କ୍ରିଷ୍ଣାଙ୍କ ଗୋଲ୍‌ରେ ଏଟିକେଏମ୍‌ବି ବିଜୟୀ

ଗୋଆ : ସ୍ଥାନୀୟ ଫାତୋର୍ଦା ଷ୍ଟାଡିୟମ୍‌ରେ ବୁଧବାର ଖେଳାଯାଇଥିବା ଆଇଏସ୍‌ଏଲ୍‌-୭ର ୩୦ତମ ମ୍ୟାଚ୍‌ରେ ରୟ କ୍ରିଷ୍ଣାଙ୍କ ଗୋଲ୍ ବଳରେ ଏଟିକେ ମୋହନ ବାଗାନ୍ (ଏଟିକେଏମ୍‌ବି) ୧-୦ ଗୋଲ୍‌ରେ ଏଫ୍‌ସି ଗୋଆକୁ ହରାଇ ଦେଇଛି । ସଂଘର୍ଷପୂର୍ଣ୍ଣ ମ୍ୟାଚ୍‌ର ପ୍ରଥମାର୍ଦ୍ଧରେ ଏଟିକେଏମ୍‌ବି ପ୍ରଭାବ ବିସ୍ତାର କରି ଗୋଆକୁ କୌଣସି ସୁଯୋଗ ଦେଇନଥିଲା । ତେବେ ଦ୍ୱିତୀୟାର୍ଦ୍ଧରେ ବ୍ରାଣ୍ଡନ୍ ଓ ଅର୍ଟିଜ୍ ଆସିବା ପରେ ଗୋଆ ଅଧିକ ଆକ୍ରମଣାତ୍ମକ ହୋଇପଡ଼ିଥିଲା । ୮୦ତମ ମିନିଟ୍‌ରେ ଅର୍ଟିଜ୍‌ଙ୍କୁ ଏକ ପେନାଲ୍ଟି ମିଳିଥିଲେ ମଧ୍ୟ ରେଫରି ତାକୁ ଅସ୍ୱୀକାର କରିଦେଇଥିଲେ । ଏହାର କିଛି ସମୟ ପରେ ରୟ କ୍ରିଷ୍ଣାଙ୍କୁ ବଦଳ ଖେଳାଳି ଆଇବାନ୍ ଡୋହଲିଙ୍ଗ୍ ତଳେ ପକାଇ ଦେବା ପରେ ମ୍ୟାଚ୍‌ରେ ନୂଆ ମୋଡ଼ ଆସିଥିଲା । ମିଳିଥିବା ସ୍ପଟ୍ କିକ୍‌କୁ ଗୋଲ୍‌ରେ ପରିଣତ କରି କ୍ରିଷ୍ଣା ଟୁର୍ଣ୍ଣାମେଣ୍ଟ୍‌ରେ ବ୍ୟକ୍ତିଗତ ୫ମ ଗୋଲ୍ ସ୍କୋର୍ ସହ ଏଟିକେଏମ୍‌ବିକୁ ବିଜୟୀ କରାଇଥିଲେ । ଏହି ମ୍ୟାଚ୍ ବିଜୟ ଫଳରେ ଏଟିକେଏମ୍‌ବି ୬ ମ୍ୟାଚ୍‌ରୁ ୧୩ ପଏଣ୍ଟ ହାସଲ କରି ୨ୟ ସ୍ଥାନକୁ ଉଠିଛି । ଅନ୍ୟପକ୍ଷରେ ୬ଟି ମ୍ୟାଚ୍‌ରୁ ୮ମ ପଏଣ୍ଟ ସହ ଏଫ୍‌ସି ଗୋଆ ପୂର୍ବପରି ୬ଷ୍ଠ ସ୍ଥାନରେ ରହିଛି ।