ବ୍ୟୁରୋ : ବୋରୱେଲ ପାଇଁ ଖୋଳାଯାଇଥିବା ଏକ ଗର୍ତ୍ତରେ ଖସି ପଡ଼ିଥିବା ରାହୁଲ ସାହୁ (୧୦)ଙ୍କୁ ଉଦ୍ଧାର ପାଇଁ ଉଦ୍ଧାରକାରୀ ଦଳ ପ୍ରାଣପଣେ ଉଦ୍ୟମ ଜାରି ରଖିଛନ୍ତି । ଟାଣ ମାଟି ଓ ପଥର କାଟି ଉଦ୍ଧାରକାରୀ ଦଳ ରାହୁଲ ପାଖରେ ପହଞ୍ଚିବାକୁ ଯେଉଁ ଉଦ୍ୟମ କରିଛନ୍ତି ସେଥିରେ ସଫଳ ହେବାକୁ ଆଉ ମାତ୍ର ୨ ଫୁଟ୍ର ବ୍ୟବଧାନ ରହିଛି । ରାହୁଲର ସ୍ୱର ଶୁଣିଲେଣି ଉଦ୍ଧାରକାରୀ ଦଳ । ତଥାପି ବିପଦ ଟଳି ନାହିଁ । କାରଣ ଶେଷ ୪ ଫୁଟ୍ କଠିଣ ପଥର ବାହାରିଥିବାରୁ ଏହାକୁ ଭେଦ କରି ସୁଡ଼ଙ୍ଗ ଖୋଳିବା ଉଦ୍ଧାରକାରୀ ଦଳ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି । ବୋରୱେଲ ଗର୍ତ୍ତ ନିକଟରେ ଏକ ପୋଖରୀ ଭଳି ୮୦ ଫୁଟ୍ ଗାତ ଖୋଳିବା ପରେ ସେଠାରୁ ସୁଢ଼ଙ୍ଗ ଖୋଳି ରାହୁଲ ପାଖକୁ ପହଞ୍ଚିବାକୁ ଉଦ୍ୟମ କରାଯାଉଛି ।
ସୂଚନାଯୋଗ୍ୟ, ଗତ ଶୁକ୍ରବାର ଅପରାହ୍ଣ ୪ଟାରେ ନିଜ ଘର ବାରିପଟେ ଖେଳୁଥିବା ଏହି ୧୦ ବର୍ଷ ଶିଶୁ ବୋରୱେଲ ପାଇଁ ଖୋଳାଯାଇଥିବା ଗାତରେ ଖସିପଡ଼ି ୮୦ ଫୁଟ୍ ତଳକୁ ଗଳି ଯାଇଥିଲେ । ଆଜିକୁ ୭୭ ଘଣ୍ଟା ଧରି ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଶେଷ ୪ ଫୁଟ୍ ଉଦ୍ଧାରକାରୀ ଦଳଙ୍କୁ ବ୍ୟତିବ୍ୟସ୍ତ କରି ପକାଇଛି । ଶିଶୁଟି ପାଣି କାଦୁଅ ଭିତରେ ଦୀର୍ଘ ଘଣ୍ଟା ଧରି ରହି ନିସ୍ତେଜ ହୋଇ ଯାଇଥିବା ବେଳେ ତାକୁ କିଛି ସମୟ ବ୍ୟବଧାନରେ କଦଳି ଖାଇବାକୁ ଦିଆଯାଉଛି । ଉଦ୍ଧାର କରିବା କ୍ଷଣି ତାକୁ ଚିକିତ୍ସା ଯୋଗାଇ ଦେବାକୁ ଏକ ଉଚ୍ଚସ୍ତରୀୟ ମେଡିକାଲ ଟିମ୍ ସେଠାରେ ରହିଥିବା ବେଳେ ଅତ୍ୟାଧୁନିକ ଆମ୍ବୁଲାନ୍ସ ପ୍ରସ୍ତୁତ ରଖାଯାଇଛି । ଛତିଶଗଡ଼ ରାଜ୍ୟର ଜାଞ୍ଜଗିର-ଚାମ୍ପାର ମାଲଖାଦାରୁଆ ଥାନା ଅଧୀନରେ ଥିବା ପିରହ୍ରିଡ ଗାଁର ୧୦ ବର୍ଷର ବାଳକ ରାହୁଲ ଏକ ବୋରୱେଲ ଗର୍ତ୍ତରେ ଗତ ଶୁକ୍ରବାର ଅପରାହ୍ଣ ୪ ଟାରୁ ଖସି ପଡ଼ି ଜୀବନ ସହିତ ସଂଗ୍ରାମ କରୁଛି ।
