ନୂଆଦିଲ୍ଲୀ : ଇପିଏଫଓକୁ ନେଇ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି । କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ଅଧୀନରେ ଅନିବାର୍ଯ୍ୟ କଭରେଜ୍ ପାଇଁ ମାସିକ ବେତନ ସୀମାକୁ ୧୫ ହଜାର ଟଙ୍କାରୁ ବଢ଼ାଇ ୨୫ ହଜାର ଟଙ୍କା କରିବାକୁ କେନ୍ଦ୍ରୀୟ କ୍ୟାବିନେଟ୍ ମଞ୍ଜୁରୀ ଦେଇଛି । ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ ଏନେଇ ସୂଚନା ଦେଇଛନ୍ତି ।ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ କେନ୍ଦ୍ରୀୟ ମନ୍ତ୍ରିମଣ୍ଡଳ ବୈଠକରେ ଶ୍ରମ ଓ ରୋଜଗାର ମନ୍ତ୍ରଣାଳୟର ଏହି ପ୍ରସ୍ତାବକୁ ଅନୁମୋଦନ କରାଯାଇଛି । ଏହି ପଦକ୍ଷେପ ଫଳରେ ସଂଗଠିତ କ୍ଷେତ୍ରରେ କାମ କରୁଥିବା ଅଧିକ କର୍ମଚାରୀ ଇପିଏଫଓର ସାମାଜିକ ସୁରକ୍ଷା ବ୍ୟବସ୍ଥାର ପରିସରକୁ ଆସିପାରିବେ । ସରକାରଙ୍କ ଅନୁମାନ ଅନୁସାରେ, ବେତନ ସୀମା ବୃଦ୍ଧି ହେବା ଦ୍ୱାରା ୫୧ ଲକ୍ଷରୁ ଅଧିକ ଅତିରିକ୍ତ କର୍ମଚାରୀ ସିଧାସଳଖ ଭାବେ ଇପିଏଫଓର ପରିସରକୁ ଆସିପାରିବେ । ଏହା ଦ୍ୱାରା ପିଏଫ୍, ପେନସନ୍ ଏବଂ ସମ୍ବନ୍ଧିତ ବୀମା ଭଳି ସାମାଜିକ ସୁରକ୍ଷା ସୁବିଧାର ପରିସର ବଢ଼ିବ ।
ପୂର୍ବ ବ୍ୟବସ୍ଥା ଅନୁସାରେ, ମାସିକ ବେତନ ୧୫ ହଜାର ଟଙ୍କାରୁ ଅଧିକ ଥିବା ନୂଆ କର୍ମଚାରୀଙ୍କ ପାଇଁ ଇପିଏଫଓର ଅନିବାର୍ଯ୍ୟ କଭରେଜ୍ ଲାଗୁ ହେଉନଥିଲା । ଏବେ ଏହି ସୀମା ୨୫ ହଜାର ଟଙ୍କା ହେବାରୁ ୧୫ ହଜାରରୁ ୨୫ ହଜାର ଟଙ୍କା ମଧ୍ୟରେ ବେତନ ପାଉଥିବା ଏକ ବଡ଼ ବର୍ଗର କର୍ମଚାରୀ ଇପିଏଫଓର ବୈଧାନିକ ସାମାଜିକ ସୁରକ୍ଷା ବ୍ୟବସ୍ଥାରେ ସାମିଲ ହୋଇପାରିବେ।
