ନିଆଁ ଲାଗି ବ୍ୟାପକ କ୍ଷୟକ୍ଷତି

ରାଉରକେଲା: ଦକ୍ଷିଣ ରାଉରକେଲା ନବକୃଷ୍ଣନଗର ସ୍ଥିତ ଓଲ୍ଡ ରାଉରକେଲା ଏଜୁକେଶନ ସୋସାଇଟିର ଏକ କୋଠରୀରେ ଏକ ଗ୍ୟାସ ସିଲିଣ୍ଡର ଫାଟି ଯିବାରୁ ନିଆଁ ଲାଗି ବ୍ୟାପକ କ୍ଷୟକ୍ଷତି ହୋଇଥିବା ସୂଚନା ମିଳିଛି । ଏନେଇ ସ୍ଥାନୀୟ ଟାଙ୍ଗରପାଲୀ ଥାନାରେ ଏତଲା ହୋଇଛି । ପ୍ରାପ୍ତ ସୂଚନାରୁ ପ୍ରକାଶଯେ, ଓଲ୍ଡ ରାଉରକେଲା ଏଜୁକେଶନ ସୋସାଇଟିରରେ ବଂଶୀଧର କିସାନ କ୍ୟାରଟେକର ଭାବେ କାର୍ଯ୍ୟ କରନ୍ତି । ଗତକାଲି ମଧ୍ୟାହ୍ନ ପ୍ରାୟ ୧୨ଟାରେ ସେ କୌଣସି କାର୍ଯ୍ୟରେ ବଣାଇଁ ଯାଇଥିଲେ । ସେ ରହୁଥିବା ଘରେ ବିଭିନ୍ନ ଆସବାବପତ୍ର ସହ ୨ଟି ଗ୍ୟାସ ସିଲିଣ୍ଡର ଥିଲା । ଗତକାଲି ବିଳମ୍ବିତ ରାତ୍ରିରେ ପ୍ରଚଣ୍ଡ ଶଦ୍ଦ ସହ ଗୋଟିଏ ଗ୍ୟାସ ସିଲିଣ୍ଡର ଫାଟି ଯାଇଥିଲା । ବିସ୍ପୋରଣ ପରେ ନିଆଁ ଲାଗିବା ଦ୍ୱାରା ଘରର ଆସବାବପତ୍ର ପୋଡ଼ିଯିବା ସହ ଗୋଟିଏ ହିରୋପୁକ ଗାଡ଼ି, ଜେନେନେଟର ପୋଡ଼ି ଯାଇଥିବା ଜଣାପଡ଼ିଛି । ଘରର ଅନ୍ୟାନ ସାମଗ୍ରୀ ଏଣେତେଣେ ପଡ଼ି ରହିବା ଦେଖିବାକୁ ମିଳିଛି । ଏହି ଘଟଣାର ଖବର ପାଇ କ୍ୟାରଟେକର ଶ୍ରୀ କିସାନ ଆଜି ସକାଳେ ବଣାଇଁରୁ ନବକୃଷ୍ଣନଗର ପହଂଚିବା ପରେ ଏହି ଘଟଣା ସମ୍ପର୍କରେ ପୁଲିସକୁ ସୂଚନା ଦେଇଥିଲେ । ସଟସର୍କିଟ କାରଣରୁ ସିଲିଣ୍ଡରରେ ନିଆଁ ଲାଗି ବିସ୍ପୋରଣ ଘଟିଥାଏ ପାରେ ବୋଲି ଅନୁମାନ କରାଯାଉଛି । ସୌଭାଗ୍ୟବଶତଃ ବଂଶୀଧର ଘରେ ନଥିବା କାରଣରୁ ଏହି ଦୁର୍ଘଟଣାରୁ ଅଳ୍ପକେ ବର୍ତି ଯାଇଛନ୍ତି । ଏହି ଘଟଣା ସ୍ଥାନୀୟ ବାସିନ୍ଦା ମାନଙ୍କ ମଧ୍ୟରେ ଆତଙ୍କ ଖେଳାଇ ଦେଇଛି ।