ମୁମ୍ବାଇ: ଗଣତନ୍ତ୍ର ନିର୍ଭିକ ଓ ସ୍ୱାଧୀନ ଗଣମାଧ୍ୟମ ଦ୍ୱାରା ଆଗକୁ ବଢ଼ିଥାଏ । କିନ୍ତୁ ଖବର ସହିତ ବିଚାର ଓ ମତର ମିଶ୍ରଣ ବିପଜ୍ଜନକ କକଟେଲ ବୋଲି ପ୍ରଧାନ ବିଚାରପତି ଏନ.ଭି ରମଣା କହିଛନ୍ତି । ତଥ୍ୟାତ୍ମକ ଖବରର ଅନାବଶ୍ୟକ ବ୍ୟାଖ୍ୟା ଏବଂ ମତକୁ ଯୋଡ଼ିବା ଦ୍ୱାରା ଏହା ବିକୃତ ହୋଇଯାଇଥାଏ ଏବଂ ଏଭଳି ଖବର ବିପଜ୍ଜନକ ବୋଲି ପ୍ରଧାନ ବିଚାରପତି କହିଛନ୍ତି ।
ମୁମ୍ବାଇ ପ୍ରେସକ୍ଲବ ଦ୍ୱାରା ଭର୍ଚୁଆଲ ମାଧ୍ୟମରେ ଆୟୋଜିତ ‘ରେଡ ଇଙ୍କ’ ପୁରସ୍କାର ବିତରଣ କାର୍ଯ୍ୟକ୍ରମରେ ଉଦବୋଧନ ଦେଇ ପ୍ରଧାନ ବିଚାରପତି କହିଛନ୍ତି, ସାମ୍ବାଦିକମାନେ ପ୍ରଭାବିତ ହୋଇ କାମ କଲେ ସେମାନଙ୍କ ଦ୍ୱାରା ପ୍ରସ୍ତୁତ ଖବର ସତ୍ୟର ସ୍ୱରୂପକୁ ଦେଖାଇ ପାରିବ ନାହିଁ । ଗଣମାଧ୍ୟମ ନ୍ୟାୟପାଳିକାକୁ ଖରାପ ଶକ୍ତି କବଳରୁ ରକ୍ଷା କରିବା ଦିଗରେ କାମ କରିବା ଆବଶ୍ୟକ । ଏହାଦ୍ୱାରା ଗଣତାନ୍ତ୍ରିକ ବ୍ୟବସ୍ଥା ଅଧିକ ସୁଦୃଢ଼ ହୋଇପାରିବ ବୋଲି ପ୍ରଧାନ ବିଚାରପତି କହିଛନ୍ତି ।
ସାମ୍ବାଦିକମାନେ ବିଚାରପତିମାନଙ୍କ ଭଳି ନିଜ ବିଚାରଧାରା ଓ ବ୍ୟକ୍ତିଗତ ମତରୁ ଊର୍ଦ୍ଧ୍ୱକୁ ଉଠି କାହାଦ୍ୱାରା ପ୍ରଭାବିତ ନହୋଇ କେବଳ ତଥ୍ୟ ହିଁ ପରିବେଷଣ କରିବା ଉଚିତ ବୋଲି ଜଷ୍ଟିସ ରମଣା କହିଛନ୍ତି । ବିଚାରପତିମାନଙ୍କ ନିଷ୍ପତ୍ତିକୁ ନେଇ ବିଭ୍ରାନ୍ତି ସୃଷ୍ଟି କରିବା ଏବଂ ବିଚାରପତିଙ୍କୁ ଖଳନାୟକ ଭାବେ ଉପସ୍ଥାପନ କରିବା ଭଳି କାମରେ ଲଗାମ ଲାଗିବା ଦରକାର ବୋଲି ସେ କହିଛନ୍ତି ।
