ନ୍ୟୁୟର୍କ: ଜିମ୍ବାୱେବାସୀ ସମଗ୍ର ବିଶ୍ବରେ ସବୁଠାରୁ ଅଧିକ ଦୁଃଖୀ ବୋଲି ଖ୍ୟାତନାମା ଅର୍ଥନୀତିଜ୍ଞ ଷ୍ଟିଭ୍ ହାନ୍କେ୍ସଙ୍କ ତରଫରୁ ଜାରି ଏକ ରିପୋର୍ଟରେ ଦର୍ଶାଯାଇଛି। ଜିମ୍ବାୱେରେ ଦରଦାମ୍ ବୃଦ୍ଧି ଅନିୟନ୍ତ୍ରଣ ଅବସ୍ଥାକୁ ଚାଲି ଆସିଥିବାରୁ ଏଠାକାର ନାଗରିକ ବହୁତ କଷ୍ଟରେ ଜୀବନ ନିର୍ବାହ କରୁଥିବା ରିପୋର୍ଟରେ ଦର୍ଶାଯାଇଛି।
ନ୍ୟୁୟର୍କ ପୋଷ୍ଟରେ ପ୍ରକାଶିତ ଖବର ଅନୁଯାୟୀ ଯୁଦ୍ଧଗ୍ରସ୍ତ ୟୁକ୍ରେନ୍, ସୁଦାନ, ସିରିୟା ଆଦି ଦେଶକୁ ପଛରେ ପକାଇ ଜିମ୍ବାୱେ ସବୁଠାରୁ ଦୁଃସ୍ଥ ରାଷ୍ଟ୍ରର ମାନ୍ୟତା ପାଇଛି। ମୋଟ୍ ୧୫୭ଟି ଦେଶର ଆର୍ଥିକ ସ୍ଥିତିକୁ ନେଇ ଏହି ରିପୋର୍ଟ ପ୍ରସ୍ତୁତ କରାଯାଇଥିଲା।
ପ୍ରକାଶିତ ରିପୋର୍ଟ ଅନୁଯାୟୀ ଗତବର୍ଷ ଜିମ୍ବାୱେରେ ମୁଦ୍ରାସ୍ଫୀତି ୨୪୩.୮% ରହିଥିଲା। ଏଥିସହ ବେରୋଜଗାରୀ, ବିଶ୍ବ ବଜାରରୁ ଜିମ୍ବାୱେ ସରକାର ମାତ୍ରାଧିକ ଋଣ ନେବା, ସାମଗ୍ରିକ ଘରୋଇ ଉତ୍ପାଦ ହ୍ରାସ ଆଦି କାରଣରୁ ଏହି ଦେଶରେ ବାସ କରିବା ସବୁଠାରୁ ଅଧିକ କଷ୍ଟକର ହୋଇପଡ଼ିଛି ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
ସବୁଠାରୁ ଦୁଃସ୍ଥ ପ୍ରଥମ ୧୫ଟି ଦେଶ ମଧ୍ୟରେ ଜିମ୍ବାୱେ ବ୍ୟତୀତ ଭେନିଜୁଏଲା, ସିରିୟା, ଲେବାନନ୍, ସୁଦାନ, ଆର୍ଜେଣ୍ଟିନା, ୟେମେନ୍, ୟୁକ୍ରେନ୍, କ୍ୟୁବା, ତୁର୍କୀ, ଶ୍ରୀଲଙ୍କା, ହାଇତି, ଆଙ୍ଗୋଲା, ଟୋଙ୍ଗା, ଘାନା ରହିଛନ୍ତି। ଅନ୍ୟପକ୍ଷରେ ଏହି ତାଲିକାରେ ସବୁଠାରୁ ସୁଖୀ ଦେଶ ମାନ୍ୟତା ପାଇଛି ସ୍ବିଜରଲାଣ୍ଡ।
ଏହା ପଛକୁ କ୍ରମାନ୍ବୟରେ କୁଏତ, ଆୟର୍ଲାଣ୍ଡ, ଜାପାନ, ମାଲେସିୟା, ତାଇୱାନ, ନାଇଜେର୍, ଥାଇଲାଣ୍ଡ ପ୍ରମୁଖ ରହିଛନ୍ତି। ଏହି ତାଲିକାରେ ଭାରତ ୧୦୩ ନମ୍ବରରେ ରହିଛି। ଭାରତରେ ବେକାରୀଜନିତ ସମସ୍ୟା ରହିଥିବା ରିପୋର୍ଟରେ ଉଲ୍ଲେଖ କରାଯାଇଛି। ତାଲିକାର ୧୩୪ ନମ୍ବରରେ ଆମେରିକା ରହିଛି।
