ଅଭିଯୁକ୍ତ ହାତରେ ଭଣ୍ଡାର ଘରର ଚାବି ଦେଇ ଭ୍ରଷ୍ଟାଚାରକୁ ପ୍ରୋତ୍ସାହନ ଦେଉଛନ୍ତି ନିଜେ ମୁଖ୍ୟମନ୍ତ୍ରୀ: ବିଜେପିି
ସରକାରୀ ବିଧି ବ୍ୟବସ୍ଥାକୁ ବ୍ୟତିକ୍ରମ କରି ଦଳୀୟ ସ୍ୱାର୍ଥ ପାଇଁ ବାରମ୍ବାର ଅନେକ ଜନବିରୋଧୀ କାର୍ଯ୍ୟ କରୁଛନ୍ତି ରାଜ୍ୟ ସରକାର
ନିଜ ଦୁର୍ନୀତି ଓ ଭ୍ରଷ୍ଟାଚାର ଉପରେ କଳା କନା ଘୋଡାଇ ରଖିବାର ପ୍ରୟାସ କରିଥିଲା ବିଜେଡି ସରକାର
ବିଭିନ୍ନ ସମବାୟ ଦୁର୍ନୀତିର ଅଭିଯୁକ୍ତଙ୍କୁ ଅନୈତିକ ଭାବେ ନିଯୁକ୍ତି ଦେବା ପଛରେ ମୁଖ୍ୟମନ୍ତ୍ରୀ ଏବଂ ବିଜେଡି ସରକାରର ମନ୍ଦ ଆଭିମୁଖ୍ୟ ସ୍ପଷ୍ଟ
‘ଆଇନ୍ ତା ବାଟରେ ଯିବ’ ବୋଲି ମୁଖ୍ୟମନ୍ତ୍ରୀଙ୍କ ବକ୍ତବ୍ୟ କେବଳ ଏକ ଧୁଆଁବାଣ
ଭୁବନେଶ୍ୱର, : ଦୀର୍ଘ ୨୨ ବର୍ଷ ଧରି ଶାସନ କ୍ଷମତାରେ ଥିବା ବିଜେଡି ସରକାର ସମୟରେ ଦୁର୍ନୀତି ଓ ଭ୍ରଷ୍ଟାଚାର ଚରମ ସୀମା ଅତିକ୍ରମ କରିସାରିଛି । ଏପରିକି ସମସ୍ତ ଆଇନ କାନୁନକୁ ଜଳାଞ୍ଜଳୀ ଦେଇ ମନୋମୁଖୀ ଶାସନ କରିଚାଲିଛନ୍ତି । ସରକାରୀ ବିଧି ବ୍ୟବସ୍ଥାକୁ ବ୍ୟତିକ୍ରମ କରି ଦଳୀୟ ସ୍ୱାର୍ଥ ପାଇଁ ବାରମ୍ବାର ଅନେକ ଜନବିରୋଧୀ କାର୍ଯ୍ୟ କରୁଛନ୍ତି ରାଜ୍ୟ ସରକାର । ଦୁର୍ନୀତି ଓ ଭ୍ରଷ୍ଟାଚାରର ଗନ୍ତାଘର ସାଜିଥିବା ବିଜେଡି ସରକାର ନିଜକୁ ସୁଧାରିବା ପରିବର୍ତେ କ୍ରମାଗତ ଭାବେ ଏହାକୁ ପ୍ରୋତ୍ସାହନ ଦେଇ ଚାଲିଛନ୍ତି ବୋଲି ବିଜେପି ସମବାୟ ପ୍ରକୋଷ୍ଠ ରାଜ୍ୟ ସଂଯୋଜକ ଶ୍ରୀ ପବିତ୍ର ମୋହନ ଦାଶ କହିଛନ୍ତି ।
ଓଡିଶା ରାଜ୍ୟ ସମବାୟ ବ୍ୟାଂକ ପରିଚାଳନା ନିର୍ଦ୍ଦେଶକ ଥିବା ଅବସରପ୍ରାପ୍ତ ଆଇଏଏସ୍ ଅଧିକାରୀ ଗୋପବନ୍ଧୁ ଶତପଥୀଙ୍କ ପୁନଃ ନିଯୁକ୍ତିକୁ ଅବୈଧ ଘୋଷଣା କରିଛନ୍ତି ମାନ୍ୟବର ହାଇକୋର୍ଟ । ଶ୍ରୀ ଶତପଥୀ ସରକାରୀ ଚାକିରୀରୁ ଅବସର ନେବା ପରେ ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗ ରିଜର୍ଭ ବ୍ୟାଂକ ଅଫ୍ ଇଣ୍ଡିଆର ବିନା ଅନୁମତିରେ ଗତ ୦୨/୦୩/୨୦୨୨ରେ ତାଙ୍କୁ ବ୍ୟାଂକର ପରିଚାଳନା ନିର୍ଦ୍ଦେଶକ ଭାବେ ପୁନଃ ନିଯୁକ୍ତି କରିଥିଲେ, ଯାହାକି ରାଜ୍ୟ ସମବାୟ ଆଇନ ସମ୍ମତ ନୁହେଁ । ପ୍ରକାଶ ଥାଉକି, ଶ୍ରୀ ଶତପଥୀଙ୍କ ସମୟରେ ରାଜ୍ୟରେ ବହୁ ସମବାୟ ବ୍ୟାଂକ ଦୁର୍ନୀତି ହୋଇଥିଲା । ସାଧାରଣ ପ୍ରଶାସନ ବିଭାଗର ମୁଖ୍ୟ ହେଉଛନ୍ତି ଖୋଦ୍ ମୁଖ୍ୟମନ୍ତ୍ରୀ ଏବଂ ନିଜ ଶାସନ କାଳରେ ହୋଇଥିବା ବିଭିନ୍ନ ସମବାୟ ବ୍ୟାଂକ ଦୁର୍ନୀତିକୁ ଲୁଚାଇବା ପାଇଁ ସେହି ସମବାୟ ବ୍ୟାଂକ ଦୁର୍ନୀତିରେ ଅଭିଯୁକ୍ତଙ୍କୁ ଦାୟୀତ୍ୱ ଦେବାର ଚକ୍ରାନ୍ତ କରୁଥିଲେ ରାଜ୍ୟ ସରକାର । ଏହା ଦ୍ୱାରା ନିଜ ଦୁର୍ନୀତି ଓ ଭ୍ରଷ୍ଟାଚାର ଉପରେ କଳା କନା ଘୋଡାଇ ରଖିବାର ପ୍ରୟାସ କରାଯାଇଥିଲା ବୋଲି ଶ୍ରୀ ଦାଶ କହିଛନ୍ତି ।
ସୁନ୍ଦରଗଡ ସମବାୟ ବ୍ୟାଂକଠାରୁ ଆରମ୍ଭ କରି ବିଭିନ୍ନ ସମବାୟ ଦୁର୍ନୀତିରେ ସଂପୃକ୍ତିର ଅଭିଯୋଗ ଥିବା ଶ୍ରୀ ଶତପଥୀଙ୍କ ଭଳି ଜଣେ ଅଭିଯୁକ୍ତଙ୍କୁ ଅନୈତିକ ଭାବେ ନିଯୁକ୍ତି ଦେବା ପଛରେ ମୁଖ୍ୟମନ୍ତ୍ରୀ ଏବଂ ବିଜେଡି ସରକାରର ମନ୍ଦ ଆଭିମୁଖ୍ୟ ସ୍ପଷ୍ଟ ହୋଇଯାଇଛି । ‘ଆଇନ୍ ତା ବାଟରେ ଯିବ’ ବୋଲି ମୁଖ୍ୟମନ୍ତ୍ରୀଙ୍କ ବକ୍ତବ୍ୟ କେବଳ ଏକ ଧୁଆଁବାଣ । ‘ଚୋର ହାତରେ ଚାବି’ ଭଳି ଜଣେ ଅଭିଯୁକ୍ତଙ୍କ ହାତରେ ଭଣ୍ଡାର ଘରର ଚାବି ଦେଇ ଦୁର୍ନୀତି ଓ ଭ୍ରଷ୍ଟାଚାରୀ ବିଜେଡି ସରକାରର ଅସଲି ମୁଖା ମୁଖ୍ୟମନ୍ତ୍ରୀ ନିଜେ ଖୋଲି ଦେଇଛନ୍ତି ବୋଲି ଶ୍ରୀ ଦାଶ କହିଛନ୍ତି ।
