ମହାରାଷ୍ଟ୍ର: ମହାରାଷ୍ଟ୍ରର ପାଲଘର ଜିଲ୍ଲାର ଭୟାନ୍ଦର କ୍ରିକ୍ ବ୍ରିଜ୍ ଉପରେ ଯାଉଥିବା ଏକ ଲୋକାଲ୍ ଟ୍ରେନରୁ ଅସାବଧାନତାବଶତଃ ଫିଙ୍ଗା ଯାଇଥିବା ନଡ଼ିଆ ମାଡରେ ଜଣେ ୩୧ ବର୍ଷୀୟ ପଥଚାରୀଙ୍କ ମୃତ୍ୟୁ ଘଟିଛି। ସୂଚନା ଅନୁସାରେ, ଶନିବାର ସକାଳେ ଭୟାନ୍ଦର କ୍ରିକ୍ ବ୍ରିଜ୍ ଉପରେ ଯାଉଥିବା ଏକ ଟ୍ରେନ୍ରୁ ନଡ଼ିଆ ଫିଙ୍ଗା ଯାଇଥିଲା। ନଡ଼ିଆଟି ପାଣିରେ ପଡ଼ିବାରଥିଲା କିନ୍ତୁ ଦୁର୍ଭାଗ୍ୟବଶତଃ ସେ ବାଟ ଦେଇ ଯାଉଥିବା ପଥଚାରୀଙ୍କୁ ବାଜିଥିଲା ଯାହା ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ମୃତ ଯୁବକଙ୍କ ନାମ ସଞ୍ଜୟ ଦତ୍ତରାମ ଭୋୟାର। ସେ କାମ କରିବାକୁ ଯାଉଥିବା ବେଳେ ରେଳ ବ୍ରିଜ୍ ପାର ହେଉଥିଲେ। ସେହି ସମୟରେ ଘଟିଛି ଏହି ଅଘଟଣ।
ଘଟଣାକ୍ରମେ, ଖରାପ ପାଗ ଯୋଗୁଁ ଫେରି ସେବା ବନ୍ଦ ଥିବାରୁ ସଞ୍ଜୟ ଦ୍ୱୀପରୁ ନାଇଗାଓଁ ପହଞ୍ଚିବା ପାଇଁ ବିକଳ୍ପ ରାସ୍ତା ଭାବରେ ରେଳ ବ୍ରିଜ୍ ବ୍ୟବହାର କରୁଥିଲେ। ସେହି ସମୟରେ ଏକ ଲୋକାଲ୍ ଟ୍ରେନ୍ରେ ଜଣେ ଯାତ୍ରୀ ବୁଡ଼ ପକାଇବା ପାଇଁ ଏକ ନଡ଼ିଆ ଫିଙ୍ଗିଥିଲେ, ଯାହା ସଞ୍ଜୟଙ୍କ କାନ ଏବଂ ଆଖି ମଝିରେ ସିଧା ବାଜିଥିଲା। ତାଙ୍କୁ ତୁରନ୍ତ ଭାସାଇର ଏକ ଘରୋଇ ହସ୍ପିଟାଲକୁ ନିଆଯାଇଥିଲା। ମୁଣ୍ଡରେ ଗୁରୁତର ଆଘାତ ଲାଗି ତାଙ୍କ ଅବସ୍ଥା ଗୁରୁତର ହୋଇଯାଇଥିଲା। ସେଥି ପାଇଁ ଅଧିକ ଚିକିତ୍ସା ପାଇଁ ତାଙ୍କୁ ମୁମ୍ବାଇର ଜେ.ଜେ. ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସା ସମୟରେ ତାଙ୍କର ମୃତ୍ୟୁ ହୋଇଥିଲା।
