ତ୍ୱରିତ କାର୍ୟ୍ୟାନୁଷ୍ଠାନ ଓ ନ୍ୟାୟ ଦାବି କରି କଟକ (ରୁରାଲ) ଏସ୍ପିଙ୍କୁ ଦେଲେ ସ୍ମାରକପତ୍ର
ଭୁବନେଶ୍ୱର : ବିଜୁ ଜନତା ଦଳର ମାନ୍ୟବର ସଭାପତି ଶ୍ରୀ ନବୀନ ପଟ୍ଟନାୟକଙ୍କ ଅନୁମୋଦନ କ୍ରମେ ଏକ ପ୍ରତିନିଧିମଣ୍ଡଳୀ ଆଜି କଟକ ଜିଲ୍ଲା ନିଆଳି ଅନ୍ତର୍ଗତ ବନାଳୀପୁର, ରତନପୁର ଅଞ୍ଚଳର ବାଘସାହି ଗ୍ରାମକୁ ଯାଇ ୧୩ ଓ ୧୪ ବର୍ଷ ବୟସର ଦୁଇ ନାବାଳିକାଙ୍କ ପରିବାର ସଦସ୍ୟଙ୍କୁ ଭେଟିଥିଲେ। ଦୁଇ ନାବାଳିକାଙ୍କ ସହ ଘଟିଥିବା ରିପୋର୍ଟେଡ୍ ଯୌନ ନିର୍ୟାତନା ଘଟଣା ସମ୍ପର୍କରେ ପ୍ରତିନିଧିମଣ୍ଡଳୀ ପରିବାର ସଦସ୍ୟଙ୍କ ସହ ଆଲୋଚନା କରି ସେମାନଙ୍କ ଅଭିଯୋଗ ଶୁଣିଥିଲେ ଏବଂ ଘଟଣା ସମ୍ପର୍କିତ ପରିସ୍ଥିତି ବିଷୟରେ ଜାଣିବାକୁ ଚେଷ୍ଟା କରିଥିଲେ। ନାବାଳିକାମାନଙ୍କ ସୁରକ୍ଷା, ସମ୍ମାନ ଓ କଲ୍ୟାଣକୁ ନେଇ ପ୍ରତିନିଧିମଣ୍ଡଳୀ ଗଭୀର ଉଦ୍ବେଗ ପ୍ରକାଶ କରିବା ସହ ଏହି ମାମଲାକୁ ସମ୍ବେଦନଶୀଳତାର ସହିତ ଏବଂ ଆଇନ ଅନୁଯାୟୀ ପରିଚାଳନା କରିବାର ଆବଶ୍ୟକତା ଉପରେ ଜୋର ଦେଇଥିଲେ।
ଘଟଣାସ୍ଥଳ ପରିଦର୍ଶନ ପରେ ବିଜେଡି ପ୍ରତିନିଧିମଣ୍ଡଳୀ କଟକ ଏସ୍ପି (ରୁରାଲ)ଙ୍କ କାର୍ୟ୍ୟାଳୟରେ ତାଙ୍କୁ ଭେଟି ରିପୋର୍ଟେଡ୍ ଘଟଣାର ତୁରନ୍ତ, ନିରପେକ୍ଷ, ନ୍ୟାୟସଙ୍ଗତ ଓ ସମୟବଦ୍ଧ ତଦନ୍ତ ଦାବି କରି ଏକ ସ୍ମାରକପତ୍ର ପ୍ରଦାନ କରିଥିଲେ। ଅଭିଯୁକ୍ତଙ୍କ ବିରୋଧରେ ଆଇନ ଓ ନ୍ୟାୟିକ ପ୍ରକ୍ରିୟା ଅନୁଯାୟୀ ତୁରନ୍ତ ଏବଂ ଉପଯୁକ୍ତ ଆଇନଗତ କାର୍ୟ୍ୟାନୁଷ୍ଠାନ ନେବାକୁ ପ୍ରତିନିଧିମଣ୍ଡଳୀ ପୋଲିସ୍ କର୍ତ୍ତୃପକ୍ଷଙ୍କୁ ଅନୁରୋଧ କରିଥିଲେ। ଏଥିସହ ନାବାଳିକାମାନଙ୍କ ସୁରକ୍ଷା, ଗୋପନୀୟତା, ସମ୍ମାନ ଓ ପରିଚୟର ସୁରକ୍ଷା ସୁନିଶ୍ଚିତ କରିବା, ନାବାଳିକା ଓ ସେମାନଙ୍କ ପରିବାରକୁ ଆବଶ୍ୟକ ସମସ୍ତ ସୁରକ୍ଷା ଓ ସହାୟତା ଯୋଗାଇଦେବା ଏବଂ କୌଣସି ପ୍ରକାରର ଧମକ, ଚାପ କିମ୍ବା ହଇରାଣ ନକରିବାକୁ ମଧ୍ୟ ଅନୁରୋଧ କରାଯାଇଥିଲା।
ବିଜେଡି ପ୍ରତିନିଧିମଣ୍ଡଳୀ କଟକ ଏସ୍ପି (ରୁରାଲ)ଙ୍କୁ ଏହି ଘଟଣାକୁ ସର୍ବୋଚ୍ଚ ପ୍ରାଥମିକତା ଓ ସମ୍ବେଦନଶୀଳତାର ସହିତ ଗ୍ରହଣ କରିବାକୁ ଦୃଢ଼ ଅନୁରୋଧ କରିଥିଲେ। ନାବାଳିକା ଓ ସେମାନଙ୍କ ପରିବାର ଯେପରି ବିଳମ୍ବ ନକରି ନ୍ୟାୟ ପାଇପାରିବେ, ସେଥିପାଇଁ ଆଇନ ଅନୁଯାୟୀ ସମସ୍ତ ଆବଶ୍ୟକ ପଦକ୍ଷେପ ନେବାକୁ ଦାବି କରାଯାଇଥିଲା। ଏଥିସହ ନାବାଳିକାମାନଙ୍କ ଗୋପନୀୟତା ଓ ସମ୍ମାନକୁ ବଜାୟ ରଖି ତଦନ୍ତ ଏକ ନ୍ୟାୟସଙ୍ଗତ, ନିରପେକ୍ଷ ଓ ସ୍ୱଚ୍ଛ ଢଙ୍ଗରେ କରାଯିବା ଉଚିତ ବୋଲି ପ୍ରତିନିଧିମଣ୍ଡଳୀ ଜୋର ଦେଇଥିଲେ। ଏହି ପ୍ରତିନିଧିମଣ୍ଡଳୀରେ ଡ. ରାଜଶ୍ରୀ ମଲ୍ଲିକ, ଡ. ମିନତୀ ବେହେରା, ଡ. ପ୍ରମୋଦ ମଲ୍ଲିକ (ସଂଯୋଜକ), ଶ୍ରୀ ପ୍ରଫୁଲ୍ଲ ସିଂହ, ଶ୍ରୀମତୀ ସୁମିତ୍ରା ଜେନା, ଶ୍ରୀମତୀ ସ୍ମିତା ସ୍ୱାଇଁ ଏବଂ ଶ୍ରୀମତୀ ଇଲା ସ୍ୱାଇଁ ଉପସ୍ଥିତ ଥିଲେ। ଘଟଣାସ୍ଥଳ ପରିଦର୍ଶନ ଓ ସ୍ମାରକପତ୍ର ପ୍ରଦାନ ପରେ ପ୍ରତିନିଧିମଣ୍ଡଳୀ ନିଜର ପର୍ୟ୍ୟବେକ୍ଷଣ ଏବଂ ପ୍ରଭାବିତ ପରିବାରଗୁଡ଼ିକ ଉଠାଇଥିବା ଚିନ୍ତା ବିଷୟରେ ଏକ ବିସ୍ତୃତ ରିପୋର୍ଟ ବିଜୁ ଜନତା ଦଳର ମାନ୍ୟବର ସଭାପତି ଶ୍ରୀ ନବୀନ ପଟ୍ଟନାୟକଙ୍କୁ ପ୍ରଦାନ କରିବେ। ଏହି ଅବସରରେ ଶ୍ରୀମତୀ ଅନିତା ବେହେରା, ଶ୍ରୀ ସ୍ମୃତିରଞ୍ଜନ ନାୟକ, ଶ୍ରୀ ସୁମନ ବେହେରା ଏବଂ ଜିଲ୍ଲା ମହିଳା, ଯୁବ ଓ ଛାତ୍ର ସଭାପତିମାନେ ଉପସ୍ଥିତ ଥିଲେ।
