ଜଗନ୍ନାଥପ୍ରସାଦ : ଜଗନ୍ନାଥପ୍ରସାଦ ଥାନା ଜିରାବାଡ଼ି ପଞ୍ଚାୟତ ଲେପା ଗ୍ରାମ ଜଣେ ଦିବ୍ୟାଙ୍ଗୁ ପୁଅ ନିଖୋଜ ହୋଇଯାଇଥିବାରୁ ବାପା-ମାଆ ତା’ ଫେରିବା ବାଟକୁ ଅନାଇ ରହିଛନ୍ତି । ଗ୍ରାମର ବିଜୟ ନାଇକ ଓ କୁନି ନାଇକଙ୍କ ଦ୍ୱିତୀୟ ପୁତ୍ର ପବିତ୍ର । ଜନ୍ମରୁ ସେ ଦିବ୍ୟାଙ୍ଗ । ପବିତ୍ରଙ୍କ ବାପା ବିଜୟ ଓ ମା ଦୁଇ ଜଣ ଦିନ ମଜୁରିଆ । ପବିତ୍ରଙ୍କୁ ପାଠ ପଢ଼ାଇବା ତାଙ୍କ ପକ୍ଷେ ସମ୍ଭବ ନୁହଁ । ମାସିକ ୫୦୦ ଟଙ୍କା ଭତ୍ତାରେ ପବିତ୍ରଙ୍କ ଦିନ କଟୁଥିଲା । କିନ୍ତୁ ଗତ ୩ ତାରିଖରୁ ସେ ନିଖୋଜ ଥିବା ଜଣାପଡ଼ିଛି । ଗତ ୩ ତାରିଖରେ ପବିତ୍ରଙ୍କ ବାପା ଓ ମା କାମ କରିବାକୁ ପାଖ ଗାଁ କୁ ଯାଇଥିଲେ । ସନ୍ଧ୍ୟାରେ ଫେରିବା ବେଳକୁ ପବିତ୍ର ଘରକୁ ଫେରିନଥିବା ସାନପୁଅ ଜଣାଇଥିଲେ । ପରେ ଆଖପାଖ ଅଞ୍ଚଳରେ ଖୋଜା ଖୋଜି କରିଥିଲେ ।
ପବିତ୍ରଙ୍କ ଦୁଇ ଭାଇ ଓ ଦୁଇ ଭଉଣୀ ଅଛନ୍ତି । ବଡ଼ ଭାଇ ଓ ଭଉଣୀ ବାହା ହୋଇସାରିଥିବା ବେଳେ ସାନ ଭଉଣୀ ଓ ଭାଇ ସହ ପବିତ୍ର ଓ ତାଙ୍କ ବାପା ମା ରହୁଥିଲେ । ତେବେ ପବିତ୍ରଙ୍କ ଏଭଳି ଅଚାନକ ନିଖୋଜ ହୋଇଯିବା ଘଟଣାକୁ ନେଇ ପରିବାର ଲୋକ ଚିନ୍ତାରେ ପଡିଯାଇଛନ୍ତି । ପବିତ୍ରଙ୍କ ଖୋଜଖବର ନ ପାଇବା ପରେ ଜଗନ୍ନାଥପ୍ରସାଦ ଥାନାରେ ଅଭିଯୋଗ କରିଛନ୍ତି ପବିତ୍ରଙ୍କ ବାପା । ତଥାପି ନିଖୋଜ ହେବାର ୮ ଦିନ ହୋଇଥିଲେ ମଧ୍ୟ ତାଙ୍କର କୌଣସି ପତ୍ତା ପାଉନି ପୋଲିସ । ଶେଷରେ ଆଜି ପବିତ୍ରଙ୍କ ବାପା ଓ ମାଆ ଗଣମାଧ୍ୟମର ସାହାରା ନେଇଛନ୍ତି । ତାଙ୍କ ପୁଅ ପବିତ୍ରଙ୍କୁ ଖୋଜି ବାହାର କରିବା ପାଇଁ ଗାଣମାଧ୍ୟମ ଜରିଆରେ ଅନୁରୋଧ କରିଛନ୍ତି ।
ନିଖୋଜ ଥିବା ସମୟରେ ପବିତ୍ରଙ୍କ ବୟସ ୧୫ ବର୍ଷ, ଶରୀର ରଙ୍ଗ କଳା, ଉଚ୍ଚତା ପ୍ରାୟ ୫ ଫୁଟ ଓ ଘରୁ ଗଲା ବେଳେ ନାଲି ରଙ୍ଗର ଟି-ସାର୍ଟ ସହ କଳା ପ୍ୟାଣ୍ଟ ପିନ୍ଧିଥିଲେ । ଯଦି କେହି ସହୃଦୟ ବ୍ୟକ୍ତି ପବିତ୍ରଙ୍କ ସନ୍ଧାନ ପାଆନ୍ତି କିମ୍ବା କୌଣସି ଜାଗାରେ ଦେଖନ୍ତି, ତେବେ ସ୍ଥାନୀୟ ଥାନାରେ ଖବର ଦେବା ସହ ପବିତ୍ରଙ୍କ ବାପାଙ୍କ ମୋବାଇଲ ନମ୍ବର ୬୩୦୯୨୬୫୮୪୪ରେ ଜଣାଇବାକୁ ସେ ଅନୁରୋଧ କରିଛନ୍ତି । ତେବେ ନିଖୋଜ ପବିତ୍ରଙ୍କ ବାପା ବିଜୟ ନାଇକଙ୍କ ଅଭିଯୋଗ ଅନୁସାରେ ପୋଲିସ ଅନୁସନ୍ଧାନ ଚଳାଇଛି ।
