ମୁମ୍ବାଇ: ଭାରତୀୟ ଦିନିକିଆ ଓ ଟେଷ୍ଟ ଦଳର ଅଧିନାୟକ ରୋହିତ ଶର୍ମା ଆଉ ଟି-୨୦ ଖେଳିବାର ସମ୍ଭାବନା ନାହିଁ । ଦିନିକିଆ ବିଶ୍ୱକପ୍ ଆରମ୍ଭ ପୂର୍ବରୁ ଛୋଟ ଫର୍ମାଟ୍ରେ ନିଜ ଭବିଷ୍ୟତ ନେଇ ସେ ଚୟନ ସମିତି ଅଧ୍ୟକ୍ଷ ଅଜିତ ଅଗରକରଙ୍କ ସହ ବ୍ୟାପକ ଆଲୋଚନା କରିଥିବା ବିିସିସିଆଇ ସୂତ୍ରରୁ ଜଣାପଡ଼ିଛି । ୨୦୨୨ ନଭେମ୍ବରରେ ଟି-୨୦ ବିଶ୍ୱକପ୍ ସେମିଫାଇନାଲ୍ରୁ ବିଦାୟ ନେବା ପରେ ରୋହିତ ଛୋଟ ଫର୍ମାଟରେ ଗୋଟିଏ ବି ମ୍ୟାଚ୍ ଖେଳି ନାହାନ୍ତି । ଦିନିକିଆ ବିଶ୍ୱକପ୍ ଉପରେ ଅଧିକ ଧ୍ୟାନ କେନ୍ଦ୍ରିତ କରିଥିବାରୁ ସେ ସ୍ୱେଚ୍ଛାକୃତ ଭାବେ ଏହି ଫର୍ମାଟ୍ରୁ ପ୍ରାୟତଃ ଦୂରେଇ ରହିଥିଲେ ।
ସେବେଠାରୁ ହାର୍ଦ୍ଦିକ ପାଣ୍ଡ୍ୟା ପ୍ରାୟତଃ ଟି-୨୦ରେ ଭାରତୀୟ ଦଳର ନେତୃତ୍ୱ ନେଇଛନ୍ତି । ୩୬ ବର୍ଷୀୟ ଭାରତୀୟ ଅଧିନାୟକ ୧୪୮ଟି ଟ୍ୱେଣ୍ଟି୨୦ ମ୍ୟାଚ୍ ଖେଳି ପାଖାପାଖି ୧୪୦ ଷ୍ଟ୍ରାଇକ୍ ରେଟ୍ରେ ୩୮୫୩ ରନ୍ କରିଛନ୍ତି । ସେ ନିଜେ ସ୍ୱେଚ୍ଛାକୃତ ଭାବେ ଟ୍ୱେଣ୍ଟି-୨୦ରୁ ଦୂରେଇ ରହିଛନ୍ତି । ଏବେ ଭାରତୀୟ ଦଳରେ ଚାରିଜଣ ଓପ୍ନର ଶୁଭମନ ଗିଲ୍, ଯଶସ୍ୱୀ ଜୟସ୍ୱାଲ୍, ଇଶାନ କିଷାନ ଓ ଋତୁରାଜ ଗାଏକ୍ୱାଡ୍ ଆଇପିଏଲ୍ରେ ଭଲ ପ୍ରଦର୍ଶନ କରିଛନ୍ତି । ଯଦି ଯୁବ ଖେଳାଳିଙ୍କ ପ୍ରଦର୍ଶନ ଭଲ ନ ହୁଏ, ତେବେ ଚୟନକର୍ତ୍ତା କିମ୍ବା ବିସିସିଆଇର ବରିଷ୍ଠ ଅଧିକାରୀମାନେ ରୋହିତଙ୍କୁ ତାଙ୍କ ବର୍ତ୍ତମାନର ଆଭିମୁଖ୍ୟ ଉପରେ ପୁନର୍ବିଚାର କରିବାକୁ କହିପାରନ୍ତି । କ୍ୟାରିୟର୍ର ବର୍ତ୍ତମାନ ପର୍ଯ୍ୟାୟରେ ରୋହିତ ନିଜ କାର୍ଯ୍ୟର ବୋଟ୍ ସମ୍ଭାଳିବା ସହିତ ଅବଶିଷ୍ଟ ସମୟ ପାଇଁ ସେ ଯେପରି ଆଘାତମୁକ୍ତ ରହିବେ ତାହା ନିଶ୍ଚିତ କରିବାକୁ ଚାହିଁବେ ।
ପ୍ରତିବର୍ଷ ତିନୋଟି ଫର୍ମାଟ୍ ଏବଂ ଆଇପିଏଲ୍ ଖେଳିବା ଅସମ୍ଭବ ହେଉଥିବା ବେଳେ ଚଳିତ ବର୍ଷ ଡିସେମ୍ବରରୁ ୨୦୨୪ ମାର୍ଚ୍ଚ ମଧ୍ୟରେ ସାତଟି ଟେଷ୍ଟ୍ ଖେଳିବାକୁ ଥିବାରୁ ଭାରତୀୟ ଅଧିନାୟକଙ୍କ ଫୋକସ୍ ମୁଖ୍ୟତଃ ଲାଲ୍ ବଲ୍ କ୍ରିକେଟ୍ ଉପରେ ରହିବ । ଏବେ ମଧ୍ୟ ତାଙ୍କ ନିକଟରେ ଭାରତକୁ ୨୦୨୫ରେ ଆଉ ଏକ ବିଶ୍ୱ ଟେଷ୍ଟ ଚାମ୍ପିଅନ୍ଶିପ୍ (ଡବ୍ଲ୍ୟୁଟିସି) ଫାଇନାଲ୍ରେ ପହଞ୍ଚାଇବାର ବାସ୍ତବବାଦୀ ସୁଯୋଗ ରହିଛି ଏବଂ ୨୦୧୯ରେ ଭାରତ ପାଇଁ ଓପନିଂ ଆରମ୍ଭ କରିବା ପରଠାରୁ ପାରମ୍ପରିକ ଫର୍ମରେ ତାଙ୍କର ନିଜସ୍ୱ ଫର୍ମ ଅତି ଚମତ୍କାର ରହିଛି ।
