ୟୁକ୍ରେନ ମେୟରଙ୍କୁ ଅପହରଣ କଲା ଋଷ

କିଭ: ଟଳୁନି ୟୁକ୍ରେନ-ଋଷ ଯୁଦ୍ଧ । ଦକ୍ଷିଣ ୟୁକ୍ରେନ ସହର ମେଲିଟୋପୋଲ ଋଷ ଦଖଲ କରିବା ପରେ ଏହାର ମେୟରଙ୍କୁ ଅପହରଣ କରିନେଇଛି ଋଷସେନା । ଏନେଇ ୟୁକ୍ରେନ ରାଷ୍ଟ୍ରପତି ଭୋଲଦିମିର ଜେଲେନସ୍କି ଓ ୟୁକ୍ରେନ ଅଧିକାରୀ ସୂଚନା ଦେଇଛନ୍ତି । ସହରକୁ କବଜା କରିବା ପରେ ୧୦ ଜଣିଆ ଦଖଲକାରୀ ଗ୍ରୁପ ମେଲିଟୋପୋଲର ମେୟର ଇଭାନ ଫେଡୋରୋଭଙ୍କୁ ଅପହରଣ କରି ନେଇଛନ୍ତି । ସେ ଋଷ ସହ ବୁଝାମଣା କରିବାକୁ ମନା କରିବା ପରେ ତାଙ୍କୁ ଅପହରଣ କରି ନେଇଥିବା ୟୁକ୍ରେନ ସାଂସଦ ପକ୍ଷରୁ ଟ୍ୱିଟକରି ସୂଚନା ଦିଆଯାଇଛି । ଶୁକ୍ରବାର ରାତିରେ ଭିଡିଓ ବାର୍ତ୍ତା ଦେଇ ଜେଲେନ୍‌ସ୍କି ଅପହରଣ ଘଟଣା ନେଇ ମୁହଁ ଖୋଲିଥିଲେ । ମେୟର ଫେଡୋରୋଭ ସାହସର ସହ ୟୁକ୍ରେନକୁ ବିପଦରୁ ରକ୍ଷା କରିଛନ୍ତି ବୋଲି କହିଛନ୍ତି ଜେଲେନସ୍କି ।ଜେଲେନ୍‌ସ୍କି କହିଛନ୍ତି ଯେ, ଏହା ନିଶ୍ଚିତ ଭାବରେ ଆକ୍ରମଣକାରୀଙ୍କ ଦୁର୍ବଳତାର ସଙ୍କେତ ଅଟେ । ସେମାନେ ଆତଙ୍କବାଦର ଏକ ନୂତନ ପର୍ଯ୍ୟାୟକୁ ପହଞ୍ଚିଛନ୍ତି ଯେଉଁଥିରେ ସେମାନେ ସ୍ଥାନୀୟ ୟୁକ୍ରେନ କର୍ତ୍ତୃପକ୍ଷଙ୍କ ପ୍ରତିନିଧିଙ୍କୁ ଶାରୀରିକ ଭାବରେ ହଟାଇବାକୁ ଚେଷ୍ଟା କରୁଛନ୍ତି । ଏ ଅପରାଧ ଜଣେ ନିର୍ଦ୍ଦିଷ୍ଟ ବ୍ୟକ୍ତିବିଶେଷଙ୍କ ବିରୋଧରେ ନୁହେଁ ଅଥବା ଗୋଟିଏ ନିର୍ଦ୍ଦିଷ୍ଟ ସମ୍ପ୍ରଦାୟ ବିରୋଧରେ ନୁହେଁ ବରଂ ଏହା ଗଣତନ୍ତ୍ର ବିରୋଧରେ ଅପରାଧ ।