ଇରାନ ଉପରେ ଘାତକ ଆକ୍ରମଣ କଲା ଇସ୍ରାଏଲ

ଇରାନ : ଇସ୍ରାଏଲୀ ସେନା (ଆଇଡିଏଫ୍‌) ତେହେରାନରେ ବଡ଼ ଧରଣର ଏୟାର୍ ଷ୍ଟ୍ରାଇକ୍ କରି ଇରାନର ଗୁରୁତ୍ୱପୂର୍ଣ୍ଣ ସାମରିକ ଭିତ୍ତିଭୂମିକୁ ଟାର୍ଗେଟ କରିଛି । ଏହି ଆକ୍ରମଣରେ ଇରାନର ମୁଖ୍ୟ ମହାକାଶ ଗବେଷଣା କେନ୍ଦ୍ର ଏବଂ ପ୍ରତିରକ୍ଷା ପ୍ରଣାଳୀ ନିର୍ମାଣ କରୁଥିବା ଏକ ବଡ଼ କାରଖାନା ସମ୍ପୂର୍ଣ୍ଣ ଧ୍ୱଂସ ପାଇଛି। ଇସ୍ରାଏଲ ଦାବି କରିଛି, ଏହି ସ୍ଥାନଗୁଡ଼ିକରେ ନିରୀକ୍ଷଣ ଏବଂ ଆକ୍ରମଣ ପାଇଁ ସାମରିକ ଉପଗ୍ରହର ବ୍ୟବହାର କରାଯାଉଥିଲା । ଇସ୍ରାଏଲୀ ବାୟୁସେନା ଅନୁଯାୟୀ, ଆକ୍ରମଣର ପ୍ରାଥମିକ ଉଦ୍ଦେଶ୍ୟ ଥିଲା ସାମରିକ ଉପଗ୍ରହ ଉତ୍ପାଦନ କରୁଥିବା ରଣନୈତିକ ପ୍ରୟୋଗଶାଳାଗୁଡ଼ିକୁ ଧ୍ୱଂସ କରିବା। ଏହି ଉପଗ୍ରହଗୁଡ଼ିକୁ ମଧ୍ୟପ୍ରାଚ୍ୟରେ ଇସ୍ରାଏଲୀ ସମ୍ପତ୍ତି ଉପରେ ନଜର ରଖିବା ଏବଂ ସଠିକ ଆକ୍ରମଣ ପାଇଁ ମାର୍ଗଦର୍ଶନ କରିବା ଲାଗି ବ୍ୟବହାର କରାଯାଉଥିଲା।ଏହି ଆକ୍ରମଣ ଇରାନର ମହାକାଶ ଗବେଷଣା ଏବଂ ଗୁପ୍ତଚର କ୍ଷମତାକୁ ପଙ୍ଗୁ କରିଦେଇଛି ବୋଲି ଇସ୍ରାଏଲ କହିଛି। ମହାକାଶ କେନ୍ଦ୍ର ବ୍ୟତୀତ, ଇସ୍ରାଏଲ ଇରାନର ବାୟୁ ପ୍ରତିରକ୍ଷା ପ୍ରଣାଳୀ ଉତ୍ପାଦନ କରୁଥିବା ଏକ ପ୍ରମୁଖ କାରଖାନାକୁ ମଧ୍ୟ ଧ୍ୱଂସ କରିଦେଇଛି। ଏହି ଆକ୍ରମଣ ଇରାନର ପ୍ରତିରକ୍ଷା ପୁନଃନିର୍ମାଣ ଏବଂ ସୁଦୃଢ଼ ​​କରିବାର କ୍ଷମତାକୁ ଯଥେଷ୍ଟ ଦୁର୍ବଳ କରିଦେଇଛି ବୋଲି ଆଇଡିଏଫ୍ କହିଛି। ଇରାନର ମୁଖ୍ୟ ଉତ୍ପାଦନ ସୁବିଧା ବନ୍ଦ ହୋଇଯିବାରୁ ଇରାନ ପାଇଁ ଏବେ ବାୟୁ ଆକ୍ରମଣର ମୁକାବିଲା କରିବା ପୂର୍ବ ଅପେକ୍ଷା ବେଶ୍ କଷ୍ଟକର ହେବ ।