କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ପଣାଜୀଠାରେ ଗୋଆ ମୁଖ୍ୟମନ୍ତ୍ରୀ ଡଃ ପ୍ରମୋଦ ସାୱନ୍ତଙ୍କ ସହ ରାଜ୍ୟର ବିଭିନ୍ନ ସମସ୍ୟା ନେଇ ଏକ ସମୀକ୍ଷା ବୈଠକର ଅଧ୍ୟକ୍ଷତା କରିଛନ୍ତି। ଏହି ବୈଠକରେ କେନ୍ଦ୍ର ଗୃହ ସଚିବ, ଗୁଇନ୍ଦା ନିର୍ଦ୍ଦେଶକ ଏବଂ ଗୃହ ମନ୍ତ୍ରଣାଳୟ, ଗୋଆ ସରକାର, ଭାରତୀୟ ତଟରକ୍ଷୀ ବାହିନୀ ଓ ଅନ୍ୟାନ୍ୟ ସମ୍ପୃକ୍ତ ସଂସ୍ଥାର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏହି ବୈଠକରେ କେନ୍ଦ୍ର ଗୃହମନ୍ତ୍ରୀଙ୍କୁ ଗୋଆ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଏବଂ ପୁଲିସ ମହାନିର୍ଦ୍ଦେଶକ ରାଜ୍ୟରେ ଆଇନ ଶୃଙ୍ଖଳା ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ସୂଚନା ଦେଇଥିଲେ। ଏଜେଣ୍ଡାରେ ତିନୋଟି ନୂତନ ନ୍ୟାୟ ସଂହିତାର କାର୍ଯ୍ୟକାରିତା, ଏନଡିପିଏସ, ଉପକୂଳ ସୁରକ୍ଷା, ପଳାତକ ମାମଲା, ବିପର୍ଯ୍ୟୟ ପରିଚାଳନା, ପୋଲିସ ଆଧୁନିକୀକରଣ, ଶତ୍ରୁ ସମ୍ପତ୍ତିର ପରିଚାଳନା ଏବଂ ବେଆଇନ ପ୍ରବାସୀମାନଙ୍କୁ ନିର୍ବାସନ, ବିଶେଷ କରି ଅପରାଧ, ନିଶାଦ୍ରବ୍ୟ ଏବଂ ନିଶା କାରବାର ଅପରାଧରେ ସମ୍ପୃକ୍ତ ବ୍ୟକ୍ତି ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା କରାଯାଇଥିଲା।
ରାଜ୍ୟରେ ଆଇନ ଶୃଙ୍ଖଳା ଏବଂ ଉପକୂଳ ସୁରକ୍ଷା ବଜାୟ ରଖିବା ପାଇଁ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଥିବାରୁ ଶ୍ରୀ ଶାହ ଗୋଆ ସରକାର ଏବଂ ରାଜ୍ୟ ପୋଲିସର ପ୍ରୟାସକୁ ପ୍ରଶଂସା କରିଥିଲେ। ସେ କହିଥିଲେ ଯେ ଏହି ପ୍ରୟାସଗୁଡ଼ିକ ଗୋଆକୁ ‘ନିଶାମୁକ୍ତ’ କରିବା ଏବଂ ସାଇବର ଅପରାଧର ସଫଳତାର ସହ ମୁକାବିଲା କରିବାରେ ସହାୟକ ହୋଇଛି। ଶ୍ରୀ ଶାହ ରାଜ୍ୟ ସରକାର ଏବଂ ସମସ୍ତ ଅଂଶୀଦାରମାନଙ୍କୁ ଉଦୀୟମାନ ସୁରକ୍ଷା ଆହ୍ୱାନ ସମ୍ବନ୍ଧରେ ଏକ ବ୍ୟାପକ ସୁରକ୍ଷା ମୂଲ୍ୟାଙ୍କନ କରିବାକୁ ଅନୁରୋଧ କରିଥିଲେ। ସେ କହିଥିଲେ ଯେ ଗୁରୁତ୍ୱପୂର୍ଣ୍ଣ ଧାରା ଏବଂ ଢାଞ୍ଚା, ବିଭିନ୍ନ ପ୍ରକାରର ଅପରାଧର ଆନ୍ତଃସଂଯୋଗ, ଅପରାଧୀଙ୍କ ଆନ୍ତଃରାଜ୍ୟ ଗତିବିଧି ଏବଂ ଉପକୂଳ ସୁରକ୍ଷା ଉପରେ ନିରନ୍ତର ନଜର ରଖିବା ଆବଶ୍ୟକ। ସେ ଆହୁରି ମଧ୍ୟ କହିଥିଲେ ଯେ ଗୃହ ମନ୍ତ୍ରଣାଳୟ ଏବଂ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ସମସ୍ତ ପଦକ୍ଷେପ ଏହା ସୁନିଶ୍ଚିତ କରିବା ଉଚିତ ଯେ ଗୋଆ ଦେଶରେ ଆଇନ ଶୃଙ୍ଖଳା ଦୃଷ୍ଟିରୁ ଶୀର୍ଷରେ ରହିବ।