ନୂଆଦିଲ୍ଲୀ: ଚଳିତ ଆଇପିଏଲ୍ରେ ଶନିବାର ସଂସ୍କରଣର ୪୦ତମ ମ୍ୟାଚ୍ ଘରୋଇ ଦିଲ୍ଲୀ କ୍ୟାପିଟାଲ୍ସ ଓ ଭ୍ରମଣକାରୀ ସନ୍ରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯାଇଛି । ଏଥିରେ ହାଇଦ୍ରାବାଦ ୯ ରନ୍ରେ ବିଜୟୀ ହୋଇ ପ୍ରଥମ ପର୍ଯ୍ୟାୟରେ ବରଣ କରିଥିବା ପରାଜୟର ପ୍ରତିଶୋଧ ନେଇଛି । ପ୍ରଥମେ ବ୍ୟାଟିଂ କରି ହାଇଦ୍ରାବାଦ ୬ ୱିକେଟ୍ରେ ୧୯୭ ରନ୍ କରିଥିବା ବେଳେ ଜବାବରେ ଦିଲ୍ଲୀ ୬ ୱିକେଟ୍ ବିନିମୟରେ ୧୮୮ ରନ୍ କରିଥିଲା । ଫଳରେ ସଂସ୍କରଣରେ ହାଇଦ୍ରାବାଦ ତା’ର ଅଷ୍ଟମ ମ୍ୟାଚ୍ରେ ତୃତୀୟ ବିଜୟ ହାସଲ କରିଛି ।
ହାଇଦ୍ରାବାଦ ପକ୍ଷରୁ ଓପନର ଅଭିଷେକ ଶର୍ମା ମାତ୍ର ୩୬ ବଲ୍ ଖେଳି ୧୨ଟି ଚୌକା ଓ ଗୋଟିଏ ଛକା ଜରିଆରେ ୬୭ ରନ୍ କରିଥିବା ବେଳେ ହେନ୍ରିକ୍ କ୍ଲାସେନ୍ ଅପରାଜିତ ୫୩ ରନ୍ କରିଥିଲେ । ତାଙ୍କର ଏହି ଧୂଆଁଧାର ଇନିଂସ ପାଇଁ କ୍ଲାସେନ୍ ମାତ୍ର ୨୭ ବଲ୍ ଖେଳିବା ସହ ୨ଟି ଚୌକା ଓ ୪ଟି ଛକା ଲଗାଇଥିଲେ । ଆହୁରି ଅବଦୁଳ୍ ସମଦ୍ ଗୋଟଏ ଚୌକା ଓ ୨ଟି ଛକା ସହ ୨୮ ଏବଂ ଅକିଲ୍ ହୋସେନ୍ ଗୋଟିଏ ଲେଖାଏଁ ଚୌକା ଓ ଛକା ମାଧ୍ୟମରେ ଅପରାଜିତ ୧୬ ରନ୍ କରିଥିଲେ ।
ଦିଲ୍ଲୀ ପକ୍ଷରୁ ମିଚେଲ୍ ମାର୍ଶ ୪ଟି ଏବଂ ଈଶାନ୍ତ ଶର୍ମା ଓ ଅକ୍ଷର ପଟେଲ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ । ବ୍ୟାଟିଂରେ ଦଳ ପକ୍ଷରୁ ମାର୍ଶ ଗୋଟିଏ ଚୌକା ଓ ୬ଟି ଛକା ସହ ସର୍ବାଧିକ ୬୩ ରନ୍ କରିଥିବା ବେଳେ ଓପନର ଫିଲିପ୍ ସଲ୍ଟ ୯ଟି ଚୌକା ମାଧ୍ୟମରେ ୫୯ ଏବଂ ଅକ୍ଷର ୧୪ ବଲ୍ରେ ଗୋଟିଏ ଚୌକା ଓ ୨ଟି ଛକା ସହ ଅପରାଜିତ ୨୯ ରନ୍ କରିଥିଲେ । ହାଇଦ୍ରାବାଦ ପକ୍ଷରୁ ମୟଙ୍କ ମାର୍କଣ୍ଡେ ୨ଟି ଏବଂ ଭୁବନେଶ୍ୱର କୁମାର, ହୋସେନ୍, ଟି. ନଟରାଜନ୍ ଓ ଅଭିଷେକ ଗୋଟିଏ ଲେଖାଏଁ ୱିକେଟ୍ ନେଇଥିଲେ । ଅଭିଷେକଙ୍କୁ ପ୍ଲେୟର୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା ।
