ରମ୍ଭା : ହୁମ୍ମା ଫାଣ୍ଡି ଅଞ୍ଚଳ ନୀଳାଦ୍ରିପୁର ଗ୍ରାମରେ ପୈତୃକ ସମ୍ପତ୍ତି ପାଇଁ ସାନ ଭାଇକୁ ଆକ୍ରମଣ ହୋଇଥିବା ଅଭିଯୋଗ ହୋଇଛି । ଆକ୍ରମଣର ଶିକାର ହୋଇଥିବା ବ୍ୟକ୍ତି ଜଣଙ୍କ ହେଲେ ସେହି ଗ୍ରାମର ଭାଗିରଥି ସ୍ୱାଇଁ(୪୬) । ରବିବାର ସକାଳ ୯ଟାରେ ଭାଗିରଥି ତାଙ୍କ ମଝିଆ ବଡ଼ ଭାଇ ସତ୍ୟବାନ ସ୍ୱାଇଁଙ୍କ ପାଖକୁ ସମ୍ପତ୍ତି ବଣ୍ଟନ ନିମନ୍ତେ ପ୍ରମାଣପତ୍ର ମାଗିବାକୁ ଯାଇଥିଲେ । ଭାଗିରଥି ଓ ତାଙ୍କ ସ୍ୱର୍ଗତ ପିତାଙ୍କ ସମସ୍ତ ପ୍ରମାଣପତ୍ର ପୋଡ଼ି ନଷ୍ଟ କରି ଦେଇଥିବା ସତ୍ୟବାନ କହିବା ସହ ଆକ୍ରମଣ କରିଥିଲେ ।
ସେଠାରୁ ଭାଗିରଥି ଖସି ଆସିବା ପରେ ବି ପୁଣି ଦୁଇ ବଡ଼ ଭାଇ ତ୍ରିନାଥ ସ୍ୱାଇଁ ଓ ସତ୍ୟବାନ ଭାଗିରଥିଙ୍କୁ ଆକ୍ରମଣ କରିଥିବା ନେଇ ଅଭିଯୋଗ ହୋଇଛି । ଆକ୍ରମଣରେ ଭାଗିରଥି ସାମାନ୍ୟ ଆହତ ହୋଇଛନ୍ତି । ଘଟଣା ସ୍ଥଳରୁ ଆଉ ଏକ ଭାଇ ବିଶ୍ୱନାଥ ସ୍ୱାଇଁ ଭାଗିରଥିଙ୍କୁ ଉଦ୍ଧାର କରିବାକୁ ଚେଷ୍ଟା କରିବା ବେଳେ ସେ ବି ଆକ୍ରମଣର ଶିକାର ହୋଇଥିବା ଅଭିଯୋଗ ହୋଇଛି । ଭାଗିରଥି ହୁମ୍ମା ଫାଣ୍ଡିରେ ଅଭିଯୋଗ ଦେବା ପରେ ପୁଲିସ୍ ଦୁଇ ଭାଇଙ୍କ ନାମରେ ମାମଲା ରୁଜ୍ଜୁ କରିଛି । ହୁମ୍ମା ଫାଣ୍ଡି ଅଧିକାରୀ ଦେବଦୂତ ପ୍ରିୟଦର୍ଶୀ ଏହାର ତଦନ୍ତ ଜାରି ରଖିଛନ୍ତି ।
