ସଡ଼କ ଦୁର୍ଘଟଣା : ୪ ମୃତ

ମଧ୍ୟପ୍ରଦେଶ : ମଧ୍ୟ ପ୍ରଦେଶ ବିଦିଶା ଜିଲ୍ଲାରେ ଘଟିଛି ସଡ଼କ ଦୁର୍ଘଟଣା। ଏକ ଯାତ୍ରୀବାହୀ ମାରୁତି ଗାଡ଼ି ଟ୍ରକକୁ ଧକ୍କା ଦେଇଛି । ଫଳରେ ୪ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ଆହତ ହୋଇଛନ୍ତି । ସମସ୍ତ ଯାତ୍ରୀ ରାଜସ୍ଥାନର ବୋଲି ସୂଚନା ରହିଛି । ଶନିବାର ଭୋର ପ୍ରାୟ ୪ଟା ସମୟରେ ବିଦିଶା ଜିଲ୍ଲାର ଲଟେରୀ ନିକଟସ୍ଥ ସିରୋଂଜ ଜାତୀୟ ରାଜପଥ ଉପରେ ଏକ ମାଲବାହୀ ଟ୍ରକ ଟର୍ଣ୍ଣିଂରେ ରାସ୍ତା ଉପରକୁ ଆସୁଥିଲା । ଏହି ସମୟରେ ଦ୍ରୁତ ଗତିରେ ଆସୁଥିବା ମାରୁତି ଗାଡ଼ି ଟ୍ରକ ସହ ପଛ ପଟୁ ପିଟି ହୋଇଥିଲା । ଫଳରେ ସେଥିରେ ଯାତ୍ରା କରୁଥିବା ଶ୍ରଦ୍ଧାଳୁମାନଙ୍କ ମଧ୍ୟରୁ ୪ଜଣଙ୍କର ମୃତ୍ୟୁ ହୋଇଥିବା ବେଳେ ୬ ଜଣ ଆହତ ହୋଇଛନ୍ତି । ସେମାନଙ୍କୁ ଉଦ୍ଧାର କରାଯାଇ ନିକଟସ୍ଥ ଲଟେରୀ ମେଡ଼ିକାଲରେ ଭର୍ତ୍ତି କରାଯାଇଛି । ସମସ୍ତ ଯାତ୍ରୀ ରାଜସ୍ଥାନର ଝାଲାବାଡ଼ ଜିଲ୍ଲାର ବୋଲି ଲଟେରୀ ଏସଡିପିଓ ଅଜୟ ମିଶ୍ର ସୂଚନା ଦେଇଛନ୍ତି । ପୋଲିସ ଦୁର୍ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି ।