ନୂଆଦିଲ୍ଲୀ : ନିଟ୍ ପ୍ରଶ୍ନପତ୍ର ପ୍ରଘଟ ପ୍ରସଙ୍ଗରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରିଛନ୍ତି ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ। ଦିଲ୍ଲୀରେ ଆନ୍ଦୋଳନରତ ଛାତ୍ରଛାତ୍ରୀଙ୍କ ପ୍ରତି ପୁଲିସର ହିଂସା ପରେ ପ୍ରଥମ ଥର ପାଇଁ ନବୀନ ଧର୍ମେନ୍ଦ୍ରଙ୍କ ଇସ୍ତଫା ମାଗିଛନ୍ତି। ମଙ୍ଗଳବାର ଅପରାହ୍ନରେ ବିଜେଡି ରାଜ୍ୟସଭା ସାଂସଦଙ୍କ ସହ ବୈଠକ ପରେ ଗଣମାଧ୍ୟମକୁ ସୂଚନା ଦେଇ ଶ୍ରୀ ପଟ୍ଟନାୟକ କହିଛନ୍ତି ଆନ୍ଦୋଳନରତ ଛାତ୍ରଙ୍କ ଉପରେ ପୁଲିସ ଆକ୍ରମଣ ଅତି ସାଂଘାତିକ ଘଟଣା। କେବଳ ଦିଲ୍ଲୀ ନୁହେଁ, ଦେଶର ବିଭିନ୍ନ ସହର ସମେତ ବିଦେଶରେ ଦୂତାବାସ ସମ୍ମୁଖରେ ପ୍ରଦର୍ଶନ ଆରମ୍ଭ ହେଲାଣି। ଦଳୀୟ ସାଂସଦ ଦିଲ୍ଲୀରେ ଏହି ପ୍ରସଙ୍ଗକୁ ଜୋରଦାର ଉଠାଇବେ। ଆହତ ଛାତ୍ରଛାତ୍ରୀଙ୍କୁ ଦଳୀୟ ସାଂସଦ ଡାକ୍ତରଖାନାରେ ଭେଟି ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି। ଦିଲ୍ଲୀର ୩, ଅବଦୁଲ କାଲମ ରୋଡ଼ ସ୍ଥିତ ବାସଭବନରେ ଦଳୀୟ ସାଂସଦଙ୍କ ସହ ବୈଠକରେ ଛାତ୍ରଛାତ୍ରୀଙ୍କ ଦାବିକୁ ବିଜେଡି ସମର୍ଥନ ବିଷୟରେ ସେ ସ୍ୱଷ୍ଟ କରିଥିଲେ। ଏଥିସହ ଆନ୍ଦୋଳନରତ ଛାତ୍ରଛାତ୍ରୀଙ୍କ ପ୍ରତି ପୁଲିସ କାର୍ଯ୍ୟାନୁଷ୍ଠାନକୁ ବୈଠକରେ ଦୃଢ଼ ନିନ୍ଦା କରିଥିବା ଜଣାପଡ଼ିଛି।
ଅପରପକ୍ଷେ ଛାତ୍ରଙ୍କ ସ୍ୱର ଶୁଣିବା ପାଇଁ କେନ୍ଦ୍ର ସରକାରଙ୍କୁ ବିଜେଡି ସାଂସଦଗଣ ଅନୁରୋଧ କରିଛନ୍ତି। ପୁଲିସ ହିଂସାରେ ଆହତ ହୋଇ ଭର୍ତ୍ତି ହୋଇଥିବା ଛାତ୍ର ଏବଂ ସେମାନଙ୍କ ପରିବାରବର୍ଗଙ୍କୁ ସ୍ଥାନୀୟ ରାମମନୋହର ଲୋହିଆ ହସପିଟାଲ ଠାରେ ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ, ଡ. ସସ୍ମିତ ପାତ୍ର, ସଂତୃପ୍ତ ମିଶ୍ର, ସୁଲତା ଦେଓ ଓ ଶୁଭାଶିଷ ଖୁଣ୍ଟିଆ ଭେଟି ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି।
ଧର୍ମେନ୍ଦ୍ରଙ୍କ ଇସ୍ତଫା ଦାବି କଲେ ନବୀନ
