ନୂଆଦିଲ୍ଲୀ: ଜାମିଆ ଇସଲାମିଆ ବିଶ୍ୱବିଦ୍ୟାଳୟର ୨ ପିଏଚ୍ଡ଼ି ଛାତ୍ରଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନକୁ ବିରୋଧ କରିବା ବିଶ୍ୱବିଦ୍ୟାଳୟର ଅନ୍ୟ ୧୭ ଛାତ୍ରଙ୍କୁ ମହଙ୍ଗା ପଡ଼ିଛି। ଜାମିଆ ମିଲିଆ ଇସଲାମିଆ ବିଶ୍ୱବିଦ୍ୟାଳୟ ପକ୍ଷରୁ ଏହି ୧୭ ଜଣ ଛାତ୍ରଙ୍କୁ ନିଲମ୍ବନ କରାଯାଇଛି। ତେବେ ଏହାକୁ ନେଇ ବିଶ୍ୱବିଦ୍ୟାଳୟ ପରିସରରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଏହି ଘଟଣାରେ ବାମପନ୍ଥୀ ଅନୁବନ୍ଧିତ ଅଖିଳ ଭାରତୀୟ ଛାତ୍ର ସଂଘ ପକ୍ଷରୁ ଆସନ୍ତା ସୋମବାର ଜାମିଆ ମିଲିଆ ଇସଲାମିଆରେ କ୍ଲାସ୍ ବର୍ଜନ କରିବାକୁ ଆହ୍ୱାନ ଦିଆଯାଇଛି।
୨୦୨୪ ଡିସେମ୍ବରରେ ଅନଧିକୃତ ବିକ୍ଷୋଭ ପ୍ରଦର୍ଶନ କରିଥିବା ଅଭିଯୋଗରେ ବିଶ୍ୱବିଦ୍ୟାଳୟ ୨ ପିଏଚଡ଼ି ଛାତ୍ରଙ୍କୁ ନିଲମ୍ବନ କରିବା ପରେ ବିବାଦ ଆରମ୍ଭ ହୋଇଥିଲା। ଛାତ୍ର ବିକ୍ଷୋଭ ଜୋରଦାର ହୋଇଥିଲା ଯେଉଁଥିରେ କେନ୍ଦ୍ରୀୟ କ୍ୟାଣ୍ଟିନ୍ ଭଙ୍ଗାରୁଜା ଓ ସୁରକ୍ଷା ପରାମର୍ଶଦାତାଙ୍କ କାର୍ଯ୍ୟାଳୟର ଗେଟ୍ ଭାଙ୍ଗିବା ସମେତ ବିଶ୍ୱବିଦ୍ୟାଳୟର ଅନେକ ସମ୍ପତ୍ତି ନଷ୍ଟ ହୋଇଥିଲା। ଏହାକୁ ଦୃଷ୍ଟିରେ ରଖି ବିଶ୍ୱବିଦ୍ୟାଳୟ ପ୍ରଶାସନ ପକ୍ଷରୁ ଅନ୍ୟ ୧୭ ଛାତ୍ରଙ୍କୁ ମଧ୍ୟ ନିଲମ୍ବିତ କରାଯାଇଥିଲା। ଏହାକୁ ନେଇ ଅସନ୍ତୋଷକୁ ଦମନ କରିବାକୁ ପ୍ରଶାସନ ଉଦ୍ୟମ କରୁଛି ବୋଲି ଛାତ୍ର କର୍ମୀମାନେ ଯୁକ୍ତି ବାଢ଼ିଛନ୍ତି। ଜାମିଆର ଏହି କାର୍ଯ୍ୟାନୁଷ୍ଠାନ ପରେ ଅନେକ ଛାତ୍ରଛାତ୍ରୀ ବିଶ୍ୱବିଦ୍ୟାଳୟରେ ଭଙ୍ଗାରୁଜା, ଅନଧିକୃତ ବିକ୍ଷୋଭ ଏବଂ ମାନହାନୀ ଘଟଣାରେ ସମ୍ପୃକ୍ତ ଥିବା ଦର୍ଶାଇ ସେମାନଙ୍କୁ ନିଲମ୍ବନ ନୋଟିସ୍ ମିଳିଛି ବୋଲି ଦାବି କରିଛନ୍ତି। ଅଖିଳ ଭାରତୀୟ ଛାତ୍ର ସଂଘ (ଆଇସା)ର ସୂଚନା ଅନୁଯାୟୀ, ବିଶ୍ୱବିଦ୍ୟାଳୟ ପ୍ରଶାସନ ରାତାରାତି ୧୭ ଜଣ ଛାତ୍ରଛାତ୍ରୀଙ୍କୁ ନିଲମ୍ବନ କରିବା ପରେ ବିଭିନ୍ନ ବିଭାଗର ଛାତ୍ରଛାତ୍ରୀ ଶ୍ରେଣୀ ବହିଷ୍କାର ଘୋଷଣା କରିଛନ୍ତି। ସମାଜବିଜ୍ଞାନ, ସାମାଜିକ ବିଜ୍ଞାନ, ଭୂଗୋଳ, ହିନ୍ଦୀ, ସାମାଜିକ କାର୍ଯ୍ୟ, ସ୍ପାନିଶ ଓ ଲାଟିନ୍ ଆମେରିକୀୟ ଅଧ୍ୟୟନ, ଫ୍ରେଞ୍ଚ ଓ ଫ୍ରାଙ୍କୋଫୋନ ଷ୍ଟଡିଜ୍, କୋରିଆନ୍ ଭାଷା ଏବଂ ସଂସ୍କୃତି ଓ ଗଣମାଧ୍ୟମ ଓ ଶାସନ କେନ୍ଦ୍ରର ଛାତ୍ରଛାତ୍ରୀମାନେ ଏହି ପଦକ୍ଷେପକୁ ସମର୍ଥନ ଘୋଷଣା କରିଛନ୍ତି।
ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପ୍ରତ୍ୟାହାର, କ୍ୟାମ୍ପସ ବିକ୍ଷୋଭ ଉପରେ ପ୍ରତିବନ୍ଧକ ଲଗାଇଥିବା ୨୦୨୦ କାର୍ଯ୍ୟାଳୟ ସ୍ମାରକପତ୍ର ପ୍ରତ୍ୟାହାର, ଗ୍ରାଫିଟି ଓ ପୋଷ୍ଟର ପାଇଁ ୫୦ ହଜାର ଟଙ୍କା ଜରିମାନା ହଟାଇବା ଏବଂ ବିକ୍ଷୋଭରେ ଅଂଶଗ୍ରହଣ କଲେ ଛାତ୍ରଛାତ୍ରୀଙ୍କୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି ପ୍ରତିଶ୍ରୁତି ଦେବାକୁ ବିକ୍ଷୋଭକାରୀମାନେ ଦାବି କରିଛନ୍ତି। ତେବେ ଛାତ୍ରଛାତ୍ରୀଙ୍କ ନିଲମ୍ବନ ନେଇ ହୋଇଥିବା ଦାବି ଉପରେ ବିଶ୍ୱବିଦ୍ୟାଳୟ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ।
