ଚତୁର୍ଥ ଦିନିକିଆ ମ୍ୟାଚରେ ହାରିଲା ଭାରତ

ନୂଆଦିଲ୍ଲୀ: ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଦିନିକିଆରେ ଭାରତୀୟ ବ୍ୟାଟିଂ ବିପର୍ଯ୍ୟୟ ପରେ ଦଳର ପ୍ରଦର୍ଶନକୁ ନେଇ ଚିନ୍ତା ପ୍ରକାଶ କରିଛନ୍ତି ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର। ନ୍ୟୁଜିଲାଣ୍ଡ ୩୩୩ ରନ୍‌ର ବଡ଼ ସ୍କୋର କରିଥିବାବେଳେ ଭାରତୀୟ ଦଳ ମାତ୍ର ୮୯ ରନ୍‌ରେ ଅଲଆଉଟ୍‌ ହୋଇଥିଲା। ମାତ୍ର ୨୬.୪ ଓଭରରେ ଭାରତର ଇନିଂସ ଶେଷ ହେବା ଗମ୍ଭୀରଙ୍କ ଚିନ୍ତା ବଢ଼ାଇଛି।ମ୍ୟାଚ୍‌ ପରେ ଗମ୍ଭୀର କହିଥିଲେ, କମ୍‌ ରନ୍‌ କରିବା ଅପେକ୍ଷା ଏତେ କମ୍‌ ଓଭରରେ ଅଲଆଉଟ୍‌ ହେବା ଅଧିକ ଚିନ୍ତାଜନକ।  ଆଗାମୀ ଦିନିକିଆ ବିଶ୍ୱକପ୍‌କୁ ଦୃଷ୍ଟିରେ ରଖି ଏହି ପରାଜୟକୁ ଗମ୍ଭୀର ଗୁରୁତ୍ୱର ସହ ନେଇଛନ୍ତି। ଦକ୍ଷିଣ ଆଫ୍ରିକାରେ ହେବାକୁ ଥିବା ବିଶ୍ୱକପ୍‌ରେ ମଧ୍ୟ ଏଭଳି କଠିନ ପରିସ୍ଥିତିର ସାମ୍ନା କରିବାକୁ ପଡ଼ିପାରେ ବୋଲି ସେ ମତ ଦେଇଛନ୍ତି।ଗମ୍ଭୀରଙ୍କ ମତରେ, ନ୍ୟୁଜିଲାଣ୍ଡରେ ଇନିଂସର ପ୍ରଥମ ୧୦ ଓଭର ବ୍ୟାଟିଂ ପାଇଁ ସବୁଠାରୁ କଷ୍ଟକର ସମୟ। ଏହି ସମୟରେ ୱିକେଟ୍‌ ନ ହରାଇ ୩୫ରୁ ୪୦ ରନ୍‌ ସଂଗ୍ରହ କରିପାରିଲେ ତାହା ଏକ ଭଲ ଆରମ୍ଭ ହେବ। ନୂଆ ବଲ୍‌ରେ ବୋଲରଙ୍କୁ ମିଳୁଥିବା ସହାୟତାକୁ ବୁଝି ବ୍ୟାଟ୍ସମ୍ୟାନ୍‌ମାନେ ଧୈର୍ଯ୍ୟର ସହ ଖେଳିବା ଆବଶ୍ୟକ ବୋଲି ସେ ସଙ୍କେତ ଦେଇଛନ୍ତି।