଅଧ୍ୟକ୍ଷ ଶ୍ରୀ ଭାସ୍କର ଦେ “ ଡାଏଗ୍ନୋସିସ୍ ଆଣ୍ଡ ମ୍ୟାନେଜମେଂଟ ଅଫ୍ ଡିସ୍ଫାସିଆ ଇନ୍ ଜେରିଆଟିକ୍ସ” ଶୀର୍ଷକ ପ୍ରସଙ୍ଗରେ ତଥ୍ୟ ଉପସ୍ଥାପନ କରିଥିବା ବେଳେ ପୁରୀ ସ୍ଥିତ ଶ୍ରୀ ଜଗନ୍ନାଥ ମେଡିକାଲ୍ କଲେଜର ଫିଜିଓଲୋଜି ବିଭାଗର ପ୍ରଫେସର ଓ ମୁଖ୍ୟ ଡାକ୍ତର ଅର୍ପିତା ପ୍ରିୟଦର୍ଶିନୀ “ସାଇନ୍ସ ଅଫ୍ ଆଚିଭିଙ୍ଗ ଡିଜାଏର୍ଡ ୱେଟ ବାଏ ଇନ୍ଟ୍ୟୁସିଭ୍ ଇଟିଙ୍ଗ”, ମିରଟ ସ୍ଥିତ ଏଲ୍, ଏଲ୍ ଆର ଏମ୍ ମେଡିକାଲ୍ କଲେଜର ଫାର୍ମାକୋଲୋଜି ବିଭାଗର ଏମ୍ଡି ଡାକ୍ତର ଆଶୀଷ ଯାଦବ “ଫୁଡ୍ ଆଣ୍ଡ ଡ୍ରଗ୍ ଇନ୍ଟରଆକ୍ସନ୍”, ସମ୍ମମ୍ର କ୍ରିଟିକାଲ୍ କେୟାର ମେଡିସିନ୍ ବିଭାଗର ମୁଖ୍ୟ ଡାକ୍ତର ବାନାମ୍ବର ରାୟ “ମିଥ୍ସ : ନ୍ୟୁଟ୍ରିସନ୍ ଇନ୍ କ୍ରିଟିକାଲ୍ କେୟାର” ଏବଂ ଜାତୀୟ ସ୍ୱାସ୍ଥ୍ୟ ମିଶନ୍ର କନ୍ସଲଟାଂଟ (ନ୍ୟୁଟ୍ରିସନ୍) ଶ୍ରୀମତି ସନ୍ଧ୍ୟାରାଣୀ ରାଉତ “ଇନ୍ଫାଂଟ ଆଣ୍ଡ ୟଙ୍ଗ ଚାଇଲ୍ଡ ଫିଡିଙ୍ଗ୍” ଶୀର୍ଷକ ପ୍ରସଙ୍ଗରେ ତଥ୍ୟ ଉପସ୍ଥାପନ କରିଥିଲେ ।
ସମ୍ମମ୍ରେ “ପ୍ରଥମ ସୁନୋ-ସମ୍ ଅଲ୍ଟିମେଟ ନ୍ୟାସ୍ନାଲ ନ୍ୟୁଟ୍ରିସନ୍ ଓରିଏଂଟେସନ୍” ଆୟୋଜିତ
