ଶ୍ରୀଲଙ୍କା: ଉତ୍ତର-ପଶ୍ଚିମ ଶ୍ରୀଲଙ୍କାର ଏକ ଜଙ୍ଗଲରେ ଅବସ୍ଥିତ ଏକ ମଠରେ ଏକ କେବୁଲ ପରିଚାଳିତ ଟ୍ରେନ୍ ଓଲଟି ପଡ଼ିବାରୁ ଜଣେ ଭାରତୀୟଙ୍କ ସମେତ ସାତ ଜଣ ବୌଦ୍ଧ ଭିକ୍ଷୁଙ୍କ ମୃତ୍ୟୁ ଘଟିଛି। ଏହି ଦୁର୍ଘଟଣାରେ ଅନ୍ୟ ଛଅ ଜଣ ଆହତ ମଧ୍ୟ ହୋଇଛନ୍ତି। ଗୁରୁବାର ଶ୍ରୀଲଙ୍କା ପୋଲିସ ଏହି ଦୁର୍ଘଟଣା ସମ୍ପର୍କରେ ସୂଚନା ଦେଇଛି। ଘଟଣାଟି ବୁଧବାର ରାତିରେ କଲମ୍ବୋରୁ ପ୍ରାୟ ୧୨୫ କିଲୋମିଟର ଦୂର ନିକାବେରାଟିଆରେ ଅବସ୍ଥିତ ଏକ ପ୍ରସିଦ୍ଧ ବୌଦ୍ଧ ମଠ ନା ଉୟାନା ଆରଣ୍ୟ ସେନାସାନାୟାରେ ଘଟିଥିଲା।
ଏହି ମଠଟି ଧ୍ୟାନ ସ୍ଥଳ ପାଇଁ ପ୍ରସିଦ୍ଧ ଏବଂ ସାରା ବିଶ୍ୱରୁ ସାଧକମାନଙ୍କୁ ଆକର୍ଷିତ କରେ। ପୋଲିସ କହିଛି ଯେ ମୃତ ସାତ ଜଣ ବୌଦ୍ଧ ଭିକ୍ଷୁଙ୍କ ମଧ୍ୟରେ ଜଣେ ଭାରତୀୟ, ଜଣେ ଋଷୀୟ ଏବଂ ଜଣେ ରୋମାନିଆନ୍ ନାଗରିକ ଅଛନ୍ତି। ସେମାନେ କହିଛନ୍ତି ଯେ ଆହତଙ୍କ ମଧ୍ୟରୁ ଚାରି ଜଣଙ୍କ ଅବସ୍ଥା ଗୁରୁତର ଥିଲା। ରିପୋର୍ଟ ଅନୁସାରେ, ଏକ କେବୁଲ ଛିଣ୍ଡିଯିବା ଫଳରେ ଟ୍ରେନଟି ଦ୍ରୁତ ଗତିରେ ତଳକୁ ଗଡ଼ିଗଲା, ଲାଇନଚ୍ୟୁତ ହେଲା ଏବଂ ଗଛରେ ପିଟି ହେବା ପରେ ଓଲଟି ପଡ଼ିଲା।
