ନୂଆଦିଲ୍ଲୀ: ଟି – ୨୦ ବିଶ୍ୱକପ ଖେଳିବନି ବାଂଲାଦେଶ । ଆଇସିସି ଟି – ୨୦ ବିଶ୍ୱକପରୁ ଓହରିଲା ବାଂଲାଦେଶ । ସରକାରଙ୍କ ପକ୍ଷରୁ କ୍ଲିଅରାନ୍ସ ନ ମିଳିବା ପରେ ଓହରିଲା ଦଳ । ବାଂଲାଦେଶ ସରକାରଙ୍କ କ୍ରୀଡା ପରାମର୍ଶଦାତା ଆସିଫ୍ ନଜରୁଲ୍ ଏକ ସାମ୍ବାଦିକ ସମ୍ମିଳନୀରେ ଏନେଇ ଘୋଷଣା କରିଛନ୍ତି। ବିକଳ୍ପ ଦଳ ଭାବେ ସ୍କଟଲାଣ୍ଡ ଖୋଳିବ ଟି – ୨୦ ବିଶ୍ୱକପ ୨୦୨୬ । ଭାରତରେ ଖେଳିବାକୁ ବିରୋଧ କରି ହାଇବ୍ରିଡ ମଡେଲ ପାଇଁ ଅନୁରୋଧ କରିଥିଲା ବିସିବି । କିନ୍ତୁ ଆଇସିସି ବିସିବିର ଅନୁରୋଧକୁ ପ୍ରତ୍ୟାଖ୍ୟାନ କରିବା ସହ ୨୪ ଘଣ୍ଟା ସମୟ ଦେଇଥିଲା । ଏହି ପ୍ରସଙ୍ଗରେ ଆଇସିସି ଅନ୍ୟାୟ କରିଛି ବୋଲି କହିଲେ ବିସିବି ପରାମର୍ଶଦାତା ।
ସାମ୍ବାଦିକ ସମ୍ମିଳନୀରେ ଆସିଫ୍ ନଜରୁଲ୍ କହିଛନ୍ତି ଯେ ଆମେ ସମସ୍ତେ ବିଶ୍ୱକପ୍ ଖେଳିବାକୁ ଚାହୁଁଛୁ। ଭାରତରେ ଆମର ଖେଳାଳି ଏବଂ ଦଳର ସୁରକ୍ଷା ସମସ୍ୟା ଏବେ ବି ରହିଛି। ଏହା ସବୁ ସେମାନଙ୍କ ଦଳରୁ ଜଣେ ଖେଳାଳିଙ୍କୁ ବାହାର କରିବା ସହିତ ଆରମ୍ଭ ହୋଇଥିଲା। ଆଇସିସି ଯେତେ କହେ ଯେ କୌଣସି ସୁରକ୍ଷା ଚିନ୍ତା ନାହିଁ, ଯଦି ମୁସ୍ତାଫିଜୁର ରହମାନଙ୍କୁ ସୁରକ୍ଷା ଯୋଗାଇ ଦିଆଯାଇପାରିବ ନାହିଁ, ତେବେ ଆମେ କିପରି ବିଶ୍ୱାସ କରିବା ଯେ ଆଇସିସି ସୁରକ୍ଷା ଯୋଗାଇବବୋଲି ପ୍ରଶ୍ନ କରିଛନ୍ତି ଆସିଫ୍।
ସେ ଆହୁରି କହିଛନ୍ତି, “ଖେଳାଳିମାନଙ୍କ ସହ ମୋର ଯାହା ବି ହୋଇଛି ତାହା ଏକ ବ୍ୟକ୍ତିଗତ ଆଲୋଚନା। ସେମାନେ ଆମକୁ ଯାହା କହିଛନ୍ତି ତାହା ମୁଁ କାହା ସହିତ ସେୟାର କରିବି ନାହିଁ। ବୈଠକର ଉଦ୍ଦେଶ୍ୟ ଥିଲା ସେମାନଙ୍କ ଇଚ୍ଛାକୁ ବୁଝିବା। ମୁଁ ମୋ ଖେଳାଳିମାନଙ୍କୁ ବିପଦରେ ପକାଇବାକୁ ଚାହୁଁନାହିଁ। ଏହା ଆମ ସରକାରଙ୍କ ନିଷ୍ପତ୍ତି। ଆମେ ଆମ ଖେଳାଳିମାନଙ୍କୁ ବିପଦରେ ପକାଇପାରିବୁ ନାହିଁ।”
ସୂଚନାଯୋଗ୍ୟ, ବାଂଲାଦେଶ କ୍ରିକେଟ୍ ବୋର୍ଡ ୨୦୨୬ ଟି୨୦ ବିଶ୍ୱକପ୍ ମ୍ୟାଚ୍ ଭାରତରୁ ଶ୍ରୀଲଙ୍କାକୁ ସ୍ଥାନାନ୍ତର କରିବାକୁ ଅନୁରୋଧ କରିଥିଲା। ତଥାପି, ବୁଧବାର ଦିନ ଆଇସିସି ଏହି ଦାବିକୁ ପ୍ରତ୍ୟାଖ୍ୟାନ କରିଥିଲା। ଆଇସିସି ବୋର୍ଡ ବୈଠକରେ ଏହି ଦାବିକୁ ପ୍ରତ୍ୟାଖ୍ୟାନ କରି ବିସିବିକୁ ଗୋଟିଏ ଦିନର ସମୟ ବୃଦ୍ଧି ମଞ୍ଜୁର କରାଯାଇଥିଲା। ଏହା ପରେ, ସେମାନଙ୍କ ସ୍ଥାନରେ ବିଶ୍ୱକପ୍ରେ ଅନ୍ୟ ଏକ ଦଳକୁ ସାମିଲ କରିବାକୁ ନିଷ୍ପତ୍ତି ନିଆଯାଇଥିଲା। ବର୍ତ୍ତମାନ ବାଂଲାଦେଶ ୨୦୨୬ ଟି୨୦ ବିଶ୍ୱକପ୍ରେ ଅଂଶଗ୍ରହଣ ନକରିବାକୁ ନିଷ୍ପତ୍ତି ନେଇଛି, ତେଣୁ ଆଇସିସି ସେମାନଙ୍କ ସ୍ଥାନରେ ସ୍କଟଲାଣ୍ଡକୁ ସାମିଲ କରିପାରେ।
