ବେଙ୍ଗାଲୁର: କର୍ଣ୍ଣାଟକ ପୁଲିସ ରବିବାର ବେଙ୍ଗାଲୁରୁସ୍ଥିତ ପଞ୍ଚତାରକା ବିଶିଷ୍ଟ ପାର୍କ ହୋଟେଲ ଉପରେ ଚଢଉ କରି ମୋଟ ୬ ଜଣଙ୍କୁ ଗିରଫ କରିଛି । ଏମାନଙ୍କ ମଧ୍ୟରେ ବଲିଉଡ୍ର ଖ୍ୟାତନାମା ଖଳନାୟକ ଶକ୍ତି କପୁରଙ୍କ ପୁଅ ସିଦ୍ଧାନ୍ତ କପୁର ଅନ୍ୟତମ । ଉକ୍ତ ହୋଟେଲରେ ଚାଲିଥିବା ରେଭ୍ ପାର୍ଟିରେ ବ୍ୟାପକ ଡ୍ରଗ୍ସ ସେବନ କରାଯାଉଥିବା ସମ୍ପର୍କରେ ପୁଲିସକୁୁ ସୂଚନା ମିଳିଥିଲା । ଫଳରେ ପୁଲିସ ଅବିଳମ୍ବେ ଘଟଣାସ୍ଥଳରେ ପହଞ୍ଚି ପାର୍ଟିରେ ସାମିଲ ଥିବା ୩୫ ଜଣଙ୍କୁ ଅଟକ ରଖି ସେମାନଙ୍କର ରକ୍ତ ନମୁନା ପରୀକ୍ଷା ପାଇଁ ପଠାଇଥିଲା । ସିଦ୍ଧାନ୍ତଙ୍କ ସମେତ ୬ ଜଣଙ୍କର ରିପୋର୍ଟ ପଜିଟିଭ୍ ଆସିବାପରେ ସେମାନଙ୍କୁ ଗିରଫ କରାଯାଇଛି ।
ଅନ୍ୟମାନଙ୍କୁ ଚେତାବନୀ ଦେଇ ପୁଲିସ ଛାଡିଦେଇଛି । ସିଦ୍ଧାନ୍ତଙ୍କୁ ଡିଜେ ଦାୟିତ୍ୱ ବହନ କରିବା ପାଇଁ ପାର୍ଟିକୁ ଆମନ୍ତ୍ରଣ କରାଯାଇଥିବା ଜଣାପଡିଛି । ଏନ୍ଡିପିଏସ୍ ଆଇନ ଅନୁଯାୟୀ ୬ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରାଯାଇଛି ବୋଲି ବେଙ୍ଗାଲୁରୁ ପୁଲିସ କମିଶନର ସୂଚନା ଦେଇଛନ୍ତି । ଅଭିଯୁକ୍ତଙ୍କୁ ସ୍ଥାନୀୟ କୋର୍ଟରେ ହାଜର କରାଯାଇଛି ।
ତେବେ ଅଭିଯୁକ୍ତମାନେ ପାର୍ଟିରେ ଡ୍ରଗ୍ସ ସେବନ କରିଛନ୍ତି ନା ବାହାରେ ଡ୍ରଗ୍ସ ସେବନ କରି ପାର୍ଟିକୁ ଆସିଛନ୍ତି, ତାହା ଯାଞ୍ଚ୍ କରାଯାଉଛି । ସିଦ୍ଧାନ୍ତ ଆମେରିକାରୁ ଫିଲ୍ମ ନିର୍ମାଣରେ ଡିଗ୍ରୀ ହାସଲ କରିବାପରେ ବଲିଉଡରେ କ୍ୟାରିୟର ଆରମ୍ଭ କରିଥିଲେ । ‘ସୁଟ୍ଆଉଟ ଏଟ୍ ୱାଡାଲା’, ‘ହସିନା ପାର୍କର’ ଓ ‘ଜଜ୍ବା’ ଭଳି ଏକାଧିକ ହିନ୍ଦୀ ଚଳଚ୍ଚିତ୍ରରେ ସେ ଅଭିନୟ କରିଛନ୍ତି । ସୂଚନାଯୋଗ୍ୟ ୨୦୨୦ରେ ସ୍ୱର୍ଗତ ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାରେ ମୁମ୍ବାଇ ଏନ୍ସିବି (ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ) ପକ୍ଷରୁ ଶକ୍ତି କପୁରଙ୍କ କନ୍ୟା ତଥା ସିଦ୍ଧାନ୍ତଙ୍କ ଭଉଣୀ ଶ୍ରଦ୍ଧା କପୁରଙ୍କୁ ଜେରା କରାଯାଇଥିଲା ।
