ବେଲୁଚିସ୍ତାନ: ପାକିସ୍ତାନର ବେଲୁଚିସ୍ତାନ ପ୍ରଦେଶରେ ଥିବା ଏକ କୋଇଲା ଖଣିରେ ମିଥେନ୍ ଭଳି ପ୍ରାଣଘାତୀ ଗ୍ୟାସ ବିସ୍ଫୋରଣ ହୋଇଥିବା ବେଳେ ଏଥିରେ ପ୍ରାୟ ୧୨ଶ୍ରମିକ ଜୀବନ୍ତ ଦଗ୍ଧ ହୋଇଥିବା ସୂଚନା ମିଳିଛି । ରିପୋର୍ଟ ଅନୁସାରେ ହରନାଇ ଜିଲ୍ଲା ଜର୍ଦ୍ଦାଲୋ ଅଞ୍ଚଳରେ ଥିବା ଏକ କୋଇଲା ଖଣିରେ ବେଆଇନ୍ ଭାବେ ଖନନ କାର୍ଯ୍ୟ ଚାଲିଥିଲା । ଅନ୍ୟପକ୍ଷେ ଖନନ କାର୍ଯ୍ୟରେ ପ୍ରାୟ ୨୦ଜଣ ଶ୍ରମିକଙ୍କୁ ନିୟୋଜିତ କରାଯାଇଥିଲା । ନିୟମ ମୁତାବକ ଖଣି ଖନନ ସମୟରେ ଶ୍ରମିକମାନଙ୍କୁ ଯେଉଁସବୁ ସୁରକ୍ଷା କିଟ୍ ଯୋଗାଇ ଦିଆଯିବା କଥା ସେସବୁ ଯୋଗାଇ ଦିଆଯାଇନଥିଲା । ତେବେ ଦୁର୍ଭାଗ୍ୟବଶତଃ ଖଣି ଖନନ ସମୟରେ ଖଣି ମଧ୍ୟରୁ ମିଥେନ୍ ଗ୍ୟାସ୍ ଲିକ୍ ହୋଇଥିଲା । ଗ୍ୟାସ ଲିକ୍ ହେଉଥିବା ଜାଣିପାରି ୮ ଶ୍ରମିକ ଖଣି ବାହାରକୁ ଚାଲିଆସିବା ପାଇଁ ହୋହଲ୍ଲା କରିଥିଲେ ଏବଂ ଅନ୍ୟ ସାଥୀ ଶ୍ରମିକମାନଙ୍କୁ ମଧ୍ୟ କହିଥିଲେ । କିନ୍ତୁ ସେମାନେ ନଶୁଣିବାରୁ ଏମାନେ ବାହାରକୁ ଆସିବା ଆରମ୍ଭ କରିଥିଲେ ।
ତେବେ ଏହି ସମୟରେ ହଠାତ୍ ଖଣି ମଧ୍ୟରେ ପ୍ରଚଣ୍ଡ ବିସ୍ଫୋରଣ ହୋଇଥିଲା । ଖଣିର ଭିତର ପାଶ୍ୱର୍ରେ କାମ କରୁଥିବା ୧୨ ଶ୍ରମିକ ସେହିଠାରେ ହିଁ ଜୀବନ୍ତ ଦଗ୍ଧ ହୋଇଯାଇଥିଲେ ଏବଂ ବାକି ୮ଜଣ ଖଣି ମଧ୍ୟରେ ଗୁରୁତର ହୋଇପଡିଥିଲେ । ତେବେ ଏମାନଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ମୃତକଙ୍କ ଶବ ଉଦ୍ଧାର ପ୍ରକ୍ରିୟା ଜାରି ରହିଛି । ଖଣି ମହାନିର୍ଦ୍ଦେଶକ ଅବଦ୍ଦୁଲ୍ଲା ଶାହୱାନ୍ୀ ଘଟଣାକୁ ସ୍ୱୀକାର କରିଛନ୍ତି । ପ୍ରଧାନମନ୍ତ୍ରୀ ଶେହବାଜ ଶରିଫ୍ ଏହି ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି ।
