ଭୁବନେଶ୍ୱର: ଜଣେ ଯୁବକଙ୍କୁ ବହ୍ଲାରେ ପିଟିପିଟି ହତ୍ୟା କରିବା ଅଭିଯୋଗରେ ବୁଧବାର ଖଣ୍ଡଗିରି ଥାନା ପୁଲିସ ସମ୍ପୃକ୍ତ ପରିବା ଦୋକାନୀକୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ହେଲେ ଖଣ୍ଡଗିରି ଥାନା ଅନ୍ତର୍ଗତ ଉଦୟଶ୍ରୀ ବିହାରରେ ରହୁଥିବା ନୟାଗଡ଼ ଜିଲ୍ଲା ଶରଣକୂଳ ଥାନା ଶିଖରପୁରର ଗଣେଷ ବ୍ୟାରଡ(୩୩) । ଆକ୍ରମଣର ଶିକାର ହୋଇ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିବା ବ୍ୟକ୍ତି ଜଣକ ହେଲେ ଖଣ୍ଡଗିରି ଥାନା ଅନ୍ତର୍ଗତ ପାତ୍ରପଡା ପ୍ଲଟ୍ ନଂ-୧୭୬ରେ ରହୁଥିବା ଅକ୍ଷୟ ପ୍ରଧାନ(୪୨) । ଏ ନେଇ ଅକ୍ଷୟଙ୍କ ସ୍ତ୍ରୀ’ ଶଶିରେଖା ଖଣ୍ଡଗିରି ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ପ୍ରଥମେ ହତ୍ୟା ଉଦ୍ୟମ ମାମଲା ରୁଜୁ କରି ଘଟଣାର ତଦନ୍ତ କରିଥିଲା । ପରେ ହତ୍ୟା ମାମଲା ରୁଜୁ କରି ବୁଧବାର ଅଭିଯୁକ୍ତ ଗଣେଷକୁ ଗିରଫ କରିଛି ।
ସୂଚନା ଅନୁଯାୟୀ, ଅଭିଯୁକ୍ତ ଗଣେଷର ପାତ୍ରପଡା କ୍ରିଷ୍ଣା ବିହାରରେ ଏକ ପରିବା ଦୋକାନ ଅଛି । ଗତ ୧୦ ତାରିଖ ରାତି ପ୍ରାୟ ୧୦ଟା ବେଳେ ମୃତକ ଅକ୍ଷୟ ପରିବା କିଣିବା ପାଇଁ କ୍ରିଷ୍ଣାବିହାର ଯାଇଥିଲେ । ପରିବା କିଣିବା ସମୟରେ ପରିବା ଦୋକାନୀ ଗଣେଷ ସହ ଦରଦାମକୁ ନେଇ ବଚସା ହୋଇଥିଲା । ବଚସାରୁ କଥା ହାତାହାତି ପର୍ଯ୍ୟନ୍ତ ଯାଇଥିଲା । ଏଥିରେ ଉତ୍କ୍ଷିପ୍ତ ହୋଇ ପରିବା ଦୋକାନୀ ଏକ କାଠ ବହ୍ଲା ଦ୍ୱାରା ଅତି ନିର୍ମମ ଭାବେ ଅକ୍ଷୟଙ୍କୁ ଆକ୍ରମଣ କରିଥିଲେ ।
ଫଳରେ ଅକ୍ଷୟ ଘଟଣାସ୍ଥଳରେ ଗୁରୁତର ହୋଇପଡ଼ିଥିଲେ । ଗଣେଶ୍ୱର ଆକ୍ରମଣରେ ଅକ୍ଷୟଙ୍କ ମୁଣ୍ଡ ଓ ଛାତିରେ ଗଭୀର କ୍ଷତ ସୃଷ୍ଟି ହେବା ସହ ଘଟଣାସ୍ଥଳରେ ସେ ସଂଜ୍ଞାହିନ ହୋଇପଡିଥିଲେ । ସ୍ଥାନୀୟ ଲୋକେ ଅକ୍ଷୟର ପରିବାର ଲୋକଙ୍କୁ ଖବର ଦେବା ସହ ଚିକିତ୍ସା ପାଇଁ ଭୁବନେଶ୍ୱର ଏମ୍ସ ଡାକ୍ତରଖାନାକୁ ପଠାଇଥିଲେ । ଏମ୍ସରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଚିକିତ୍ସା ପାଇଁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ୮ ଦିନ ମୃତ୍ୟୁ ସହ ସଂଗ୍ରାମ କରି ଗତ ୧୮ତାରିଖରେ ଚିକିତ୍ସାଧୀନ ଅବସ୍ଥାରେ ଅକ୍ଷୟଙ୍କ ମୃତ୍ୟୁ ଘଟିଥିଲା । ଘଟଣା ପରେ ଗଣେଷ ଫେରାର ହୋଇଯାଇଥିଲା । ଡାକ୍ତର ମୃତ ଘୋଷଣା କରିବା ପରେ ପୁଲିସ ଏକ ହତ୍ୟା ମାମଲା ରୁଜୁ କରି ବିଭିନ୍ନ ସ୍ଥାନରେ ଚଢଉ କରି ବୁଧବାର ଅଭିଯୁକ୍ତ ଗଣେଷକୁ କାବୁ କରିବାରେ ସଫଳ ହୋଇଛି ।
