ନୂଆଦିଲ୍ଲୀ: ଏନସିଇଆରଟି ପାଠ୍ୟ ପୁସ୍ତକରେ ସାମିଲ ହୋଇଛି ଶ୍ରୀମଦ୍ ଭଗବଦ୍ ଗୀତା । ଷଷ୍ଠ, ସପ୍ତମ ଶ୍ରେଣୀ ସହ ଏକାଦଶ ଏବଂ ଦ୍ୱାଦଶ ଶ୍ରେଣୀର ସଂସ୍କୃତ ପାଠ୍ୟପୁସ୍ତକରେ ଏହାର ଶ୍ଲୋକ ଅନ୍ତର୍ଭୂକ୍ତ କରାଯାଇଛି । ଏ ନେଇ ସୋମବାର ଲୋକସଭାକୁ ସୂଚନା ଦିଆଯାଇଛି ।
ଏକ ଲିଖିତ ଉତ୍ତରରେ କେନ୍ଦ୍ର ଶିକ୍ଷା ରାଷ୍ଟ୍ରମନ୍ତ୍ରୀ ଅନ୍ନପୂର୍ଣ୍ଣା ଦେବୀ କହିଛନ୍ତି ଯେ, ମନ୍ତ୍ରଣାଳୟ ୨୦୨୦ ମସିହାରେ ଅଲ ଇଣ୍ଡିଆ କାଉନସିଲ୍ ଫର ଟେକନିକାଲ ଏଜୁକେସନ (ଏଆଇସିଟିଇ) ରେ ଇଣ୍ଡିଆନ୍ ନଲେଜ୍ ସିଷ୍ଟମ୍ (ଆଇକେଏସ୍) ଡିଭିଜନ୍ ପ୍ରତିଷ୍ଠା କରିଛି। ଇଣ୍ଡିଆନ୍ ନଲେଜ୍ ସିଷ୍ଟମ୍ (ଆଇକେଏସ୍) ର ସମସ୍ତ ଦିଗ ଉପରେ ଗବେଷଣା, ପରବର୍ତ୍ତୀ ଅନୁସନ୍ଧାନ ଏବଂ ସାମାଜିକ ପ୍ରୟୋଗ ପାଇଁ ଆଇକେଏସ୍ ଜ୍ଞାନକୁ ସଂରକ୍ଷଣ ଏବଂ ବିସ୍ତାର କର ।
ସେ କହିଛନ୍ତି ଯେ, ନ୍ୟାସନାଲ କାଉନସିଲ୍ ଅଫ୍ ଏଜୁକେସନାଲ୍ ରିସର୍ଚ୍ଚ ଆଣ୍ଡ ଟ୍ରେନିଂ (ଏନସିଇଆରଟି ) ଜାତୀୟ ପାଠ୍ୟକ୍ରମ ଫ୍ରେମୱାର୍କର ବିକାଶ ଆରମ୍ଭ କରିଛି । ଯେଉଁଠାରେ ତୃଣମୂଳ ସ୍ତରରୁ ବିଭିନ୍ନ ମନ୍ତ୍ରଣାଳୟ, ବିଭାଗ, ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ସମେତ ବିଭିନ୍ନ ହିତାଧିକାରୀଙ୍କଠାରୁ ଇନପୁଟ ଆମନ୍ତ୍ରଣ କରାଯାଇଥାଏ।
ଜାତୀୟ ଶିକ୍ଷା ନୀତି (ଏନ୍ଇପି) ୨୦୨୨ ପାରା ୪.୨୭ ଭାରତର ପାରମ୍ପରିକ ଜ୍ଞାନକୁ ବୁଝାଇଥାଏ । ଯାହା ଉଭୟ ସ୍ଥାୟୀ ଏବଂ ସମସ୍ତଙ୍କ କଲ୍ୟାଣ ପାଇଁ ଚେଷ୍ଟା କରିଥାଏ ବୋଲି ସେ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ଏହି ଶତାବ୍ଦୀରେ ଜ୍ଞାନ ଶକ୍ତି ହେବାକୁ ହେଲେ ଆମକୁ ଆମର ଐତିହ୍ୟକୁ ବୁଝିବାକୁ ହେବ ଏବଂ ବିଶ୍ୱକୁ କାର୍ଯ୍ୟ କରିବାର ‘ଭାରତୀୟ ଉପାୟ’ ଶିଖାଇବାକୁ ହେବ।
