ପୋଲ ତଳକୁ କାର୍ ଓଲଟି ଶିଶୁକନ୍ୟା ମୃତ

କ.ନୂଆଗାଁ : ସାରଙ୍ଗଡ଼ରେ ଏକ କାର ଭାରସାମ୍ୟ ହରାଇ ପୋଲୋ ତଳକୁ ଖସି ଦୁର୍ଘଟଣା ଗ୍ରସ୍ତ ହେବା ଫଳରେ ଜଣେ ତିନି ବର୍ଷର ଶିଶୁକନ୍ୟାର ମୃତ୍ୟୁ ହୋଇଛି । ପ୍ରକାଶ ଯେ ସାରଙ୍ଗଡ ଥାନା ଅଞ୍ଚଳର ପଦାସାହି ଅଶୋକ ବେହେରାଙ୍କ ପରିବାର ଏକ ସୁଇଫ୍ଟ କାରରେ କୌଣସି କାମରେ ଭଞ୍ଜନଗର ଯାଇଥିଲେ । ଆଜି ଅପରାହ୍ନରେ ଭଞ୍ଜନଗରରୁ ସେହିକାରରେ ଘରକୁ ଫେରିବା ସମୟରେ ସାରଙ୍ଗଡ ନିକଟ ବନାଙ୍ଗିଆ ଡ୍ୟାମ ପାଖରେ ଭାରସାମ୍ୟ ହରାଇ ପୋଲ ତଳକୁ କାର୍‌ଟି ଖସିପଡ଼ିଥିଲା । ଫଳରେ ତିନି ବର୍ଷର ଶିଶୁକନ୍ୟାର ଅମ୍ରିତା ବେହେରାଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଆଉ ଚାରିଜଣ ଗୁରୁତର ହୋଇଛନ୍ତି । ଖବରପାଇ ସାରଙ୍ଗଡ ଥାନା ଅଧିକାରିଣୀ ବିଦୁଲିକା ବିଶ୍ୱାଳ ଓ ଏସଆଇ କେଶବ ଭାତ୍ରା ଓ ଅଗ୍ନିଶମ ଗାଡି ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରି ପ୍ରଥମେ ସାରଙ୍ଗଡ ଚିକିତ୍ସାଳୟକୁ ଆଣିଥିଲେ । ଚିକିତ୍ସାଳୟରେ ତିନିବର୍ଷର ଶିଶୁ କନ୍ୟାକୁ ଡାକ୍ତର ମୃତ୍ୟୁ ଘୋଷଣା କରିଥିଲେ । ୪ ଜଣ ଗୁରୁତର ଶୁକାନ୍ତି ବେହେରା, ଦମୟନ୍ତୀ ବେହେରା, କାଲିଆ ନାୟକଙ୍କୁ ଅଧିକ ଚିକିତ୍ସା ନିମନ୍ତେ ଜିଲ୍ଲା ଚିକିତ୍ସାଳୟ ଫୁଲବାଣୀକୁ ସ୍ଥାନାନ୍ତର କରାଯାଇଛି । ସାରଙ୍ଗଡ ଥାନା ପୁଲିସ ଏକ ମାମଲା ରୁଜୁକରି ଶବକୁ ଜବତ କରି ବାଲିଗୁଡା ଚିକିତ୍ସାଳୟକୁ ଶବକୁ ବ୍ୟବଛେଦ ପାଇଁ ପଠାଇଥିବା ଥାନା ଅଧିକାରିଣୀ ସୂଚନା ଦେଇଛନ୍ତି ।