ପୋଲ ନିକଟରୁ ଦୁଇ ଯୁବକଙ୍କ ମୃତଦେହ ଉଦ୍ଧାର

ବାଲେଶ୍ବର: ଆଜି ଭୋର ସମୟରେ ପିସିଆର ଭ୍ୟାନ ବାଲେଶ୍ବର ସହର ଉପକଣ୍ଠ ଏକ ପୋଲ ନିକଟରୁ  ୨ଜଣ ଯୁବକଙ୍କ ମୃତଦେହ ଉଦ୍ଧାର କରାଯାଇଛି। ଘଟଣାସ୍ଥଳରୁ ଅନ୍ୟ ୨ଜଣ ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଛି। ୨ ମୃତକ ହେଲେ ସଦର ଥାନା କାସିମାବାଦର ରକି ଟୁଡୁ ଓ ବିକାଶ ମୁର୍ମୁ। ଆହତ ହେଲେ ବାଲେଶ୍ୱର ସହର ଉପକଣ୍ଠ କରଞ୍ଜିଆ ପଞ୍ଚାୟତ ଭୋଇସାହିର ଅନନ୍ତ ମାଝୀ ଓ ରାହୁଲ ମାଝୀ। ଏନେଇ ପୁଲିସ ଅଧିକ ତଦନ୍ତ କରୁଛି। ଆଜି ଭୋର ସମୟରେ ପିସିଆର ଭ୍ୟାନ ସେମାନଙ୍କୁ ସେଠାରୁ ଉଦ୍ଧାର କରିଥିବା ବେଳେ ସଦର ଥାନା ପୁଲିସ ପହଞ୍ଚି ଛାନଭିନ ଆରମ୍ଭ କରିଛି। ଘଟଣାସ୍ଥଳରୁ ୨ଟି ବାଇକ ଜବତ ସହ ମୃତ ଓ ଆହତଙ୍କ ପକେଟରୁ ଛୁରୀ ଜବତ କରାଯାଇଛି।