ମୟୂରଭଞ୍ଜ: ମୟୂରଭଞ୍ଜ ଜିଲ୍ଲା ଶିମିଳିପାଳ ବ୍ୟାଘ୍ର ପ୍ରକଳ୍ପ ଅଧିକାରୀଙ୍କୁ ମିଳିଛି ବଡ ସଫଳତା । ବିଶେଷ ସୂତ୍ରରୁ ଖବର ପାଇବା ପରେ ଗତକାଲି ସକାଳେ ଯଶିପୁର ରାଇରଙ୍ଗପୁର ରାସ୍ତା ଜାମୁକେଶ୍ୱର ଅଞ୍ଚଳରୁ ୪ଟି ମୂଲ୍ୟବାନ ହାତୀ ଦାନ୍ତ ସହ ୫ ଜଣ ବ୍ୟବସାୟୀଙ୍କୁ ଗିରଫ କରିଛି ପୋଲିସ । ସମସ୍ତ ଅଭିଯୁକ୍ତ ଯଶିପୁର ଥାନା ଅଞ୍ଚଳର ବୋଲି ଜଣାପଡିଛି । ଅଭିଯୁକ୍ତ ମାନଙ୍କ ଠାରୁ ୨ଟି ବାଇକ ସହିତ ୪ଟି ମୋବାଇଲ ଫୋନ କୁ ଜବତ କରିଛି ବିଭାଗ ।
ହାତୀଦାନ୍ତଟି ଖୁବ କମ ବୟସ ହାତୀର ଦାନ୍ତ ହୋଇଥିବା ଜଣାପଡ଼ିଛି । ଅଭିଯୁକ୍ତମାନେ ହାତୀର ଦାନ୍ତକୁ ଶିକାରୀ ଠାରୁ ଆଣିବାପରେ ରାତାରାତି ଧନୀ ହେବାପାଇଁ ମୋଟା ଅଙ୍କର ଟଙ୍କାରେ ଡିଲ କରିଥିଲେ । କିନ୍ତୁ ହାତୀଦାନ୍ତ ବିକ୍ରି ପୂର୍ବରୁ ଦକ୍ଷିଣ ଶିମିଳିପାଳ ଡେପୁଟି ଡାଇରେକ୍ଟର ଡ଼ ସମ୍ରାଟ ଗୌଡା, ଏବଂ ଉତ୍ତର ଶିମିଳିପାଳ ଡେପୁଟି ଡାଇରେକ୍ଟର ସାଇ କିରଣ ଡିଏନଙ୍କୁ ନେଇ ଗଠିତ ଏକ ୧୦ ଜଣିଆ ଟିମ ଅଭିଯୁକ୍ତ ମାନଙ୍କୁ ମାଡ଼ିବସିଥିଲେ ।
ହାତୀଦାନ୍ତ ସହିତ ଶିକାରୀଙ୍କୁ ଧରିବାରେ ଶିମିଳିପାଳ ବ୍ୟାଘ୍ରପ୍ରକଳ୍ପ ଅଧିକାରୀ ସଫଳତା ପାଇବାପରେ ଏମାନଙ୍କ ପଛରେ ଥିବା ମାଷ୍ଟର ମାଇଣ୍ଡ କୁ ଧରିବାରେ କେବେ ସଫଳ ହୋଉଛନ୍ତି ତାହା ଦେଖିବାକୁ ବାକି ରହିଲା…
