ଦୁବାଇ: ଦିନିକିଆ ବିଶ୍ୱକପ୍ରେ ଦମ୍ଦାର ପ୍ରଦର୍ଶନ ପରେ ଭାରତୀୟ ଷ୍ଟାର୍ ବ୍ୟାଟର୍ ବିରାଟ କୋହଲି ଆଇସିସି ର୍ୟାଙ୍କିଙ୍ଗ୍ରେ ଉଲ୍ଲେଖନୀୟ ଅଗ୍ରଗତି କରି ତୃତୀୟ ସ୍ଥାନକୁ ଉଠିଛନ୍ତି । ଟୁର୍ଣ୍ଣାମେଣ୍ଟ୍ରେ କୋହଲିଙ୍କ ୭୬୫ ରନ୍ର ଯୋଗଦାନ ତାଙ୍କୁ ଗୋଟିଏ ସ୍ଥାନର ଲାଭ ପ୍ରଦାନ କରିଛି । ସାଥୀ ଖେଳାଳି ଶୁବମନ ଗିଲ୍ଙ୍କଠାରୁ ସେ ମାତ୍ର ୩୫ ରେଟିଂ ପଏଣ୍ଟ୍ରେ ପଛରେ ରହିଛନ୍ତି । ଗିଲ୍ ଏବେ ବି ଶୀର୍ଷରେ ନିଜ ସ୍ଥିତି ବଜାୟ ରଖିଛନ୍ତି । ଗିଲ୍ଙ୍କ ରେଟିଂ ପଏଣ୍ଟ୍ ୮୨୬ ଥିବାବେଳେ ପାକିସ୍ତାନ ଅଧିନାୟକ ବାବର୍ ଆଜମ୍ ୮୨୪ ପଏଣ୍ଟ୍ ସହ ଦ୍ୱିତୀୟ ସ୍ଥାନରେ ରହିଛନ୍ତି ।
କୋହଲିଙ୍କ ରେଟିଂ ପଏଣ୍ଟ୍ ୭୯୧ ଥିବାବେଳେ ଭାରତୀୟ ଅଧିନାୟକ ରୋହିତ ଶର୍ମା ୭୬୯ ପଏଣ୍ଟ୍ ସହ ଚତୁର୍ଥ ସ୍ଥାନକୁ ଉଠିଛନ୍ତି । କୋହଲିଙ୍କ ଏହି ଉଲ୍ଲେଖନୀୟ ସଫଳତା ମଧ୍ୟରେ ବିଶ୍ୱକପ୍ରେ ତିନିଟି ଶତକ ମଧ୍ୟ ସାମିଲ । ଏହା ସେ ପୂର୍ବରୁ ପୂର୍ବତନ ଭାରତୀୟ ଅଧିନାୟକ ସଚିନ୍ ତେନ୍ଦୁଲକରଙ୍କ ସର୍ବାଧିକ ଦିନିକିଆ ଶତକ ରେକର୍ଡ ମଧ୍ୟ ଅତିକ୍ରମ କରିଥିଲେ । କୋହଲି ଓ ରୋହିତ ବିଶ୍ୱକପ୍ରେ ଯଥାକ୍ରମେ ୬୯୫ ଏବଂ ୫୯୭ ରନ୍ ସହ ସର୍ବାଧିକ ରନ୍ ସଂଗ୍ରହକାରୀ ହୋଇଛନ୍ତି । ସାଉଥ୍ ଆଫ୍ରିକା ଓପ୍ନର୍ କ୍ୱିଣ୍ଟନ୍ ଡି’କକ୍ ବ୍ୟାଟିଂ ର୍ୟାଙ୍କିଙ୍ଗ୍ର ଦୁଇଟି ସ୍ଥାନ ତଳକୁ ଖସି ପଞ୍ଚମରେ ପହଞ୍ଚିଥିବା ବେଳେ ବିଶ୍ୱକପ୍ରେ ୫୫୨ ରନ୍ କରିଥିବା ନ୍ୟୁଜିଲାଣ୍ଡ୍ର ଡାରିଲ୍ ମିଚେଲ୍ ପାଞ୍ଚଟି ସ୍ଥାନର ଉନ୍ନତି ସହିତ ଷଷ୍ଟରେ ପହଞ୍ଚିଛନ୍ତି । ଅନ୍ୟପକ୍ଷରେ ଅଷ୍ଟ୍ରେଲିଆର ଡେଭିଡ୍ ହେଡ୍ ୨୮ ସ୍ଥାନର ଲମ୍ଫ ପ୍ରଦାନ କରି ପଞ୍ଚଦଶ ସ୍ଥାନରେ ପହଞ୍ଚିଛନ୍ତି ।
ବୋଲିଂ ର୍ୟାଙ୍କିଙ୍ଗ୍ରେ ସାଉଥ୍ ଆଫ୍ରିକା ସ୍ପିନର୍ କେଶବ ମହାରାଜ ଶୀର୍ଷରେ ରହିଛନ୍ତି । ଭାରତୀୟ ବୋଲର୍ଙ୍କ ମଧ୍ୟରେ ମହମ୍ମଦ ସିରାଜ୍ (ତୃତୀୟ) ଏବଂ ଜସ୍ପ୍ରୀତ୍ ବୁମ୍ରା (ଚତୁର୍ଥ) ଶୀର୍ଷ ୧୦ରେ ସ୍ଥିର ରହିଛନ୍ତି । ସାଥୀ ସ୍ପିନର୍ କୁଲଦୀପ ଯାଦବ ଗୋଟିଏ ସ୍ଥାନର କ୍ଷତି ସହ ଷଷ୍ଠ ସ୍ଥାନକୁ ଖସିଆସିଛନ୍ତି । ଅଭିଜ୍ଞ ଅଷ୍ଟ୍ରେଲୀୟ ଫାଷ୍ଟ୍ ବୋଲର୍ ଜୋସ୍ ହାଜେଲ୍ଉଡ୍ ୪ଟି ସ୍ଥାନ ଉପରକୁ ଉଠି ଦ୍ୱିତୀୟ ସ୍ଥାନରେ ଥିବା ବେଳେ ମିଚେଲ୍ ଷ୍ଟାର୍କ ୮ଟି ସ୍ଥାନର ଉନ୍ନତି ସହ ଦ୍ୱାଦଶ ଏବଂ ଅଧିନାୟକ ପ୍ୟାଟ୍ କମିନ୍ସ ୭ଟି ସ୍ଥାନ ଉପରକୁ ଉଠି ୨୭ତମ ସ୍ଥାନରେ ପହଞ୍ଚିଛନ୍ତି । ତେବେ ଅଲ୍ରାଉଣ୍ଡ୍ର ର୍ୟାଙ୍କିଙ୍ଗ୍ର ଶୀର୍ଷ ୧୦ରେ ବିଶେଷ ପରିବର୍ତ୍ତନ ହୋଇନଥିବା ବେଳେ ବାଂଲାଦେଶର ସାକିବ୍ ଅଲ୍ ହସନ୍ ଶୀର୍ଷରେ କାଏମ ରହିଛନ୍ତି । ନ୍ୟୁଜିଲାଣ୍ଡର ମିଚେଲ୍ ସାଣ୍ଟନର୍ ଦୁଇଟି ସ୍ଥାନ ତଳକୁ ଖସି ସପ୍ତମ ଏବଂ ବାଂଲାଦେଶର ମେହେ ହାସନ୍ ମିରାଜ୍ ଦୁଇଟି ସ୍ଥାନ ଉପରକୁ ଉଠି ନବମରେ ରହିଛନ୍ତି ।
