ଆଇଜାୱଲ : ମିଜୋରାମ ବିଧାନସଭା ନିର୍ବାଚନ ପାଇଁ କଂଗ୍ରେସ ନିଜର ଘୋଷଣାପତ୍ର ଜାରି କରିଛି । ଏଥିରେ କୁହାଯାଇଛି ଯେ, ଯଦି ରାଜ୍ୟରେ ଦଳ କ୍ଷମତାକୁ ଆସେ ତେବେ ୭୫୦ ଟଙ୍କାରେ ଏଲପିଜି ସିଲିଣ୍ଡରର ସୁବିଧା, ମାସକୁ ୨ ହଜାର ଟଙ୍କା ବାର୍ଦ୍ଧକ୍ୟ ଭତ୍ତା, ୧୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମା କଭରେଜ ଏବଂ ଅନ୍ୟାନ୍ୟ କଲ୍ୟାଣକାରୀ ଯୋଜନା ଯୋଗାଇ ଦିଆଯିବ। ଏଥିରେ କୁହାଯାଇଛି ଯେ, କଂଗ୍ରେସ ଦଳ ଏକ ସରକାର ଗଠନ କରିବ ଯାହା କାର୍ଯ୍ୟକ୍ଷମ, ସ୍ୱଚ୍ଛ ଏବଂ ଦୁର୍ନୀତିରୁ ମୁକ୍ତ ହେବ । ମିଜୋରାମ ପ୍ରଦେଶ କଂଗ୍ରେସ କମିଟି (ଏମପିସିସି)ର ମୁଖ୍ୟ ପ୍ରବକ୍ତା ରୋନାଲ୍ଡ ସାପା ତଲାଇ ସୋମବାର ଏହି ସୂଚନା ଦେଇଛନ୍ତି ।କଂଗ୍ରେସ ତାର ଘୋଷଣାପତ୍ରରେ କହିଛି ଯେ, ରାଜ୍ୟରେ କନେକ୍ଟିଭିଟି, ବିମାନବନ୍ଦର ଓ ବିଦ୍ୟୁତ ଇତ୍ୟାଦି ଉନ୍ନତ ଭିତ୍ତିଭୂମି ବିକାଶ ପାଇଁ କାମ କରିବ । ଏହା ବ୍ୟତୀତ କଂଗ୍ରେସ କୃଷକ ଏବଂ ଉଦ୍ୟୋଗୀମାନଙ୍କୁ ନିରନ୍ତର ଅର୍ଥନୈତିକ ବିକାଶ ପାଇଁ ସକ୍ଷମ କରିବାକୁ କଂଗ୍ରେସ ସରକାର ଷ୍ଟାର୍ଟଅପ ପାଣ୍ଠି ବ୍ୟବସ୍ଥା ସହିତ ଯୁବା ମିଜୋ ଉଦ୍ୟୋଗୀ କାର୍ଯ୍ୟକ୍ରମ ପ୍ରତିଷ୍ଠା କରିବ । ଏହା ସହିତ ଦଳ ମିଜୋରାମର ଯୁବକମାନଙ୍କ ପାଇଁ ଏକ ଲକ୍ଷ ନିଯୁକ୍ତି ସୃଷ୍ଟି କରିବାକୁ ଲକ୍ଷ୍ୟ ରଖିଛି । କଂଗ୍ରେସ କହିଛି ଯେ, ଯେଉଁ ପରିବାରରେ କୌଣସି ସରକାରୀ କର୍ମଚାରୀ ନାହାଁନ୍ତି ସେମାନଙ୍କ ପାଇଁ ଆମ ଦଳ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମା କଭରେଜକୁ ସମର୍ଥନ କରିବ । ଆହୁରି ମଧ୍ୟ କୁହାଯାଇଛି ଯେ, ଦଳ ଅସାଧ୍ୟ ରୋଗୀଙ୍କ ପାଇଁ ୫ କୋଟି ଟଙ୍କା ବଜେଟ ମଧ୍ୟ ରଖିବ । ବାର୍ଦ୍ଧକ୍ୟ ଭତ୍ତା ମାସକୁ ଦୁଇ ହଜାର ଟଙ୍କାକୁ ବୃଦ୍ଧି କରାଯିବ । ଏଏଓ୍ବାଇ ଏବଂ ପିଏଚଏଚ କାର୍ଡ ଧାରକ ଏବଂ ମହିଳା ମୁଖ୍ୟ ପରିବାରଗୁଡିକୁ ମଧ୍ୟ ପ୍ରତି ସିଲିଣ୍ଡର ପିଛା ୭୫୦ ଟଙ୍କା ମୂଲ୍ୟରେ ସବସିଡିଯୁକ୍ତ ଏଲପିଜି ଗ୍ୟାସ ଯୋଗାଇ ଦିଆଯିବ ବୋଲି ଘୋଷଣାପତ୍ରରେ କୁହାଯାଇଛି ।
ମିଜୋରାମ ବିଧାନସଭା ନିର୍ବାଚନ: ଘୋଷଣାପତ୍ର ଜାରି କଲା କଂଗ୍ରେସ, ଜାଣନ୍ତୁ ଏଥିରେ କ’ଣ ରହିଛି?
