ଓଟାୱା: ତୀବ୍ର ବିରୋଧାଭାସର ସମ୍ମୁଖୀନ ହେବା ପରେ କାନାଡାର ପ୍ରଧାନମନ୍ତ୍ରୀ ପଦରୁ ଦିନକ ପୂର୍ବେ ଇସ୍ତଫା ଦେଇଛନ୍ତି ଜଷ୍ଟିନ୍ ଟ୍ରୁଡେୟୁ। ତେବେ ତାଙ୍କ ସ୍ଥାନରେ କାନାଡାରେ ନୂଆ ତଥା ପରବର୍ତ୍ତୀ ଶାସକ ଭାବେ କିଏ ପ୍ରଧାନମନ୍ତ୍ରୀ ପଦରେ ଆସୀନ ହେବେ ସେନେଇ ଏବେ ସମଗ୍ର ବିଶ୍ୱର ନଜର ରହିଛି। ଏସବୁ ମଧ୍ୟରେ ଟ୍ରୁଡେୟୁଙ୍କ ଉତ୍ତରାଧିକାରୀ ଭାବେ ଯେଉଁ କେତେଜଣଙ୍କ ନାମ ସାମ୍ନାକୁ ଆସୁଛି ସେମାନଙ୍କ ମଧ୍ୟରେ ଅନୀତା ଆନନ୍ଦଙ୍କ ନାମ ସର୍ବାଗ୍ରେ ରହିଛି। ପ୍ରକାଶ, ଭାରତୀୟ ମୂଳବାସିନ୍ଦ।। ତଥା ୫୮ ବର୍ଷୀୟା ଅନୀତା ଆନନ୍ଦଙ୍କ ପୁରା ନାମ ଅନୀତା ଇନ୍ଦିରା ଆନନ୍ଦ ପିସି ଏମ୍ପି। ତାଙ୍କ ପରିବାର (ମା ସରୋଜ ଡି ରାମ୍ ଓ ବାପା ଏସ୍ଭି ଆନନ୍ଦ ମୂଳତଃ ତାମିଲନାଡୁ ବାସିନ୍ଦା ଏବଂ ଉଭୟ ପେଶାରେ ଡାକ୍ତର) ସମୟକ୍ରମେ କାନାଡା ଚାଲିଯାଇଥିଲେ ଏବଂ ସେଠାକାର କେଣ୍ଟଭିଲ୍ଲେ ସହରରେ ୧୯୬୭ରେ ଅନୀତାଙ୍କ ଜନ୍ମ ହୋଇଥିଲା।
ସାମ୍ପ୍ରତିକ ସମୟରେ ଅନୀତା ଆନନ୍ଦ କାନାଡା ସରକାରଙ୍କ ଅନ୍ୟତମ ପ୍ରଭାବଶାଳୀ ନେତ୍ରୀ ଭାବେ ଜଣାଶୁଣା। ନିଜ ଶାସନ ଏବଂ ଜନସେବା କ୍ଷେତ୍ରରେ ତାଙ୍କର ସୁଖ୍ୟାତି ରହିଛି। ଏହି କାରଣରୁ ଆଗାମୀ ଅକ୍ଟୋବର ମାସରେ ହେବାକୁ ଥିବା କାନାଡା ସାଧାରଣ ନିର୍ବାଚନ ପୂର୍ବରୁ ଦଳ ଅନୀତା ଆନନ୍ଦଙ୍କ ଭଳି ଜଣେ ନେତ୍ରୀଙ୍କୁ ଶାସକ ଭାବେ ଦାୟିତ୍ୱ ଦେବାକୁ ଚାହୁଁଛି, ଯାହାଦ୍ୱାରା ଦେଶବାସୀଙ୍କ ସମର୍ଥନ ମିଳିପାରିବ ଏବଂ ଦଳକୁ ନିର୍ବାଚନରେ ମଧ୍ୟ ଭଲ ଫଳାଫଳ ଲାଭ ହୋଇପାରିବ। ତେବେ ଅନୀତାଙ୍କ ସହ ପିଆର ପୁଲିଭ୍ରେ, କ୍ରିଷ୍ଟିଆ ଫ୍ରିଲାଣ୍ଡ ଏବଂ ମାର୍କ କାର୍ନିଙ୍କ ଭଳି ବ୍ୟକ୍ତିତ୍ୱ ମଧ୍ୟ ପ୍ରଧାନମନ୍ତ୍ରୀ ପଦ ଦୌଡରେ ସାମିଲ ହୋଇଥିବାରୁ ଅନୀତାଙ୍କ ପ୍ରଧାନମନ୍ତ୍ରୀ ହେବା ନହେବା ନେଇ ସାମାନ୍ୟ ସଂଶୟ ରହିଛି। ତେବେ ଅନୀତା ଯଦି କାନାଡାର ପରବର୍ତ୍ତୀ ପ୍ରଧାନମନ୍ତ୍ରୀ ହୁଅନ୍ତି, ତେବେ ଆଶା କରାଯାଇପାରେ ଯେ ଭାରତ ସହିତ କାନାଡାର ସମ୍ପର୍କ ପୁଣି ଭଲ ହୋଇପାରିବ, ଯାହାକି ଟ୍ରୁଡେୟୁଙ୍କ ସମୟରେ ଖରାପ ହୋଇଯାଇଥିଲା। ପ୍ରକାଶ, କାନାଡାରେ ବହୁ ସଂଖ୍ୟାରେ ଭାରତୀୟ ମୂଳ ବାସିନ୍ଦା ଅଛନ୍ତି। ଏହି କାରଣରୁ, ଭାରତୀୟ ମୂଳ ବାସିନ୍ଦା ପ୍ରଧାନମନ୍ତ୍ରୀ ହେବା ଭାରତ ପାଇଁ ମଧ୍ୟ ଏକ ଭଲ ସଙ୍କେତ ହୋଇପାରେ।
ଜଷ୍ଟିନ ଟ୍ରୁଡେୟୁଙ୍କ ସ୍ଥାନ ନେବାକୁ ମନୋନୀତ ହୋଇଥିବା ଶ୍ରେଷ୍ଠ ୫ ନେତାଙ୍କ ମଧ୍ୟରେ ଭାରତୀୟ ମୂଳ ବାସିନ୍ଦା ଅନୀତା ଆନନ୍ଦଙ୍କୁ ସର୍ବାଧିକ ପସନ୍ଦ କରାଯାଉଛି। ଅନୀତା ଆନନ୍ଦ ବର୍ତ୍ତମାନ ଦେଶର ପରିବହନ ଓ ଗୃହମନ୍ତ୍ରୀ ଭାବରେ କାର୍ଯ୍ୟ କରୁଛନ୍ତି। ଏହାପୂର୍ବରୁ ସେ କାନାଡାର ପ୍ରତିରକ୍ଷା ମନ୍ତ୍ରୀ ଭାବେ ମଧ୍ୟ ଦାୟିତ୍ୱ ତୁଲାଇସାରିଛନ୍ତି। ତାଙ୍କର ଶିକ୍ଷାଗତ ଓ ରାଜନୈତିକ ପୃଷ୍ଠଭୂମି ଯୋଗୁଁ ସେ ଏକ ଗୁରୁତ୍ୱପୂର୍ଣ୍ଣ ରାଜନୈତିକ ବ୍ୟକ୍ତିତ୍ୱ ଭାବେ ଉଭା ହୋଇଛନ୍ତି। ଅନୀତା ଆନନ୍ଦ କୁଇନ୍ସ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର, ଅକ୍ସଫୋର୍ଡ ୟୁନିଭରସିଟିରୁ ସ୍ନାତକୋତ୍ତର, ଡାଲହୋଇ ବିଶ୍ୱବିଦ୍ୟାଳୟର ସ୍ନାତକୋତ୍ତର ଏବଂ ଟରୋଣ୍ଟୋ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର ଆଇନ ଡିଗ୍ରୀ ହାସଲ କରିଛନ୍ତି। ଏଥିସହ ସେ ୟେଲ, କୁଇନ୍ସ ୟୁନିଭର୍ସିଟି ଏବଂ ପାଶ୍ଚାତ୍ୟ ବିଶ୍ୱବିଦ୍ୟାଳୟ ଭଳି ପ୍ରତିଷ୍ଠିତ ଅନୁଷ୍ଠାନରେ ମଧ୍ୟ ଜଣେ ଆସୋସିଏଟ୍ ପ୍ରଫେସର ଭାବେ ଶିକ୍ଷାଦାନ କରିଛନ୍ତି। ରାଜନୀତିରେ ପ୍ରବେଶ କରିବା ପୂର୍ବରୁ ସେ ଟରୋଣ୍ଟୋ ବିଶ୍ୱବିଦ୍ୟାଳୟର ଆଇନ ପ୍ରଫେସର ଥିଲେ।
