ଲାହୋର: ଗୁରୁ ନାନକଙ୍କ ଜନ୍ମବାର୍ଷିକୀ ଉପଲକ୍ଷେ ପାକିସ୍ତାନ ଗସ୍ତରେ ଯାଇଥିବା ଭାରତୀୟ ଶିଖ୍ ପରିବାର ସେଠାରେ ଲୁଟ୍ର ଶିକାର ହୋଇଥିବା ଜଣାପଡିଛି । ଭାରତରୁ ଯାଇଥିବା କନ୍ୱଲଜିତ ସିଂହଙ୍କ ପରିବାର ବୁଧବାର କିଣାକିଣି ପାଇଁ ଲାହୋର ସହରର ଲିବର୍ଟି ମାର୍କେଟ ଯାଇଥିଲେ ।
ଗୋଟିଏ ଦୋକାନରୁ ବାହାରିବା ସମୟରେ ପାକିସ୍ତାନ ପୁଲିସର ୟୁନିଫର୍ମ ପିନ୍ଧିଥିବା ଦୁଇଜଣ ବ୍ୟକ୍ତି ସେମାନଙ୍କୁ ଅଟକାଇବା ସହ ବନ୍ଧୁକମୂନରେ ସ୍ୱର୍ଣ୍ଣାଳଙ୍କାର ଓ ନଗଦ ଟଙ୍କା (ପ୍ରାୟ ୪ ଲକ୍ଷ) ଲୁଟିନେଇଥିବା ଅଭିଯୋଗ ହୋଇଛି । ସ୍ଥାନୀୟ ଲୋକଙ୍କ ସହାୟତାରେ କନ୍ୱଲଜିତ ନିକଟସ୍ଥ ଥାନାରେ ପହଞ୍ଚି ଏତଲା ଦାଏର କରିଥିଲେ । ଅଭିଯୁକ୍ତଙ୍କୁ ଧରିବାକୁ ପୁଲିସ ସେହି ମାର୍କେଟର ସିସିଟିଭି ଫୁଟେଜ ଯାଞ୍ଚ କରୁଛି ।
