ପାକିସ୍ତାନ ବିପକ୍ଷରେ ଭାରତର ପଲା ଭାରି: ସଚିନ

ଅହମ୍ମଦାବାଦ : ୨୦୨୩ ଦିନିକିଆ କ୍ରିକେଟ୍ ବିଶ୍ୱକପରେ ଶନିବାର ଭାରତ ଓ ପାକିସ୍ତାନ ମଧ୍ୟରେ ମୁକାବିଲା ହେବ । ଉଭୟ ଦଳ ମଧ୍ୟରେ ଖେଳାଯାଉଥିବା କ୍ରିକେଟ୍ ମ୍ୟାଚ୍ ଉଭୟ ଦେଶର ପ୍ରଶଂସକଙ୍କ ପାଇଁ ଅଧିକ ଗୁରୁତ୍ୱ ବହନ କରେ । ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତୀୟ କ୍ରିକେଟ୍ ଦଳ ଏବଂ ବାବର ଆଜମଙ୍କ ନେତୃତ୍ୱାଧୀନ ପାକିସ୍ତାନ କ୍ରିକେଟ୍ ଦଳ ଚଳିତ ବିଶ୍ୱକପରେ ବେଶ୍ ଭଲ ପ୍ରଦର୍ଶନ କରିଛନ୍ତି । ଦୁଇଟି ମ୍ୟାଚରେ ଦୁଇଟି ଲେଖାଏଁ ବିଜୟ ସହ ୧୦ ଦଳ ବିଶିଷ୍ଟ ଏହି ପ୍ରତିଯୋଗିତାରେ ଶ୍ରେଷ୍ଠ ତିନି ଦଳ ମଧ୍ୟରେ ରହିଛି । ବର୍ତ୍ତମାନ ସୁଦ୍ଧା ଭାରତ ପାଇଁ ସବୁକିଛି ସକାରାତ୍ମକ ରହିଛି । ବୁଧବାର ଦିନ ଭାରତୀୟ ଅଧିନାୟକ ରୋହିତ ଶର୍ମା ଦ୍ରୁତତମ ବିଶ୍ୱକପ୍ ଶତକ ହାସଲ କରି ନିଜ ଫର୍ମକୁ ଫେରିଛନ୍ତି । ଆଫଗାନିସ୍ତାନ ବିପକ୍ଷରେ ରୋହିତ ଶର୍ମା ମାତ୍ର ୬୩ଟି ବଲ ଖେଳି ଶତକ ଛୁଇଁଥିଲେ । ଅନ୍ୟପଟେ ଯଶପ୍ରୀତ ବୁମ୍ରାଙ୍କୁ ଚାରି ୱିକେଟ୍ ମିଳିଥିଲା । ଏହାପୂର୍ବରୁ ଅଷ୍ଟ୍ରେଲିଆ ବିପକ୍ଷ ପ୍ରଥମ ମ୍ୟାଚରେ ବିରାଟ କୋହଲି ଓ ଲୋକେଶ ରାହୁଲଙ୍କ ଦମଦାର ଅର୍ଦ୍ଧଶତକୀୟ ଇନିଂସ୍ ଦେଖିବାକୁ ମିଳିଥିଲା । ଭାରତୀୟ ସ୍ପିନରମାନେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ । ଭାରତର ଏହି ଫର୍ମ ସଚିନ ତେନ୍ଦୁଲକରଙ୍କୁ ବେଶ୍ ପ୍ରଭାବିତ କରିଛି । ବୁମ୍ରା ଓ ରୋହିତଙ୍କ ଦୁଇଟି ଚମତ୍କାର ପ୍ରଦର୍ଶନକୁ ଯଥାକ୍ରମେ ବୋଲିଂ ଓ ବ୍ୟାଟିଂ ୟୁନିଟ୍ ଭଲ ସହଯୋଗ କରିଛି । ଏହି ୨ଟି ମ୍ୟାଚରେ ଭିନ୍ନ ଭିନ୍ନ ଖେଳାଳି ଯୋଗଦାନ ଦେଇଛନ୍ତି ଏବଂ ଏହା ଅକ୍ଟୋବର ୧୪ ତାରିଖ ପାଇଁ ଭଲ ସ୍ଥିତି ସୃଷ୍ଟି କରିଛି । ଆଗକୁ ଦେଖନ୍ତୁ ଏହା ଭାରତ ପାଇଁ ବିଜୟ ସୃଷ୍ଟି କରିବ ବୋଲି ସଚିନ୍ ପୂର୍ବତନ ଟ୍ୱିଟରରେ ଏକ ପୋଷ୍ଟ କରିଛନ୍ତି ।