ନୂଆଦିଲ୍ଳୀ : କୁହାଯାଏ ରାମାୟଣ ଏବଂ ଭଗବାନ ରାମଙ୍କର ଅନେକ ପୌରାଣିକ ପ୍ରାମାଣିକତା ଶ୍ରୀଲଙ୍କାରେ ରହିଛି । ଏହି ସ୍ଥାନ ଭଗବାନ ଶ୍ରୀରାମ ଏବଂ ରାବଣ ସହିତ ଯୋଡ଼ି ହୋଇଛି । ଏହି ପ୍ରସଙ୍ଗରେ ଜାଣିବା ଶ୍ରୀଲଙ୍କାରେ ଥିବା ଏମିତି ଏକ ଗୁମ୍ଫା ବିଷୟରେ ଯେଉଁଠି ଆଜି ବି ରାବଣର ଦେହାବଶେଷ ସୁରକ୍ଷିତ ରଖାଯାଇଛି ବୋଲି ଲୋକଙ୍କ ମନରେ ଅତୁଟ ବିଶ୍ୱାସ ରହିଛି ।
ଏକ ଅଧ୍ୟୟନ ଅନୁସାରେ ଶ୍ରୀଲଙ୍କାରେ ଏମିତି ୫୦ଟି ସ୍ଥାନ ରହିଛି ଯାହାର ସଂପର୍କ ରାମାୟଣ ସହିତ ଯୋଡ଼ି ହୋଇଛି । ଏହି ଅଧ୍ୟୟମ ଅନୁସାରେ, ଭଗବାନ ଶ୍ରୀରାମଙ୍କ ହାତରେ ରାବଣର ବଧକୁ ୧୦ ହଜାର ବର୍ଷରୁ ଅଧିକ ହୋଇଗଲାଣି । କିନ୍ତୁ ଶ୍ରୀଲଙ୍କାରେ ଥିବା ଏକ ପାହାଡ଼ ଗୁମ୍ଫାରେ ଆଜି ବି ରାବଣର ଦେହାବଶେଷ ସୁରକ୍ଷିତ ରହିଛି । ଏହି ଗୁମ୍ଫା ଶ୍ରୀଲଙ୍କାର ରାଗାଲାର ଘନ ଜଙ୍ଗଲରେ ଅବସ୍ଥିତ । ଯେଉଁ ଗୁମ୍ଫାରେ ରାବଣର ଦେହାବଶେଷ ରଖାଯାଇଛି ତାହା ରାଗାଲା ଜଙ୍ଗଲର ୮ ହଜାର ଫୁଟ୍ ପାହାଡ଼ ଉଚ୍ଚରେ ରହିଛି । ଏହି ସ୍ଥାନରେ ରାବଣର ମୃତଦେହକୁ ମମିରେ ପରିଣତ କରାଯାଇ କାଠ ବାକ୍ସ ଭିତରେ ରଖାଯାଇଛି । ଏହା ଉପରେ ଏକ ସ୍ୱତନ୍ତ୍ର ପ୍ରକାର ଲେପ ଲଗାଯାଇଛି । ଯେଉଁଥିପାଇଁ ହଜାର ହଜାର ବର୍ଷ ହେବ ସେହି ଦେହାବଶେଷ ସୁରକ୍ଷିତ ରହିଛି । ଏହି ରିସର୍ଚ୍ଚ ଶ୍ରୀଲଙ୍କା ଇଣ୍ଟରନ୍ୟାସନାଲ ରିସର୍ଚ୍ଚ ସେଣ୍ଟର ଦ୍ୱାରା କରାଯାଇଛି ।
ଏହି ରିସର୍ଚ୍ଚ ଅନୁସାରେ, ୧୮ ଫୁଟ୍ ଲମ୍ବା ଏବଂ ୫ଫୁଟ୍ ଚଉଡ଼ା ଏହି କାଠ ବାକ୍ସ ଭିତରେ ରାବଣର ମୃତଦେହ ରହିଛି । ସେହି କାଠ ବାକ୍ସ ତଳେ ରାବଣର ବହୁ ମୂଲ୍ୟର ଭଣ୍ଡାର ରହିଛି । ଏହି ଭଣ୍ଡାରର ସୁରକ୍ଷା ଏକ ନାଗ ଏବଂ ଭୟଙ୍କର ଜୀବଜନ୍ତୁ କରିଥାନ୍ତି । ମାନ୍ୟତା ଅନୁସାରେ ଭଗବାନ ଶ୍ରୀରାମ ରାବଣର ବଧ କରିବା ପରେ ତା’ର ମୃତଦେହର ଅନ୍ତିମ ସଂସ୍କାର ପାଇଁ ବିଭୀଷଣକୁ ଦେଇଥିଲେ । କିନ୍ତୁ ବିଭୀଷଣ ରାଜଗାଦି ସମ୍ଭାଳିବାର ଦାୟିତ୍ୱରେ ଏତେ ମଗ୍ନ ହୋଇଗଲେ ଯେ ମୃତ ଶରୀରର ଅନ୍ତିମ ସଂସ୍କାର କରିନଥିଲେ । କୁହାଯାଏ ଏହାପରେ ରାବଣର ମୃତଦେହକୁ ନାଗବଂଶୀୟମାନେ ନେଇଯାଇଥିଲେ । ସେମାନଙ୍କର ବିଶ୍ୱାସ ଥିଲା ରାବଣ ପୁନର୍ଜୀବନ ପାଇପାରିବ । କିନ୍ତୁ ସେମିତି ହୋଇନଥିଲା । ଏହାପରେ ସେମାନେ ବର୍ଷ ବର୍ଷ ଧରି ସୁରକ୍ଷିତ ରହିବା ଉଦ୍ଦେଶ୍ୟରେ ରାବଣର ମୃତ ଶରୀରକୁ ମମିରେ ପରିଣତ କରିଥିଲେ।
