ବ୍ରେସିଆ: ଇଟାଲୀରୁ ଏକ ମର୍ମାନ୍ତୁଦ ଦୁର୍ଘଟଣାର ଖବର ସାମ୍ନାକୁ ଆସିଛି। ବୁଧବାର (ଜୁଲାଇ ୨୩) ଦିନ ଏକ ବିମାନ ଉତ୍ତର ଇଟାଲୀର ବ୍ରେସିଆ ନିକଟରେ ଏ୨୧ କର୍ଡାମୋଲ୍-ଓସ୍ପିଟାଲ୍ ହାଇୱେରେ ଦୁର୍ଘଟଣାଗ୍ରସ୍ତ ହୋଇଥିବା ନେଇ ସୂଚନା ମିଳିଛି। ସିସିଟିଭିରେ କଏଦ ହୋଇଥିବା ଏକ ଭିଡ଼ିଓରେ ବିମାନଟି ରାସ୍ତାରେ ପଡ଼ିବା ଏବଂ ଏକ ବିରାଟ ଅଗ୍ନିଗୋଲାରେ ପରିଣତ ହେବାର ଦେଖାଯାଉଛି। ଏହି ଦୁର୍ଘଟଣାରେ ବିମାନର ଦୁଇ ଯାତ୍ରୀ, ୭୫ ବର୍ଷୀୟ ଓକିଲ ସର୍ଗିଓ ରାଭାଗଲିଆ ଏବଂ ତାଙ୍କ ୫୫ ବର୍ଷୀୟ ପତ୍ନୀ ଆନ୍ନା ମାରିଆ ଡି ଷ୍ଟେଫାନୋଙ୍କ ମୃତ୍ୟୁ ହୋଇଥିବା ନେଇ ସୂଚନା ମିଳିଛି।। ବିମାନଟି ନିୟନ୍ତ୍ରଣ ହରାଇ ରାଜପଥରେ ଖସିପଡ଼ିବାର କିଛି ସମୟ ପୂର୍ବରୁ ଉଡ଼ାଣ ଭରିଥିଲା ବୋଲି ଜଣାପଡ଼ିଛି।
ସୂଚନା ଅନୁସାରେ, ବିମାନ ଧକ୍କାରେ ଦୁଇଟି କାର ଜଳିଯାଇଥିଲା। ଜଣେ ଡ୍ରାଇଭର ଗୁରୁତର ଆହତ ହୋଇଥିଲେ। ତାଙ୍କୁ ତୁରନ୍ତ ଡାକ୍ତରଖାନାକୁ ନିଆଯାଇଥିଲା। ଅନ୍ୟ ଜଣେ ଘଟଣାସ୍ଥଳରେ ଚିକିତ୍ସିତ ହୋଇଥିଲେ। ଗୋଟିଏ କାର ବିସ୍ଫୋରଣରୁ ଅଳ୍ପକେ ରକ୍ଷା ପାଇଯାଇଥିବା ଦେଖାଯାଇଥିବା ବେଳେ ଅନ୍ୟ ଏକ କାର ଭଗ୍ନାବଶେଷରୁ ମାତ୍ର କିଛି ମିଟର ଦୂରରେ ହଠାତ୍ ଅଟକି ଯାଇଥିବା ଦେଖାଯାଇଥିଲା। ଅଗ୍ନିଶମ କର୍ମଚାରୀ, ଆମ୍ବୁଲାନ୍ସ ଏବଂ ସ୍ଥାନୀୟ ପୋଲିସ ସମେତ ଜରୁରୀକାଳୀନ ସେବା ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ କର୍ମଚାରୀମାନେ ନିଆଁକୁ ଲିଭାଇଥିଲେ। କର୍ତ୍ତୃପକ୍ଷମାନେ ଭଗ୍ନାବଶେଷ ସଫା କରିବା ଏବଂ ଦୁର୍ଘଟଣାର କାରଣ ଖୋଜିବା ଆରମ୍ଭ କରିବା ସହିତ ରାଜପଥକୁ ଉଭୟ ଦିଗରେ ବନ୍ଦ କରିଦିଆଯାଇଥିଲା। ତଦନ୍ତକାରୀମାନେ ଏହି ଦୁଃଖଦ ଘଟଣାର ତଦନ୍ତ କରୁଥିବା ସମୟରେ, ଦୁର୍ଘଟଣା ସମଗ୍ର ଇଟାଲୀରେ ଭୟଙ୍କର ପରିସ୍ଥିତି ସୃଷ୍ଟି କରିଛି।