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ୨୦୪୭ ମସିହା ସୁଦ୍ଧା ଏକ ବିକଶିତ ଭାରତର ଲକ୍ଷ୍ୟକୁ ସାକାର କରିବା ପାଇଁ କ୍ଷୁଦ୍ର ରାଜ୍ୟଗୁଡ଼ିକୁ ସମସ୍ତ ପ୍ରଶାସନିକ ପ୍ରସଙ୍ଗରେ ପୂର୍ଣ୍ଣ ସମର୍ଥନ ଏବଂ ବୃତ୍ତିଗତ ସହାୟତା, କ୍ଷମତା ନିର୍ମାଣ ଏବଂ ବିକାଶ ସମ୍ବନ୍ଧୀୟ ପ୍ରସଙ୍ଗରେ ମୋଦୀ ସରକାର ପ୍ରତିଶ୍ରୁତିବଦ୍ଧ।
ଶ୍ରୀ ଶାହ କହିଛନ୍ତି ଯେ ଗୋଆରେ ଦେଶର ଏକ ଆଦର୍ଶ ରାଜ୍ୟ ହେବାର ପୂର୍ଣ୍ଣ ସମ୍ଭାବନା ରହିଛି ଏବଂ ସୁରକ୍ଷା ତଥା ବିକାଶର ସମସ୍ତ ଲକ୍ଷ୍ୟ ହାସଲ କରି ଏହି ସୁନ୍ଦର ରାଜ୍ୟ ‘ଭାରତ ମାତା କେ ମାଥେ’ ର ବିନ୍ଦିୟା ପରିଣତ ହେବ।
ଗୋଆ ସରକାରଙ୍କ ଅଧିକାରୀମାନେ କେନ୍ଦ୍ର ଗୃହମନ୍ତ୍ରୀଙ୍କୁ ସୂଚନା ଦେଇଥିଲେ ଯେ ରାଜ୍ୟରେ ହିଂସାତ୍ମକ ଅପରାଧରେ ହ୍ରାସ ଧାରା ପରିଲକ୍ଷିତ ହେଉଛି ତେବେ, ସାଇବର ଅପରାଧ, ନିଶାଦ୍ରବ୍ୟ ସମ୍ବନ୍ଧୀୟ ଅପରାଧ ଏବଂ ବିଦେଶୀ ସମ୍ବନ୍ଧୀୟ ଉଲ୍ଲଙ୍ଘନ ଉପରେ ରାଜ୍ୟରେ କଠୋର କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି.. ଗୋଆ ଡିଜିପି ସୂଚନା ଦେଇଛନ୍ତି ଯେ ଉପକୂଳ ସୁରକ୍ଷା, ସାଇବର ଅପରାଧ ଏବଂ ନିଶା କାରବାର ପ୍ରସଙ୍ଗରେ ଗୋଆ ସରକାରଙ୍କ ଦ୍ୱାରା ବ୍ୟାପକ ପଦକ୍ଷେପ ନିଆଯାଉଛି । ଡିଜିପି ଏହା ମଧ୍ୟ ସୂଚନା ଦେଇଛନ୍ତି ଯେ ତିନୋଟି ନୂତନ ନ୍ୟାୟ ସଂହିତା କାର୍ଯ୍ୟକାରୀ ହେବା ପରେ ଏବଂ ଆଇସିଜେଏସର ପ୍ରଭାବୀ କାର୍ଯ୍ୟକାରିତା ପରେ ରାଜ୍ୟରେ ଦୋଷୀ ସାବ୍ୟସ୍ତ ହାର ୨୨ ପ୍ରତିଶତରୁ ୫୩ ପ୍ରତିଶତକୁ ବୃଦ୍ଧି ପାଇଛି । ଅନେକ କ୍ଷେତ୍ରରେ, ଅଦାଲତମାନେ ବର୍ତ୍ତମାନ ୬ ରୁ ୧୮ ମାସ ମଧ୍ୟରେ ଅପରାଧିକ ମାମଲାର ନିଷ୍ପତ୍ତି ନେବାକୁ ସକ୍ଷମ ଅଟନ୍ତି ।
ଗୋଆ ମୁଖ୍ୟମନ୍ତ୍ରୀ ଆଶ୍ୱାସନା ଦେଇଛନ୍ତି ଯେ ଗୋଆକୁ ସମସ୍ତ ଦିଗରେ ଏକ ଆଦର୍ଶ ରାଜ୍ୟ କରିବା ପାଇଁ ରାଜ୍ୟ ସରକାର କେନ୍ଦ୍ର ଗୃହମନ୍ତ୍ରୀଙ୍କ ମାର୍ଗଦର୍ଶନରେ ଏବଂ କେନ୍ଦ୍ର ସରକାରଙ୍କ ସହ ଘନିଷ୍ଠ ସମନ୍ୱୟ ରକ୍ଷା କରି କାର୍ଯ୍ୟ କରିବେ।
ଗୋଆରେ ଆଇନ ଶୃଙ୍ଖଳା ଓ ଉପକୂଳ ସୁରକ୍ଷା ପାଇଁ ରାଜ୍ୟ ସରକାର ଓ ପୋଲିସର ପ୍ରୟାସକୁ ଗୃହମନ୍ତ୍ରୀଙ୍କ ପ୍ରଶଂସା
