ଲୁଟେରାଙ୍କ ପାଇଁ ଦୁର୍ଘଟଣା; ୩ ମୃତ

ସୁନ୍ଦରଗଡ଼: ବିଲେଇମୁଣ୍ଡା ଛତାବର ନିକଟରେ ଦୁର୍ଘଟଣା । ଚାଲିଗଲା ୩ ଜଣଙ୍କ ଜୀବନ । ଟ୍ରଲର ଧକ୍କାରେ ଏକ ସଂସ୍ଥାର ୨ କର୍ମଚାରୀଙ୍କ ସମେତ ୩ ଜଣଙ୍କ ମୃତ୍ୟୁ ହୋଇଛି ବୋଲି ସୂଚନା ମିଳିଛି । ଦୁର୍ଘଟଣା ଘଟାଇବା ପରେ ଘଟଣାସ୍ଥଳରେ ଓଲଟିଲା ଟ୍ରଲର । ଟାୟାର ଚୋରି କରୁଥିବା ଲୁଟେରାଙ୍କୁ ଧରିବାକୁ ଯାଇ ଏହି ଦୁର୍ଘଟଣା ଘଟିଛି ବୋଲି ଜଣାପଡ଼ିଛି । ସୂଚନା ଅନୁଯାୟୀ, କାଲିଠାରୁ ଘଟଣାସ୍ଥଳରେ ଏକ ବୋଲେରୋ ଦୁର୍ଘଟଣାଗ୍ରସ୍ତ ହୋଇ ରହିଥିଲା । ଆଜି ଉକ୍ତ ବୋଲେରୋରୁ କିଛି ଲୁଟେରା ଟାୟାର ଚୋରି ଉଦ୍ୟମ କରୁଥିଲେ । ପାଖରେ ରାସ୍ତାକାମ କରୁଥିବା ଠିକା ସଂସ୍ଥା କର୍ମଚାରୀ ବିରୋଧ କରିଥିଲେ । ଉଭୟ ପକ୍ଷ ଧସ୍ତାଧସ୍ତି ହେବା ପରେ ଲୁଟେରାମାନେ ଦଉଡ଼ିଥିଲେ । ଲୁଟେରାମାନଙ୍କୁ ପଛରୁ ଗୋଡ଼ାଇବା ବେଳେ ମାଡ଼ି ଯାଇଥିଲା ଟ୍ରଲର । ଦୁର୍ଘଟଣାରେ ଠିକା ସଂସ୍ଥାର ୨ କର୍ମଚାରୀ ଓ ଜଣେ ସନ୍ଦିଗ୍ଧ ଲୁଟେରାର ମୃତ୍ୟୁ ଘଟିଛି ବୋଲି ଜଣାପଡ଼ିଛି । ଖବର ପାଇଁ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି ।