ଭୁବନେଶ୍ୱର/ନୂଆଦିଲ୍ଲୀ: ରୂପାନ୍ତରଣକାରୀ ସହରୀ ପ୍ରଶାସନ କ୍ଷେତ୍ରରେ ନିଜର ଜାତୀୟ ନେତୃତ୍ୱକୁ ଅଧିକ ସୁଦୃଢ଼ କରି ଓଡ଼ିଶା ସରକାର ଗତକାଲି ନୂଆଦିଲ୍ଲୀଠାରେ ଅନୁଷ୍ଠିତ ‘ଅର୍ବାନ ଚ୍ୟାଲେଞ୍ଜ ଫଣ୍ଡ’ର ପ୍ରଥମ ଜାତୀୟ ଆପେକ୍ସ କମିଟି ବୈଠକରେ ଏକ ମହତ୍ତ୍ୱାକାଂକ୍ଷୀ “ପରବର୍ତ୍ତୀ ପିଢ଼ିର ସହରୀ ବିକାଶ ରୋଡମ୍ୟାପ୍” ଉପସ୍ଥାପନ କରିଛନ୍ତି। କେନ୍ଦ୍ର ଗୃହ ନିର୍ମାଣ ଓ ସହରୀ ବ୍ୟାପାର ମନ୍ତ୍ରୀ ମନୋହର ଲାଲ ଖଟ୍ଟରଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିଲା। ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶୀମତୀ ଉଷା ପାଢ଼ୀ ୟୁସିଏଫ୍ ଢାଞ୍ଚାରେ ୫,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ପାଞ୍ଚଟି ପ୍ରମୁଖ ସହରୀ ଭିତ୍ତିଭୂମି ପ୍ରକଳ୍ପ ପ୍ରଦର୍ଶିତ କରିଥିଲେ। ଏହି ପ୍ରସ୍ତାବିତ ପଦକ୍ଷେପଗୁଡ଼ିକର ଲକ୍ଷ୍ୟ ହେଉଛି ସାରା ରାଜ୍ୟରେ ସହନଶୀଳ, ଅନ୍ତର୍ଭୁକ୍ତିକରଣ ଏବଂ ପ୍ରଯୁକ୍ତିଭିତ୍ତିକ ସହରୀ ପରିବେଶର ବିକାଶକୁ ତ୍ୱରାନ୍ୱିତ କରିବା।
ଏହି ଉପସ୍ଥାପନାରେ ଓଡ଼ିଶାର ବିକାଶମୁଖୀ ସହରୀ ମଡେଲ୍କୁ ଗୁରୁତ୍ୱ ଦିଆଯାଇଥିଲା, ଯାହା ସ୍ଥାୟୀ ଭିତ୍ତିଭୂମି, ଜଳବାୟୁ ସହନଶୀଳତା, ଡିଜିଟାଲ୍ ଶାସନ ଏବଂ ନାଗରିକ-କୈନ୍ଦ୍ରିକ ଅଭିବୃଦ୍ଧିକୁ ପ୍ରାଧାନ୍ୟ ଦେଇଥାଏ। ଏହି ରୋଡମ୍ୟାପ୍ ଏପରି ସହରଗୁଡ଼ିକର ପରିକଳ୍ପନା କରେ ଯାହା କେବଳ ଅର୍ଥନୈତିକ ଭାବେ ଗତିଶୀଳ ଏବଂ ବୈଷୟିକ ଜ୍ଞାନକୌଶଳରେ ସମୃଦ୍ଧ ହେବ ନାହିଁ, ବରଂ ପରିବେଶ ଅନୁକୂଳ ଏବଂ ସାମାଜିକ ଭାବେ ଅନ୍ତର୍ଭୁକ୍ତିକାରୀ ମଧ୍ୟ ହେବ। ଓଡ଼ିଶା ପକ୍ଷରୁ ସମନ୍ୱିତ ଭିତ୍ତିଭୂମି ବିକାଶ, ଉନ୍ନତ ନାଗରିକ ସେବା, ଗମନାଗମନ ସୁବିଧାର ବୃଦ୍ଧି ଏବଂ ଗୁଣାତ୍ମକ ସହରୀ ଜୀବନଶୈଳୀ ଉପରେ କେନ୍ଦ୍ରିତ ଉଚ୍ଚ-ପ୍ରଭାବଶାଳୀ ସହରୀ ପ୍ରକଳ୍ପର ଏକ ଶକ୍ତିଶାଳୀ ପୋର୍ଟଫୋଲିଓ ଉପସ୍ଥାପନ କରାଯାଇଥିଲା। ପ୍ରସ୍ତାବିତ ପ୍ରକଳ୍ପଗୁଡ଼ିକରେ ବନ୍ୟା ନିୟନ୍ତ୍ରଣ, ବୈଜ୍ଞାନିକ ଜଳ ନିଷ୍କାସନ ବ୍ୟବସ୍ଥା, ସହରୀ ସବୁଜ ବଳୟର ସମ୍ପ୍ରସାରଣ, ସ୍ଥାୟୀ ଜଳ ପରିଚାଳନା ଏବଂ ଜଳବାୟୁ-ଅନୁକୂଳ ଭିତ୍ତିଭୂମି ଉପରେ ବିଶେଷ ଗୁରୁତ୍ୱ ଦିଆଯାଇଛି। ସହରୀ ବିକାଶର ସୁଫଳ ଯେପରି ସମାଜର ପ୍ରତ୍ୟେକ ବର୍ଗଙ୍କ ପାଖରେ ପହଞ୍ଚିବ, ତାହା ରୋଡମ୍ୟାପ୍ ନିଶ୍ଚିତ କରେ। ଏଥିରେ ବିଶେଷ କରି ଅସୁରକ୍ଷିତ ଗୋଷ୍ଠୀ, ମହିଳା, ଉଠାଦୋକାନୀ ଏବଂ ଆର୍ଥିକ ଅନଗ୍ରସର ଶ୍ରେଣୀର ଲୋକଙ୍କୁ ସମାନ ସୁଯୋଗ ଓ ସେବା ପ୍ରଦାନ ଉପରେ ଧ୍ୟାନ ଦିଆଯାଇଛି।
ପୌର ପ୍ରଶାସନ ଏବଂ ସେବା ପ୍ରଦାନରେ ସ୍ୱଚ୍ଛତା ଓ ଦକ୍ଷତା ବୃଦ୍ଧି ପାଇଁ ସ୍ମାର୍ଟ ଟେକ୍ନୋଲୋଜି ଏବଂ ଡାଟା-ଚାଳିତ ଶାସନ ବ୍ୟବସ୍ଥାର ଏକୀକରଣକୁ ଓଡ଼ିଶା ସରକାର ହାଇଲାଇଟ୍ କରିଥିଲେ। ଏହି ଅବସରରେ ଏସିଏସ୍ ଶ୍ରୀମତୀ ପାଢ଼ୀ କହିଛନ୍ତି ଯେ, ଓଡ଼ିଶାର ଦୂରଦୃଷ୍ଟି କେବଳ ପାରମ୍ପରିକ ଭିତ୍ତିଭୂମି ସମ୍ପ୍ରସାରଣ ମଧ୍ୟରେ ସୀମିତ ନୁହେଁ। “ଆମର ଲକ୍ଷ୍ୟ ହେଉଛି ସ୍ଥାୟୀ ଏବଂ ଭବିଷ୍ୟତ-ଉପଯୋଗୀ ସହରୀ ପରିବେଶ ସୃଷ୍ଟି କରିବା। ‘ଅର୍ବାନ ଚ୍ୟାଲେଞ୍ଜ ଫଣ୍ଡ’ ମାଧ୍ୟମରେ ଓଡ଼ିଶା ଏପରି ଅଭିନବ ସମାଧାନ କାର୍ଯ୍ୟକାରୀ କରିବାକୁ ପ୍ରତିବଦ୍ଧ ଯାହା ଦ୍ରୁତ ଅର୍ଥନୈତିକ ଅଭିବୃଦ୍ଧି ସହିତ ପରିବେଶ ସନ୍ତୁଳନ ଏବଂ ସାମାଜିକ ନ୍ୟାୟ ରକ୍ଷା କରିପାରିବ,” ବୋଲି ସେ ପ୍ରକାଶ କରିଥିଲେ। ଜାତୀୟ ଆପେକ୍ସ କମିଟି ଓଡ଼ିଶାର ସକ୍ରିୟ ପରିକଳ୍ପନା, ସଂସ୍କାରମୁଖୀ ପ୍ରଶାସନ ଏବଂ ସହରୀ ବିକାଶ କ୍ଷେତ୍ରରେ କ୍ରମାଗତ ପ୍ରଦର୍ଶନକୁ ଉଚ୍ଚ ପ୍ରଶଂସା କରିଛନ୍ତି। ରାଜ୍ୟର ଏହି ଉପସ୍ଥାପନାକୁ ସମନ୍ୱିତ ଏବଂ ପ୍ରଗତିଶୀଳ ସହରୀ ରୂପାନ୍ତରଣ ପାଇଁ ଏକ ‘ମଡେଲ’ ଭାବରେ ସ୍ୱୀକୃତି ମିଳିଛି। ଏହି ବୈଠକରେ କେନ୍ଦ୍ର ଗୃହ ନିର୍ମାଣ ଓ ସହରୀ ବ୍ୟାପାର ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ବିଭିନ୍ନ ରାଜ୍ୟର ପ୍ରତିନିଧିମାନେ ଯୋଗ ଦେଇଥିଲେ।
