ମହାନଦୀ ଜଳ ବିବାଦ ସମ୍ପର୍କରେ ଛତିଶଗଡ଼ ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ଉପରେ ବିଜେଡିର ପ୍ରତିକ୍ରିୟା
ମହାନଦୀ ଜଳ ବିବାଦ କୌଣସି ବିବାଦ ନୁହେଁ ବୋଲି ଛତିଶଗଡ଼ ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ଗ୍ରହଣୀୟ ନୁହେଁ
ମହାନଦୀ ଜଳ ବିବାଦର ସୃଷ୍ଟିକର୍ତ୍ତା ହେଉଛି ଛତିଶଗଡ଼ ରାଜ୍ୟ
ପୋଲାଭରମ ଓ ଏମଏମଡିଆର ପରି ମହାନଦୀ ପ୍ରସଙ୍ଗରେ, ଓଡ଼ିଶାର ସ୍ୱାର୍ଥ ସହିତ ସାଲିସ ନହେଉ
ଭୁବନେଶ୍ୱର: ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁଦେଓ ସାଏଙ୍କ ଦୁଇ ଦିନିଆ ଓଡିଶା ଗସ୍ତ ଅବସରରେ ମହାନଦୀ ଜଳ ବିବାଦ କୌଣସି ବିବାଦ ନୁହେଁ ବୋଲି ଦେଇଥିବା ମନ୍ତବ୍ୟ ଉପରେ ବିଜୁ ଜନତା ଦଳ କଡା ପ୍ରତିକ୍ରିୟା ପ୍ରକାଶ କରିଛି । ଛତିଶଗଡ଼ ରାଜ୍ୟ ମହାନଦୀ ଜଳ ବିବାଦର ସୃଷ୍ଟିକର୍ତ୍ତା ହୋଇଥିବା ବେଳେ ଓ ଦୀର୍ଘ ଦିନ ଧରି ଏହି ବିବାଦର ସମାଧାନ ପାଇଁ ଟ୍ରିବୁ୍ୟନାଲରେ ଲଢେଇ ଜାରି ରହିଥିବା ବେଳେ, ଏହା କୌଣସି ବିବାଦ ନୁହେଁ ବୋଲି ଦେଇଥିବା ମନ୍ତବ୍ୟ, ସ୍ୱାଭାବିକ ଭାବେ ରାଜ୍ୟବାସୀଙ୍କ ମନରେ ସନେ୍ଦହ ସୃଷ୍ଟି ହୋଇଛି । ଓଡିଶା ସରକାର ରାଜ୍ୟର ସ୍ୱାର୍ଥ ସହିତ ସାଲିସ କରିବେ ନାହିଁ ତ ବୋଲି ସନେ୍ଦହ ଉପୁଜିଛି ବୋଲି ବିଜେଡି କହିଛି ।
ବିଜୁ ଜନତା ଦଳ ତରଫରୁ ଜାରି କରା ଯାଇଥିବା ଏକ ପ୍ରେସ ବିବୃତିରେ, ପୂର୍ବତନ ମନ୍ତ୍ରୀ ତଥା ଦଳର ଉପସଭାପତି ଶ୍ରୀ ପ୍ରତାପ ଜେନା କହିଛନ୍ତି, ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁଦେଓ ସାଏଙ୍କ ଓଡିଶା ଗସ୍ତ ଓ ପ୍ରଭୁ ଜଗନ୍ନାଥଙ୍କ ଦର୍ଶନ କାର୍ଯ୍ୟକ୍ରମ ସ୍ୱାଗତଯୋଗ୍ୟ । କିନ୍ତୁ, ମହାନଦୀ ଜଳ ବିବାଦ କୌଣସି ବିବାଦ ନୁହେଁ ବୋଲି ସେ ଦେଇଥିବା ମନ୍ତବ୍ୟ ଗ୍ରହଣୀୟ ନୁହେଁ । ବାସ୍ତବରେ, ମହାନଦୀ ଜଳ ବିବାଦର ସୃଷ୍ଟିକର୍ତ୍ତା ହେଉଛି ଛତିଶଗଡ଼ । ବେଆଇନ ଭାବେ ମହାନଦୀର ଉପର ମୁଣ୍ଡରେ ଛତିଶଗଡ଼ ଦ୍ୱାରା ଅନେକ ବ୍ୟାରେଜ ନିର୍ମାଣ ଯୋଗୁ ଓଡ଼ିଶାର ମହାନଦୀରେ ଜଳ ସଙ୍କଟ ଦେଖା ଦେଇଛି । ଏହି ବିବାଦର ସମାଧାନ ପାଇଁ ସର୍ବୋଚ୍ଚ ନ୍ୟାୟାଳୟର ନିଦେ୍ର୍ଦଶ କ୍ରମେ ଟ୍ରିବୁ୍ୟନାଲ ଗଠନ ହୋଇ ଏହାର ବିଚାର ଚାଲିଛି । ଛତିଶଗଡ଼ ଦ୍ୱାରା ନିର୍ମାଣ ହୋଇଥିବା ବ୍ୟାରେଜ ଗୁଡିକୁ ବେଆଇନ ଘୋଷଣା କରାଯାଉ ବୋଲି ଓଡିଶା ଦାବି କରି ଆସୁଛି । ରାଜ୍ୟରେ ବିଜେପି ସରକାର କ୍ଷମତାସୀନ ହେବା ପରଠାରୁ ବିଜେପି ନେତା ମାନେ ଆପୋଷ ଆଲୋଚନା ମାଧ୍ୟମରେ ଏହାର ସମାଧାନ ପାଇଁ ଯୁକ୍ତି ବାଢୁଛନ୍ତି । କିନ୍ତୁ, କେଉଁ ଆଧାରରେ ଆପୋଷ ଆଲୋଚନା ହେବ ସେନେଇ କୌଣସି ସ୍ପଷ୍ଟୀକରଣ ଦିଆଯାଇ ନାହିଁ । ସମାଧାନର ରାସ୍ତା ବାହାର କରିବା ସମୟରେ ଓଡ଼ିଶାର ସ୍ୱାର୍ଥ ହାନୀ ହେବ ନାହିଁ ତ ବୋଲି ଜନସାଧାରଣଙ୍କ ମଧ୍ୟରେ ସନେ୍ଦହ ଉପୁଜିଛି ।
ଶ୍ରୀ ଜେନା କହିଥିଲେ, ଏହି ପରିପ୍ରେକ୍ଷୀରେ, ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁଦେଓ ସାଏ ଦୀର୍ଘ ଦିନର ଏହି ବିବାଦକୁ ଏହା କୌଣସି ବିବାଦ ନୁହେଁ ବୋଲି ମନ୍ତବ୍ୟ ଦେବା ବୁଦ୍ଧିଜୀବୀ ମହଲକୁ ଆଶ୍ଚର୍ଯ୍ୟ କରିଛି । ଶ୍ରୀ ସାଏଙ୍କ ମନ୍ତବ୍ୟରୁ ଓଡ଼ିଶା ସରକାରଙ୍କ ଦ୍ୱାରା ଓଡ଼ିଶାର ସ୍ୱାର୍ଥ ସହିତ ସାଲିସ କରାଯାଉଥିବା ନେଇ ସନେ୍ଦହ ପ୍ରକାଶ ପାଇଛି । ଡବଲ ଇଞ୍ଜିନ ସରକାର କଥା କୁହାଯାଇଥିଲା, ଏବେ ଟ୍ରିପଲ ଇଞ୍ଜିନ ସରକାର ଅଛି । କିନ୍ତୁ, ବିଜେପି ସରକାରକୁ ଆସିବାର ଅଢେଇ ବର୍ଷ ବିତି ଯାଇଥିଲେ ମଧ୍ୟ ମହାନଦୀ ସମସ୍ୟା ଯେଉଁଠି ଥିଲା ସେଇଠି ଅଛି । ଅପରପକ୍ଷରେ, ଓଡ଼ିଶାର ସ୍ୱାର୍ଥ ସହିତ ସାଲିସ ହେବା ନେଇ ଏବେ ସନେ୍ଦହ ପ୍ରକାଶ ପାଇଛି । ପୋଲାଭରମ ପ୍ରକଳ୍ପରେ ଓଡ଼ିଶାର ସ୍ୱାର୍ଥକୁ ଅଣଦେଖା କରାଗଲା, ଏମଏମଡିଆର ସଂଶୋଧନ ଆଇନ ମାଧ୍ୟମରେ ଓଡ଼ିଶାର ସ୍ୱାର୍ଥକୁ ବଳି ଦିଆଗଲା । ଏବେ, ମହାନଦୀର ପାଳି । ଅଣମୌସୁମୀ ସମୟରେ ଓଡିଶାକୁ ଆବଶ୍ୟକ ହେଉଥିବା ଜଳ ମିଳିବା ନେଇ ନିଶ୍ଚିତ ହେବା ଓ ଛତିଶଗଡ଼ ଦ୍ୱାରା ତିଆରି କରା ଯାଇଥିବା ବ୍ୟାରେଜ ଗୁଡିକୁ ବେଆଇନ ଘୋଷଣା ହେବା ପାଇଁ ବିଜେଡି ଦାବି କରି ଆସୁଥିଲା । ଓଡ଼ିଶାର ସ୍ୱାର୍ଥ ସହିତ ସାଲିସ ହେଲେ, ବିଜେଡି ରାଜରାସ୍ତାକୁ ଓହ୍ଲାଇବ ବୋଲି ଶ୍ରୀ ଜେନା ଚେତାବନୀ ଦେଇଛନ୍ତି ।
