ପାକିସ୍ତାନ: ମଙ୍ଗଳବାର ଦିନ ପାକିସ୍ତାନର ବାଲୁଚ୍ ଲିବରେସନ୍ ଆର୍ମି (ବିଏଲଏ) ଏକ ଯାତ୍ରୀବାହୀ ଟ୍ରେନ୍ ହାଇଜାକ୍ କରିଛି। ବିଏଲଏ ଦାବି କରିଥିଲା ଯେ ଏହାର ସେନା ଜାଫର ଏକ୍ସପ୍ରେସକୁ ହାଇଜାକ୍ କରି ନେଇଛି ଏବଂ ୧୨୦ ଜଣ ଯାତ୍ରୀଙ୍କୁ ବନ୍ଧକ ରଖିଛି। ଟ୍ରେନ୍ଟି କ୍ୱେଟାରୁ ପେଶାୱର ଯାଉଥିଲା। ପାକିସ୍ତାନୀ ଖବରକାଗଜ ଦି ଡନ୍ ବେଲୁଚିସ୍ତାନ ସରକାରଙ୍କ ମୁଖପାତ୍ର ଶାହିଦ ରିନ୍ଦଙ୍କୁ ଉଦ୍ଧୃତ କରି ଏହା ରିପୋର୍ଟ କରିଛି। “କ୍ୱେଟାରୁ ପେଶାୱର ଯାଉଥିବା ଜାଫର ଏକ୍ସପ୍ରେସରେ ପେହରୋ କୁନରି ଏବଂ ଗାଡଲାର ମଧ୍ୟରେ ପ୍ରବଳ ଗୁଳିବିନିମୟ ହୋଇଥିବା ରିପୋର୍ଟ ଆସିଛି,” ଶାହିଦ କହିଛନ୍ତି। ଏହି ସମୟ ମଧ୍ୟରେ, ୬ ଜଣ ସୈନିକଙ୍କ ମୃତ୍ୟୁ ଘଟିଛି। ସାହିଦଙ୍କ ଅନୁସାରେ, ଏହି ଟ୍ରେନରେ ୫୦୦ ଜଣ ଲୋକ ଅଛନ୍ତି। ବିଏଲଏ ଚେତାବନୀ ଦେଇଛି ଯେ ଯଦି ସେମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଏ, ତେବେ ସେମାନେ ୧୨୦ ବନ୍ଧକଙ୍କୁ ହତ୍ୟା କରିବେ। ପାକିସ୍ତାନୀ ଗଣମାଧ୍ୟମ ରିପୋର୍ଟ ଅନୁସାରେ, ବିଏଲଏ ଜାଫର ଏକ୍ସପ୍ରେସ ଟ୍ରେନ ଉପରେ ଆକ୍ରମଣ କରିଥିଲା, ଯେଉଁଥିରେ ଟ୍ରେନ ଡ୍ରାଇଭର ଆହତ ହୋଇଥିଲେ। ଏହି ଆକ୍ରମଣ ପରେ, ଅଞ୍ଚଳର ସମସ୍ତ ଡାକ୍ତରଖାନାରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି।
ଏକ ବିବୃତ୍ତିରେ, ବିଏଲଏ କହିଛି ଯେ ଆମର ଯୋଦ୍ଧାମାନେ ମାଶକାଫ, ଧାଦର ଏବଂ ବୋଲାନରେ ଏହି ଅପରେସନର ଯୋଜନା କରିଛନ୍ତି। ରେଳ ଟ୍ରାକ ଉଡ଼ିଯାଇଛି, ଯାହା ଫଳରେ ଜାଫର ଏକ୍ସପ୍ରେସ ଅଟକି ଯାଇଛି। ଏହା ପରେ ଆମର ଯୋଦ୍ଧାମାନେ ଏହି ଟ୍ରେନ୍ କୁ କବଜା କରିନେଇଥିଲେ ଏବଂ ଯାତ୍ରୀମାନଙ୍କୁ ବନ୍ଧକ ରଖିଥିଲେ। ଯଦି ଆମ ବିରୁଦ୍ଧରେ କୌଣସି ସାମରିକ କାର୍ଯ୍ୟାନୁଷ୍ଠାନ ଚେଷ୍ଟା କରାଯାଏ, ତେବେ ଆମେ ସମସ୍ତ ବନ୍ଧକଙ୍କୁ ହତ୍ୟା କରିବୁ। ଏହି ନରସଂହାର ପାଇଁ ପାକିସ୍ତାନୀ ସେନା ଦାୟୀ ରହିବ।
