ରମାଦେବୀରେ ପଢ଼ୁଥିବା ନିଖୋଜ ଦୁଇ ଦୃଷ୍ଟିହୀନ ଛାତ୍ରୀ ମଥୁରାରୁ ଉଦ୍ଧାର

ଭୁବନେଶ୍ୱର: ରମାଦେବୀ ବିଶ୍ୱ ବିଦ୍ୟାଳୟରୁ ନିଖୋଜ ଥିବା ଦୁଇ ଦୃଷ୍ଟିହୀନ ଛାତ୍ରୀଙ୍କୁ ଆଜି ଉତ୍ତରପ୍ରଦେଶର ମଥୁରାରୁ ଉଦ୍ଧାର କରାଯାଇଛି । ମଥୁରା ଷ୍ଟେସନ୍ ନିକଟରୁ ଆର୍‌ପିଏଫ୍ ସହଯୋଗରେ ତାଙ୍କୁ ଉଦ୍ଧାର କରାଯାଇଥିବା ସୂଚନା ମିଳିଛି । ତେବେ ଛାତ୍ରୀ ଦୁଇଜଣ ଗତକାଲି ଦିନ ଦ୍ୱିପ୍ରହରରୁ ନିଖୋଜ ହୋଇଥିବା ବେଳେ ସେମାନଙ୍କ ପରିବାର ପକ୍ଷରୁ ସହିଦନଗର ଥାନାରେ ଏତଲା ଦିଆଯାଇଥିଲା । ସେମାନଙ୍କୁ ଅପହରଣ କରାଯାଇଥିବା ନେଇ ଯେଉଁ ସନ୍ଦେହ କରାଯାଉଥିବା ତାହା ଭୁଲ୍ ପ୍ରମାଣିତ ହୋଇଛି । ଛାତ୍ରୀ ଦୁଇଜଣ ଉଦ୍ଧାର ହେବା ପରେ ମଥୁରା ପୁଲିସ୍ ସହ ଯୋଗାଯୋଗ କରି ତାଙ୍କୁ ଓଡ଼ିଶା ଆଣିବା ପାଇଁ ବ୍ୟବସ୍ଥା କରାଯାଉଥିବା ସହିଦନଗର ପୁଲିସ୍ ପକ୍ଷରୁ ସୂଚନା ଦିଆଯାଇଛି । ଛାତ୍ରୀ ଦୁଇଜଣଙ୍କ ମୋବାଇଲ୍‌ର ଅଡ଼ିଓ ବାର୍ତ୍ତାଳପ ଓ ମୋବାଇଲ୍‌କୁ ଟ୍ରାକିଂ କରି ତାଙ୍କୁ ମଥୁରାରେ ଆର୍‌ପିଏଫ୍ ସହାୟତାରେ ଟ୍ରେସ୍ କରାଯାଇଥିଲା । ତେବେ ସେମାନଙ୍କୁ ଅପହରଣ କରାଯାଇ ନାହିଁ ବରଂ ଠାକୁରଙ୍କ ସାନିଧ୍ୟ ପାଇବା ପାଇଁ ସେମାନେ ମଥୁରା ଚାଲି ଯାଇଥିଲେ ବୋଲି ଅଡ଼ିଓ ବାର୍ତ୍ତାରୁ ସ୍ପଷ୍ଟ ହୋଇଛି ।।