ଭୁବନେଶ୍ୱର: କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲାର କ୍ରାଇମ୍ବ୍ରାଞ୍ଚ ତଦନ୍ତ ଆରମ୍ଭ ହୋଇଛି । ଗୁରୁବାର କ୍ରାଇମ୍ବ୍ରାଞ୍ଚ ଡିଏସ୍ପି କଳ୍ପନା ସାହୁଙ୍କ ନେତୃତ୍ୱରେ ୫ଜଣିଆ ଟିମ୍ ଭଦ୍ରକ ଏସ୍ପି କାର୍ଯ୍ୟାଳୟରେ ପହଞ୍ଚିଥିଲେ । ଏସ୍ପିଙ୍କ ସହ ଆଲୋଚନା କରିବା ସହିତ ମାମଲା ସମ୍ପର୍କିତ ତଥ୍ୟ ସଂଗ୍ରହ କରିଛନ୍ତି । ଏହି ଟିମ୍ରେ କଳ୍ପନାଙ୍କ ସମେତ ଇନ୍ସପେକ୍ଟର ବିଶ୍ୱପ୍ରକାଶ ରାଉତ, ସବ୍ଇନ୍ସପେକ୍ଟର ଅବଧୂତ ବାରିକଙ୍କ ସହ ଏଏସ୍ଆଇ ତନୁଶ୍ରୀ ନାୟକ, ଆଶୁତୋଷ ପ୍ରଧାନ ଅଛନ୍ତି । ନିର୍ବାଚନ ପାଇଁ ଚାନ୍ଦବାଲି ଏସ୍ଡିପିଓ, ଆଇଆଇସି ବ୍ୟସ୍ତଥିବାରୁ ଗୁରୁବାର ବେଶି କିଛି ତଦନ୍ତ ହୋଇପାରିନାହିଁ । ଶୁକ୍ରବାର ଏହି ଟିମ୍ ଅପହରଣସ୍ଥଳ ଚାନ୍ଦବାଲି ପଲାସପୁର ଗାଁ ନିକଟକୁ ଯିବ । ସେଠାକୁ ଯାଇ ଘଟଣାସ୍ଥଳ ଅନୁଧ୍ୟାନ କରିବା ସହ ସ୍ଥାନୀୟ ଲୋକଙ୍କୁ ପଚରାଉଚରା କରିବ । ତଥ୍ୟପ୍ରମାଣ ଆଧାରରେ ପୁଣି ସାନି ତଦନ୍ତ କରାଯିବ ବୋଲି ଜଣାପଡ଼ିଛି । ସେପଟେ ମୁଖ୍ୟ ଅଭିଯୁକ୍ତ ୱେବ୍ପୋର୍ଟାଲ ମାଲିକାଣୀ ଶର୍ମିଷ୍ଠା ରାଉତ ଓ ତାଙ୍କ ସହଯୋଗୀ ଝୁନା ଭୋଇ ପଶ୍ଚିମବଙ୍ଗ, ବେଙ୍ଗାଲୁରୁ କିମ୍ବା ଆନ୍ଧ୍ରପ୍ରଦେଶର ବିଜୟୱାଡାରେ ଲୁଚିଥିବା ସନ୍ଦେହ କରାଯାଉଛି ।
ଏନେଇ କ୍ରାଇମବ୍ରାଞ୍ଚର ଟିମ୍ ଏହିସବୁ ରାଜ୍ୟ ପୁଲିସର ସହାୟତା ଲୋଡ଼ିଛି । ଟେକ୍ନିକାଲ ତଥ୍ୟ ଆଧାରରେ କ୍ରାଇମବ୍ରାଞ୍ଚ ଶର୍ମିଷ୍ଠାଙ୍କୁ ଧରିବାକୁ ଯୋଜନା କରିଛି । ତାଙ୍କର ମୋବାଇଲ ଲୋକେସନ୍, ଏଟିଏମ୍ ଟ୍ରାଞ୍ଜାକ୍ସନକୁ ଅନୁଧ୍ୟାନ ଚାଲିଛି । ପୂର୍ବରୁ ଅନେକ ମାମଲାରେ କ୍ରାଇମବ୍ରାଞ୍ଚ ୧୦ରୁ ୧୫ଦିନ ମଧ୍ୟରେ ତଦନ୍ତ ସାରିଥିବା ଦେଖିବାକୁ ମିଳିଛି । ତେବେ ଏହି ଘଟଣାରେ କ୍ରାଇମବ୍ରାଞ୍ଚ କେତେ ଶୀଘ୍ର ତଦନ୍ତ କରି ମାମଲାରେ ପୂର୍ଣ୍ଣଛେଦ ପକାଉଛି, ତାହା ସମୟ ହଁ କହିବ । ଅନ୍ୟପକ୍ଷେ ଏକ ପୁଲିସ ଟିମ୍ ବିଜୟୱାଡା ଯାଇଥିବା ଜଣାପଡ଼ିଛି । ଶର୍ମିଷ୍ଠା ବିଜୟୱାଡାରେ ଲୁଚିଥିବା ଖବରପାଇ ସେଠାରେ ପୁଲିସ ଟିମ୍ ଡେରା ପକାଇଛନ୍ତି ।
ଖୁବ୍ଶୀଘ୍ର ତାଙ୍କୁ ଗିରଫ କରାଯିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ସୂଚନା ଅନୁଯାୟୀ, ଘଟଣାର ଗୁରୁତ୍ୱ ଓ ଅଭିଯୁକ୍ତମାନଙ୍କ ରାଜ୍ୟର ବିଭିନ୍ନ ଜିଲ୍ଲାରେ ଅବସ୍ଥିତିକୁ ଦେଖି ପୁଲିସ ଡିଜି ସୁନୀଲ ବଂଶଲ ଏହି ମାମଲାର ତଦନ୍ତ ଭାର କ୍ରାଇମବ୍ରାଞ୍ଚକୁ ଦେଇଛନ୍ତି । ଏନେଇ କ୍ରାଇମବ୍ରାଞ୍ଚ ଏଡିଜି ସଞ୍ଜିବ ପଣ୍ଡା ତଦନ୍ତ ପାଇଁ ତୁରନ୍ତ ଦୁଇଟି ଟିମ୍ ଗଠନ କରିଛନ୍ତି । ଦୁଇଟି ଟିମ୍ରେ ୯ ଜଣ ସଦସ୍ୟ ଅଛନ୍ତି । ୫ ଜଣିଆ ଟିମ୍ ଓଡ଼ିଶାରେ ରହି ହତ୍ୟାକାଣ୍ଡର ତଦନ୍ତ ଆରମ୍ଭ କରିଥିବାବେଳେ ଅନ୍ୟ ୪ ଜଣିଆ ଟିମ୍ଟି ରାଜ୍ୟ ବାହାରକୁ ଯାଇ ଶର୍ମିଷ୍ଠା ଓ ଝୁନା ଭୋଇଙ୍କୁ ଧରିବାକୁ ଜାଲ ବିଛାଇଛି । ଏହି ଦୁଇଟି ଟିମ୍କୁ କ୍ରାଇମବ୍ରାଞ୍ଚ ଡିଏସ୍ପି କଳ୍ପନା ସାହୁ ପରିଚାଳନା କରୁଛନ୍ତି ।
