ଭୁବନେଶ୍ୱର: ମହିଳା ଜଣଙ୍କ ଯୁବକଙ୍କ ବିବାହ ପ୍ରସ୍ତାବରେ ରାଜି ନହେବାରୁ ତା’ଙ୍କ ପୁଆକୁ ଅପହରଣ କରିବା ଅଭିଯୋଗରେ ମହିଳାଙ୍କୁ ଏକତରଫ ପ୍ରେମ କରୁଥିବା ଅଭିଯୁକ୍ତଙ୍କୁ ଗିରଫ କରିଛି କୋର୍ଟା ଚାଲାଣ କରିଛି ମୈତ୍ରୀବିହାର ଥାନା ପୁଲିସ । ଗିରଫ ଅଭିଯୁକ୍ତ ଜଣଙ୍କ ହେଲେ ନୟାପଲ୍ଲୀ ଥାନା ଅଞ୍ଚଳର କମଳାକାନ୍ତ ବେହେରା ଓରଫ ଚଗଲା(୩୪) । ସୂଚନାଯୋଗ୍ୟ ଯେ, ଅଭିଯୋଗ କରିଥିବା ମହିଳା ଜଣକ ନିଜର ଦୁଇ ସନ୍ତାନ ଏବଂ ଶାଶୁଙ୍କ ସହିତ ମଫେୟାର ନଗରରେ ଥିବା ଏକ ଭଡା ଘରେ ରୁହନ୍ତି । ତିନି ବର୍ଷ ତଳେ ତାଙ୍କ ସ୍ୱାମୀଙ୍କର ଦେହାନ୍ତ ହୋଇଯାଇଛି । ଯାହା ଫଳରେ ସେ ପରିବାର ଲୋକଙ୍କ ପେଟକୁ ଦୁଇ ଓଳି ଦୁଇ ମୁଠା ଦାନା ଯୋଗେଇବା ପାଇଁ ଦିନ ମଜୁରିଆ ଭାବେ କାମ କରନ୍ତି । ସେ ନିୟମିତ ଭାବେ ଅଭିଯୁକ୍ତ ଚଗଲାଙ୍କ ସହ ମିଶି ଦିନ ମଜୁରିଆ ଭାବେ କାର୍ଯ୍ୟ କରୁଥିବା ଯିବା ବେଳେ ଅଭିଯୁକ୍ତ ଜଣକ ତାଙ୍କୁ ଏକ ତରଫ ପ୍ରେମ କରି ବସିଥିଲେ ।
ଯାହା ଫଳରେ ଅଭିଯୁକ୍ତ ଚଗଲା କଳେବଳେ କୌଶଳେ ଅଭିଯୋଗକାରିଣୀଙ୍କୁ ବିବାହ କରିବାକୁ ଚାହୁଁଥିଲେ । ଅଭିଯୋଗକାରିଣୀ ତାଙ୍କ ପ୍ରସ୍ତାବରେ ରାଜି ନହେବାରୁ ଅଭିଯୁକ୍ତ ଜଣକ ତାଙ୍କୁ ବିଭିନ୍ନ ପ୍ରକାରର ଧମକ ଦେଉଥିଲେ । ବୁଧବାର ଦିନ ମହିଳା ଜଣଙ୍କ କାର୍ଯ୍ୟସ୍ଥଳୀକୁ ଯାଇଥିବା ବେଳେ ତାଙ୍କ ପୁଅକୁ କେହି ଅପହରଣ କରିନେଇଥିବା ଘର ମାଲିକ ତାଙ୍କୁ ଫୋନ କରି ଜଣାଇ ଥିଲେ । ଏହାର କିଛି ସମୟ ପରେ ଅଭିଯୁକ୍ତ ତଗଲା ମହିଳା ଜଣଙ୍କୁ ଫୋନ କରି ତାଙ୍କ ପୁଅକୁ ସେ ଅପହରଣ କରିଥିବା ଜଣାଇଥିଲେ । ଏବଂ ସେ ଯଦି ତାଙ୍କ ପ୍ରସ୍ତାବରେ ରାଜି ନହୁଅନ୍ତି ତାହେଲେ ତାଙ୍କ ପୁଅକୁ ଜୀବନରୁ ମାରିଦେବେ ବୋଲି ଧମକ ମଧ୍ୟ ଦେଇଥିଲେ । ଏଥିରେ ଭୟଭୀତ ହୋଇ ମହିଳା ଜଣଙ୍କ ମୈତ୍ରୀବିହାର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲାର ତଦନ୍ତ କରି ଆଜି ନୟାପଲ୍ଲୀ ଅନ୍ତର୍ଗତ ନୂଆ ସାହିରେ ଚଢଉ କରି ଅଭିଯୁକ୍ତଙ୍କୁ ତାଙ୍କ ଘରୁ ଗିରଫ କରିଥିବା ବେଳେ, ଅଭିଯୁକ୍ତଙ୍କ ହେପାଜତରୁ ଅଭିଯୋଗକାରିଣୀଙ୍କ ଅପହୃତ ପୁଅକୁ ସୁରକ୍ଷିତ ଭାବେ ଉଦ୍ଧାର କରିଥିଲେ । ପଚାରାଉଚରା ବେଳେ ଅଭିଯୁକ୍ତ ଜଣକ ନିଜ ଦୋଷ ସ୍ୱୀକାର କରିଥିଲେ ।
