ନୂଆଦିଲ୍ଲୀ: ବାବର ଖାଲ୍ସା ଇଣ୍ଟରନ୍ୟାସନାଲ (ବିକେଆଇ) ମୁଖ୍ୟ ତଥା ଗ୍ୟାଙ୍ଗଷ୍ଟର ଲଖବୀର ସିଂ ଲାଣ୍ଡାକୁ ଭାରତ ସରକାର ଆତଙ୍କବାଦୀ ଘୋଷଣା କରିଛନ୍ତି । ଶନିବାର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏନେଇ ଏକ ବିଜ୍ଞପ୍ତି ଜାରି କରାଯାଇଛି । ଏଥିରେ ଲଖବୀର ସମ୍ପ୍ରତି କାନାଡାର ଆଲବର୍ଟା, ଏଡମୋର୍ଟନ୍ରେ ରହୁଥିବା ବେଳେ ଅନେକ ଦେଶକୁ ନିଜ ଅପରାଧିକ ନେଟ୍ୱାର୍କ ବିସ୍ତାରିତ କରିଥିବା ଉଲ୍ଲେଖ ରହିଛି । ଲଖବୀର ସିଂ ଲାଣ୍ଡା ମୁଖ୍ୟତଃ ପଞ୍ଜାବର ତରନତାରନ୍ ଜିଲ୍ଲାର ବାସିନ୍ଦା । ତେବେ ସେ ପରବର୍ତ୍ତୀ ସମୟରେ ଆତଙ୍କବାଦୀ ନେଟ୍ୱାର୍କ ସହ ଯୋଡିହୋଇଯାଇଥିଲା । ପାକିସ୍ତାନରୁ ଭାରତକୁ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ ବିସ୍ଫୋରକ ସାମଗ୍ରୀ ଆଦି ଚୋରା ଚାଲାଣ କରିଥାଏ ।
ତା’ ସମ୍ପର୍କରେ ଏସବୁ ଅଭିଯୋଗର ପ୍ରମାଣ ମିଳିବା ପରେ ବେଆଇନ୍ କାର୍ଯ୍ୟକଳାପରେ ସମ୍ପୃକ୍ତ ଥିବା ଅଭିଯୋଗରେ ଭାରତ ସରକାରଙ୍କ ପକ୍ଷରୁ ତା’କୁ ଆତଙ୍କବାଦୀ ଘୋଷଣା କରାଯାଇଛି । ଲଖବୀର ସିଂ ଲାଣ୍ଡା ୨ଠ୨୨ ମେ’ରେ ପଞ୍ଜାବ ପୁଲିସ୍ର ଇଣ୍ଟେଲିଜେନ୍ସ ମୁଖ୍ୟାଳୟ ଉପରେ ରକେଟ୍ ପ୍ରୋପେଲ୍ଡ୍ ଗ୍ରେନେଡ୍ ଆକ୍ରମଣ ପଛର ମାଷ୍ଟରମାଇଣ୍ଡ ରହିଥିଲା । ଏହାଛଡା ସେ ପଞ୍ଜାବ ପୁଲିସ୍ ଏବଂ ଜାତୀୟ ତଦନ୍ତକାରୀ ସଂସ୍ଥା ଏନ୍ଆଇଏର ମୋଷ୍ଟ ୱାଣ୍ଟେଡ୍ ତାଲିକାରେ ଥିଲା । ପଞ୍ଜାବ ସହିତ ଦେଶର ବିଭିନ୍ନ ସ୍ଥାନରେ ଆତଙ୍କବାଦୀ ମଡ୍ୟୁଲ ସ୍ଥାପନ କରିଥିବା ଲଖବୀର ବିରୋଧରେ ୨ଠ୨୧ରେ ଲୁକ୍ ଆଉଟ୍ ସର୍କୁଲାର ଜାରି କରାଯାଇଥିଲା ।
