ନୂଆଦିଲ୍ଲୀ: ଆଫଗାନିସ୍ତାନ, ବାଂଲାଦେଶ ଏବଂ ପାକିସ୍ତାନରୁ ଧାର୍ମିକ ନିର୍ଯାତନା ଯୋଗୁଁ ଭାରତ ଆସିଥିବା ହିନ୍ଦୁ, ଶିଖ, ବୌଦ୍ଧ, ଜୈନ, ପାର୍ସୀ ଏବଂ ଖ୍ରୀଷ୍ଟିଆନ ସମ୍ପ୍ରଦାୟର ଲୋକଙ୍କ ପାଇଁ ଭାରତ ସରକାର ଏକ ବଡ଼ ଘୋଷଣା କରିଛନ୍ତି। କେନ୍ଦ୍ର ଗୃହ ମନ୍ତ୍ରଣାଳୟ କହିଛି ଯେ ୩୧ ଡିସେମ୍ବର ୨୦୨୪ ସୁଦ୍ଧା ଭାରତ ଆସିଥିବା ଏପରି ଲୋକଙ୍କୁ ପାସପୋର୍ଟ କିମ୍ବା ଅନ୍ୟାନ୍ୟ ଯାତ୍ରା ଡକ୍ୟୁମେଣ୍ଟ ବିନା ମଧ୍ୟ ଭାରତରେ ରହିବାକୁ ଅନୁମତି ଦିଆଯିବ। ଗତ ବର୍ଷ ଦେଶରେ ଲାଗୁ ହୋଇଥିବା ନାଗରିକତା (ସଂଶୋଧନ) ଆଇନ (ସିଏଏ) ଅନୁଯାୟୀ, ୩୧ ଡିସେମ୍ବର ୨୦୧୪ କିମ୍ବା ତା’ପୂର୍ବରୁ ଭାରତ ଆସିଥିବା ଏହି ନିର୍ଯାତିତ ସଂଖ୍ୟାଲଘୁମାନଙ୍କୁ ଭାରତୀୟ ନାଗରିକତା ପ୍ରଦାନ କରାଯିବ। ତଥାପି, ସମ୍ପ୍ରତି ସରକାର ପ୍ରବାସ ଏବଂ ବିଦେଶୀ (ନାଗରିକ) ଆଇନ, ୨୦୨୫ କାର୍ଯ୍ୟକାରୀ କରିଛନ୍ତି। ଏହି ଆଇନ ଅଧୀନରେ ଏହି ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରାଯାଇଛି।
ସରକାରଙ୍କ ଏହି ନିଷ୍ପତ୍ତି ବହୁ ସଂଖ୍ୟକ ଲୋକଙ୍କୁ, ବିଶେଷକରି ପାକିସ୍ତାନରୁ ହିନ୍ଦୁମାନଙ୍କୁ, ଯେଉଁମାନେ ୨୦୧୪ ପରେ ଭାରତ ଆସିଥିଲେ ଏବଂ ନିଜ ଭବିଷ୍ୟତ ବିଷୟରେ ଚିନ୍ତିତ ଥିଲେ, ସେମାନଙ୍କୁ ଆଶ୍ୱସ୍ତି ପ୍ରଦାନ କରିବ। ଗୃହ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ଆଦେଶ ଅନୁଯାୟୀ, “ଆଫଗାନିସ୍ତାନ, ବାଂଲାଦେଶ ଏବଂ ପାକିସ୍ତାନର ସଂଖ୍ୟାଲଘୁ ସମ୍ପ୍ରଦାୟ (ହିନ୍ଦୁ, ଶିଖ, ବୌଦ୍ଧ, ଜୈନ, ପାର୍ସୀ ଏବଂ ଖ୍ରୀଷ୍ଟିଆନ) ଯେଉଁମାନେ ଧାର୍ମିକ ନିର୍ଯାତନା କିମ୍ବା ଏହାର ଭୟ ଯୋଗୁଁ ଭାରତରେ ଆଶ୍ରୟ ନେବାକୁ ବାଧ୍ୟ ହୋଇଥିଲେ ଏବଂ ଡିସେମ୍ବର ୩୧, ୨୦୨୪ କିମ୍ବା ତା’ପୂର୍ବରୁ ବୈଧ କାଗଜପତ୍ର ବିନା ଦେଶରେ ପ୍ରବେଶ କରିଥିଲେ, ସେମାନଙ୍କୁ ବୈଧ ପାସପୋର୍ଟ ଏବଂ ଭିସା ରଖିବାର ନିୟମରୁ ମୁକ୍ତ କରାଯିବ।” ଅନ୍ୟପକ୍ଷରେ, ଗୃହ ମନ୍ତ୍ରଣାଳୟ ଏହା ମଧ୍ୟ ସୂଚନା ଦେଇଛି ଯେ ନେପାଳ ଏବଂ ଭୁଟାନର ନାଗରିକମାନଙ୍କ ସହିତ ଉଭୟ ପଡ଼ୋଶୀ ଦେଶରୁ ସଡ଼କ କିମ୍ବା ବିମାନ ଯୋଗେ ଭାରତରେ ପ୍ରବେଶ କରୁଥିବା ଭାରତୀୟମାନଙ୍କୁ ପୂର୍ବ ପରି ପାସପୋର୍ଟ କିମ୍ବା ଭିସା ଦେଖାଇବାକୁ ପଡ଼ିବ ନାହିଁ।
