ଭୁବନେଶ୍ୱର: ‘ବିଜେଡି ଯେଉଁ ନୀତି ଆଦର୍ଶରେ ଗଢାହୋଇଥିଲା ତାହା ଆଉ ନାହିଁ । ଅଭ୍ୟନ୍ତରୀଣ ଗଣତନ୍ତ୍ର ଆଉ ନାହିଁ । ନେତାଙ୍କ ସହ ବିଚାର ବିମର୍ଷ ନାହିଁ । ଦଳରେ ଆବଶ୍ୟକତା ମନେକଲେନି । ଉଚିତ ସମୟ ଭାବି ଇସ୍ତଫା ଦେଲି । ଅନ୍ୟ ଦଳରୁ ଅଫର ଥିଲା,ଗଲିନି। ନିର୍ବାଚନ ଲଢିବି ନାହିଁ । ଟିକେଟ ପାଇଁ ଆଶାୟୀ ନଥିଲି, ଦାବିଦାର ଥିଲି । ଯାହାକୁ ଦଳ ଟିକେଟ ଦେଇଛି, ତାଙ୍କୁ ସମର୍ଥନ କରିପାରିବି ନାହିଁ ।’ ଆଜି ବିଜେଡିରୁ ଇସ୍ତଫା ଦେବା ପରେ ନିଜ ପ୍ରତିକ୍ରିୟାରେ ପ୍ରଭାସ ସିଂହ ଏହାକହିଛନ୍ତି ।
ପ୍ରକାଶ ଯେ ନିର୍ବାଚନୀ ମାହୋଲ ଭିତରେ ଦଳ ଡିଆଁ ପର୍ବ ଜୋର ଧରିଛି । ଏହାରି ଭିତରେ ବିଜେଡିର ଜଣେ ନେତା ଦଳ ଛାଡ଼ିଛନ୍ତି । ସେ ହେଉଛନ୍ତି ପୂର୍ବତନ ସାଂସଦ ତଥା ବରଗଡ଼ ଜିଲ୍ଲା ବିଜେଡି ସଭାପତି ପ୍ରଭାସ ସିଂହ । ସେ ନିଜେ ନବୀନ ନିବାସ ଆସି ନିଜ ଇସ୍ତଫାପତ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଦାନ କରିଛନ୍ତି । ପ୍ରଭାସ ସିଂହ ୨୦୧୪ରୁ ୨୦୧୯ ପର୍ଯ୍ୟନ୍ତ ବରଗଡ଼ ସାଂସଦ ଥିଲେ । ଚଳିତ ନିର୍ବାଚନ ପାଇଁ ସେ ଟିକେଟ ଆଶାୟୀ ଥିଲେ । କିନ୍ତୁ ଦଳ ପକ୍ଷରୁ ପରିଣୀତା ମିଶ୍ରଙ୍କୁ ଟିକେଟ ଦିଆଯାଇଛି ।
