ତ୍ରିସୁର: କେରଳର ତ୍ରିସୁର ଜିଲ୍ଲାର ତିରୁବିଲ୍ଭମଲାରେ ମୋବାଇଲ୍ ଫୋନ୍ ବିସ୍ଫୋରଣ ହୋଇ ଜଣେ ୮ ବର୍ଷରୁ ଶିଶୁ କନ୍ୟାର ମୃତ୍ୟୁ ଘଟିଛି । ଘଟଣା ସୋମବାର ରାତି ସାଢ଼େ ୧୦ଟା ବେଳର ହୋଇଥିବା ବେଳେ ପୁଲିସ ମଙ୍ଗଳବାର ଏହି ସୂଚନା ଦେଇଛି । ଫରେନ୍ସିକ୍ ଟିମ୍ ଏବଂ ବିଶେଷଜ୍ଞଙ୍କ ସହିତ ପୁଲିସ ଘଟଣାର ତଦନ୍ତ କରୁଛି ।
ମିଡିଆ ରିପୋର୍ଟ ଅନୁସାରେ ପୂର୍ବତନ ପଞ୍ଚାୟତ ସମିତି ସଦସ୍ୟ ଅଶୋକ କୁମାରଙ୍କ କନ୍ୟା ଆଦିତ୍ୟଶ୍ରୀ ମୁହଁ ପାଖରେ ଫୋନ୍ ରଖି ଭିଡିଓ ଦେଖୁଥିବା ବେଳେ ଏହି ବିସ୍ଫୋରଣ ହୋଇଥିଲା । ପୁଲିସ ଅନୁସାରେ ଆଦିତ୍ୟଶ୍ରୀ ଦୀର୍ଘ ସମୟ ଧରି ଭିଡିଓ ଦେଖୁଥିବା ବେଳେ ବ୍ୟାଟେରୀ ଅଧିକ ଗରମ ହୋଇ ବିସ୍ଫୋରଣ ହୋଇଥିବା ଆଶଙ୍କା କରାଯାଉଛି । ଫୋନ୍ଟି ତିନିବର୍ଷ ତଳେ କିଣାଯାଇଥିବା ବେଳେ ଗତବର୍ଷ ଏହାର ବ୍ୟାଟେରୀ ପରିବର୍ତ୍ତନ କରାଯାଇଥିଲା । ବିସ୍ଫୋରଣ ଏତେ ଭୀଷଣ ଥିଲା ଯେ ଆଦିତ୍ୟଶ୍ରୀର ମୁହଁରେ ଗଭୀର ଆଘାତ ଲାଗିଥିବା ବେଳେ ତା’ର ଆଙ୍ଗୁଠିଗୁଡ଼ିକ ଭାଙ୍ଗିଯାଇଥିଲା ଏବଂ ପାପୁଲି ଜଳିଯାଇଥିଲା । ଘଟଣାସ୍ଥଳରେ ତା’ର ମୃତ୍ୟୁ ହୋଇଥିଲା ।
