ଆମେରିକା ସହ ଚୁକ୍ତିନାମା ପାଇଁ ସହମତି ପ୍ରକାଶ କଲା ଇରାନ

ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଚାଲିଥିବା ସଂଘର୍ଷ ମଧ୍ୟରେ ଆମେରିକା ପରେ ଇରାନ ମଧ୍ୟ ଶାନ୍ତି ଚୁକ୍ତିକୁ ନିଶ୍ଚିତ କରିଛି । ଇରାନର ଆଇନଗତ ଏବଂ ଆନ୍ତର୍ଜାତୀୟ ବ୍ୟାପାର ଉପ-ବୈଦେଶିକ ମନ୍ତ୍ରୀ କାଜେମ ଘାରିବାବାଦୀ ଆମେରିକା ସହିତ ଶାନ୍ତି ଚୁକ୍ତିକୁ ନିଶ୍ଚିତ କରିଛନ୍ତି । ସେ କହିଛନ୍ତି ଯେ, ତେହେରାନ କେବଳ ଏକ ଚୂଡ଼ାନ୍ତ ଚୁକ୍ତି ପାଇଁ ପ୍ରସ୍ତାବିତ ୬୦-ଦିନିଆ ଆଲୋଚନା ପ୍ରକ୍ରିୟାରେ ଅଂଶଗ୍ରହଣ କରିବ। ତେବେ ଶତ୍ରୁତା ସମାପ୍ତ କରିବା ପାଇଁ ଅବରୋଧ ଉଠାଇବା ଏବଂ ଇରାନ ସମ୍ପତ୍ତି ମୁକ୍ତ କରିବା ପାଇଁ ୱାସିଂଟନଠାରୁ ଆମେ ପ୍ରତିଶ୍ରୁତି ଚାହୁଛୁ ।ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୱାସିଂଟନ ଏବଂ ତେହେରାନ ମଧ୍ୟରେ ଏକ ଶାନ୍ତି ଚୁକ୍ତି ସମାପ୍ତ ହେବା ଏବଂ ହର୍ମୁଜ ପ୍ରଣାଳୀରୁ ଆମେରିକାର ନୌସେନା ଅବରୋଧ ଉଠାଇବା ଘୋଷଣା କରିଛନ୍ତି। ଇରାନର ସରକାରୀ ପ୍ରେସ୍ ଟିଭି ଅନୁଯାୟୀ, ଘାରିବାବାଦି କହିଛନ୍ତି ଯେ, ଶୁକ୍ରବାର ଏହି ଚୁକ୍ତି ସ୍ୱିଜରଲ୍ୟାଣ୍ଡରେ ଆନୁଷ୍ଠାନିକ ଭାବରେ ସ୍ୱାକ୍ଷରିତ ହେବ, ଯାହା ପରେ ଏକ ଡ୍ରାଫ୍ଟ ବୁଝାମଣାପତ୍ର (ଏମ୍ଓୟୁ) ସାର୍ବଜନୀନ କରାଯିବ। ଉଭୟ ପ୍ରତିନିଧିମଣ୍ଡଳର ମୁଖ୍ୟ ଆଲୋଚନା ପାଇଁ ଭବିଷ୍ୟତ ବ୍ୟବସ୍ଥା ବିଷୟରେ ଆଲୋଚନା କରିବେ। ସେ କହିଛନ୍ତି ଯେ ଆଲୋଚନାର ପରବର୍ତ୍ତୀ ପର୍ଯ୍ୟାୟକୁ ଯିବା ପୂର୍ବରୁ, ଇରାନ ଯାଞ୍ଚ କରିବ ଯେ ଆମେରିକା ଯୁଦ୍ଧ ସମାପ୍ତ କରିବା, ଅବରୋଧ ହଟାଇବା ଏବଂ ସମ୍ପତ୍ତି ମୁକ୍ତ କରିବା ସହିତ ଜଡିତ ତାର ଦାୟିତ୍ୱ ପୂରଣ କରିଛି କି ନାହିଁ। ଏହି ବୁଝାମଣାପତ୍ରର ଅର୍ଥ ଶତ୍ରୁ ଉପରେ ବିଶ୍ୱାସ କରିବା ନୁହେଁ। ଆମେ ଆମେରିକା ଦ୍ୱାରା ଦିଆଯାଇଥିବା ପ୍ରତିଶ୍ରୁତିର କାର୍ଯ୍ୟକାରିତା ଉପରେ ନଜର ରଖିବୁ ବୋଲି ସେ କହିଛନ୍ତି ।