କାଇରୋ: ମିଶରର ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା ମିଶରର ରାଜଧାନୀ କାଇରୋରେ ଏକ ଆବିଷ୍କାର କରିଛି, ଯାହା ବିଶ୍ୱକୁ ଆଶ୍ଚର୍ଯ୍ୟ କରିଛି। ଏଠାରେ ପ୍ରାୟ ୪,୫୦୦ ବର୍ଷ ପୁରୁଣା ଏକ ସୂର୍ଯ୍ୟ ମନ୍ଦିର ଆବିଷ୍କାର କରାଯାଇଛି। ଏହି ମନ୍ଦିରର କିଛି ଅଂଶ ପ୍ରାଚୀନ ସମୟରେ ନଷ୍ଟ ହୋଇଯାଇଥିଲା ଏବଂ ପଞ୍ଚମ ରାଜବଂଶର ଷଷ୍ଠ ରାଜା ସେଠାରେ ତାଙ୍କର ମନ୍ଦିର ନିର୍ମାଣ କରିଥିଲେ। ବର୍ଷ ବର୍ଷର ଗବେଷଣା ଏବଂ କଠିନ ପରିଶ୍ରମ ପରେ, ମିଶରର ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା ଐତିହାସିକ ମନ୍ଦିରର ଅବଶେଷକୁ ସୁରକ୍ଷିତ ଭାବରେ ଉଦ୍ଧାର କରିଛି। ଏହା ମିଶରର ପ୍ରାଚୀନ ସଭ୍ୟତାର ଏକ ଗୁରୁତ୍ୱପୂର୍ଣ୍ଣ ଝଲକ ପ୍ରଦାନ କରେ। ମିଶରର ପ୍ରାଚୀନତା ଏବଂ ପର୍ଯ୍ୟଟନ ମନ୍ତ୍ରଣାଳୟ ଦ୍ୱାରା ସୋସିଆଲ ମିଡିଆ ପ୍ଲାଟଫର୍ମ ଇନ୍ଷ୍ଟାଗ୍ରାମରେ ମନ୍ଦିରର ଫଟୋ ଶେୟାର କରଯାଇଛି। ମନ୍ତ୍ରଣାଳୟ କହିଛି, ଏହି ଆବିଷ୍କାର ଇଟାଲି ଏବଂ ପୋଲାଣ୍ଡ ମଧ୍ୟରେ ଏକ ମିଳିତ ପ୍ରତ୍ନତାତ୍ତ୍ୱିକ ମିଶନର ଅଂଶ ଭାବରେ କରାଯାଇଥିଲା, ଯାହା ରାଜା ନ୍ୟୁସେରେଙ୍କ ମନ୍ଦିର ଉପରେ କାମ କରୁଥିଲା।
ବୈଜ୍ଞାନିକମାନେ ମନ୍ଦିର ତଳେ ମାଟି ଇଟାରେ ତିଆରି ଏକ କୋଠା ଆବିଷ୍କାର କରିଛନ୍ତି। ବିଶେଷଜ୍ଞମାନେ ବିଶ୍ୱାସ କରନ୍ତି ଯେ, ଏହି ସୂର୍ଯ୍ୟମନ୍ଦିର ପଞ୍ଚମ ରାଜବଂଶ (୨୪୬୫ ରୁ ୨୩୨୩ ଖ୍ରୀଷ୍ଟପୂର୍ବ)ର ଅଂଶ ହୋଇପାରେ। ଏହି ଆବିଷ୍କାର ମିଶରର ପ୍ରାଚୀନ ଇତିହାସକୁ ବୁଝିବାରେ ସାହାଯ୍ୟ କରିପାରେ। ବୈଜ୍ଞାନିକମାନେ ମନ୍ଦିର ଭିତରେ ପଥରରେ ଖୋଦିତ ଏକ ଧାର୍ମିକ କ୍ୟାଲେଣ୍ଡର ଆବିଷ୍କାର କରିଛନ୍ତି। ଏଥିରେ ସୋକାର, ମିନ ଏବଂ ରା ସହିତ ଜଡ଼ିତ ପର୍ବପର୍ବାଣିର ବିବରଣୀ ଦିଆଯାଇଛି। ସବୁଠାରୁ ଉଲ୍ଲେଖନୀୟ କଥା ହେଉଛି, ମନ୍ଦିରର ଛାତ ତାରା ଏବଂ ଗ୍ରହଗୁଡ଼ିକର ଅଧ୍ୟୟନ ପାଇଁ ବ୍ୟବହୃତ ହେଉଥିଲା। ଏହା ସୂଚାଇ ଦିଏ ଯେ, ଏହା କେବଳ ଏକ ପୂଜାସ୍ଥଳ ନୁହେଁ ବରଂ ବିଜ୍ଞାନ ଏବଂ ଜ୍ୟୋତିର୍ବିଜ୍ଞାନର ଏକ କେନ୍ଦ୍ର ମଧ୍ୟ ଥିଲା। ମନ୍ଦିରଟି ପ୍ରାୟ ୧୦୦୦୦ ବର୍ଗଫୁଟ ପରିବ୍ୟାପ୍ତ। ଧଳା ଚୂନା ପଥର କାରୁକାର୍ଯ୍ୟ, ଗ୍ରାନାଇଟ ସ୍ତମ୍ଭ, କରିଡର ଏବଂ ଛାତକୁ ଯାଇଥିବା ଶିଡ଼ିରୁ ଏହାର ମହିମା ଅନୁମାନ କରାଯାଇପାରିବ। ଏକ ଢାଲ ମଧ୍ୟ ଆବିଷ୍କୃତ ହୋଇଥିଲା। ଯାହା ନୀଳ ନଦୀ କିମ୍ବା ଏହାର ଗୋଟିଏ ଶାଖା ସହିତ ସଂଯୁକ୍ତ ବୋଲି ବିଶ୍ୱାସ କରାଯାଏ। ସମ୍ଭବତଃ ତୀର୍ଥଯାତ୍ରୀମାନେ ଡଙ୍ଗାରେ ଆସୁଥିଲେ।
